ކޮވިޑްގައި ރާއްޖެއިން އެޅިފިޔަވަޅުތައް ބަލަން ސީޝެލްއިންވެސް ގުޅި؛ އެޅީ ރާއްޖެއިން އެޅި ފިޔަވަޅުތައް: ރައީސް ޞާލިހު

ކޮވިޑްގައި ސީޝެލްއިންވެސް ބެލީ ރާއްޖެއިން އެޅި ފިޔަވަޅުތައް ކަމަށް ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.

ރައީސް މިހެން ވިދާޅުވީ، ބިލެއްދޫ އާ އިންޖީނުގެއާއި އޮފީސް ހުޅުވުމުގެ ރަސްމިއްޔާތުގައި ވާހަކަ ދައްކަވަމުންނެވެ.

ރައީސް ވިދާޅުވީ، ކޮވިޑްގެ އާލަމީ ވަބާގެ ތެރޭގައި ސީޝެލްސްގެ ރައީސް ފޯނުކުރެއްވި ކަމަށާއި އަދި ރާއްޖެއިން ކަންތައް ކުރި ގޮތުގެ މައުލޫމާތު ހޯއްދެވި ކަމަށެވެ.

"އޭރު އިރާދަކުރެއްވިއްޔާ އަޅުގަނޑުމެންގެ ތެރެއަކު މީހުން އެވަރަކަށް މަރެއް ނުވޭ. ވިދާޅުވީ، ކިހިނެތްހޭ ތި ރާއްޖޭގެ ކަންތައް ކުރަނީ. މީހުން މަރު ނުވަނީ ކީއްވެގެންހެއްޔޭ ރާއްޖޭގަ. ތިމަންނަމެންގެ 98 ހާހެއްހާ މީހުން ދިރިއުޅޭ ރަށެއް، އަޅުގަނޑުމެންގެ (ރާއްޖޭގެ) ތިން ލައްކައެއްހާ މީހުން އޭރު އެބައުޅޭ. މިތަނުގަ (ސީޝެލްސްގަ) ދުވާލަކު ތިން ހަތަރު މީހުން މަރުވެއޭ އެބަ. ކޮން ކަހަލަ ފިޔަވަޅުތަކެއް ހޭ އެޅީ"

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު

ސީޝެލްސްގެ ރައީސްގެ އެދިލެއްވުމަށް އޭރު ރާއްޖޭގައި އަޅާފައިވާ ފިޔަވަޅުތައް ހިއްސާ ކުރި ކަމަށާއި، އޭގެ ފަހުންވެސް ސީޝެލްސްގެ ރައީސް ގުޅުއްވި ކަމަށް ވިދާޅުވިއެވެ. އަދި ރާއްޖޭގެ ކަންކުރާ ގޮތް ބެލި ކަމަށާއި ރާއްޖެއިން އެޅި ފިޔަވަޅުތަކަކީ އެންމެ ރަނގަޅު ގޮތް ކަމަށް ފެނި، އެގޮތަށް އެ ގައުމުގައިވެސް ކަންތައް ކުރި ކަމަށް ސީޝެލްސްގެ ރައީސް ވިދާޅުވި ކަމަށް ރައީސް ސާލިހު ވިދާޅުވިއެވެ.

އެހެންކަމުން ކޮވިޑްގެ ތެރޭގައި ރާއްޖޭގައި ތިއްބެވި ސިއްހީ މާހިރުންނާއި މިނިސްޓަރުންނާއި ޓޫރިޒަމް ދާއިރާއިން އޭރު ދެއްވެވި ލަފާއަކީ މިހާރު މިގައުމަށް އާދެވިފައިވާ ސަބަބު ކަމަށް ރައީސް ވިދާޅުވިއެވެ.

އެއް ބަޔަކު ރުޅި އައި ނަމަވެސް ސިޔާސަތުތައް ކަނޑައަޅަން ވާނީ އެކަމެއްގައި ހިމެނޭ ހުރިހާ އެންމެންގެ ލަޔަފާ އިރުޝާދު ހޯދައިގެން ކަމަށް ރައީސް ވިދާޅުވިއެވެ.

ރައީސް ޞާލިހު ފ. އަތޮޅަށް މި ކުރައްވާ ދަތުރުފުޅުގައި ވަޑައިގަތުމަށް ހަމަޖެހިފައި ވަނީ ފ. ނިލަންދޫ، ދަރަނބޫދޫ، މަގޫދޫ، ބިލެއްދޫ، އަދި ފީއައްޔަށެވެ.

މި ދަތުރުފުޅުގައި އެ ރަށްރަށުގަ ސަރުކާރުން ކުރިއަށް ގެންދިޔަ ބައެއް މަޝްރޫއުތައް ނިންމާ، ހިދުމަތްތައް އިފްތިތާހު ކުރުން ކުރިއަށް ގެންގޮސްދެއްވާނެއެވެ.

އަދި ކޮންމެ ރަށެއްގެ ރައްޔިތުންނާނއި، ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީއާ ރައީސް ބައްދަލު ކުރައްވާނެއެވެ.