އަޅުގަނޑަށް އޮންނަ އެންމެ ބޮޑު ޔަގީންކަމަކީ ރައީސް ވިދާޅުވެއްޖެއްޔާ ކުރައްވާނެކަން: ޙަލީމް
ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހާއި ދޭތެރޭ އެންމެ ބޮޑަށް އޮންނަ ޔަގީންކަމަކީ އެމަނިކުފާނު ވަކިކަމެއް ކޮށްދެއްވާނެކަމަށް ވިދާޅުވެއްޖެނަމަ އެކަން ފުއްދަވާދެއްވާނެކަމުގެ ޔަގީންކަން ކަމަށް ރައްޔިތުންގެ މަޖިލީހުގެ ބިލެއްދޫ ދާއިރާގެ މެމްބަރު އަޙްމަދު ޙަލީމު (ދޮންބިލެއް) ވިދާޅުވެއްޖެ އެވެ.
މެމްބަރު ޙަލީމު މިފަދައިން ވިދާޅުވެފައިވަނީ ފ. ފީއަލީގައި އިމާރާތްކުރެވުނު އިންޖީނުގެއާއި އޮފީސް އިމާރާތް އަދި އައިސް ޕްލާންޓު ހުޅުވުމުގެ ރަސްމިއްޔާތުގައި ވާހަކަދައްކަވަމުން ނެވެ.
އެގޮތުން މެމްބަރު ވިދާޅުވީ ފީއައްޔަކީ އާބާދީ ބޮޑު ރަށަކަށް ނުވާތީ އެ ރަށުގައި ރައްޔިތުންނަށް ބޭނުންޖެހިފައި ހުރި ކަންކަން ނުފުދި ނުރި ނަމަވެސް އެ ކަންކަން ކުރެވޭނެ ކަމުގެ އުންމީދު ރައްޔިތުންގެ ނެތްކަމަށެވެ.
ރައްޔިތުންގެ މަޖިލީސް އިންތިޚާބުގެ ކެމްޕޭނަށް ރަށަށް އަރާވަޑައިގެން އެކި ފަރާތްތަކާއި ދެކެވުނު ވާހަކަތަކުން ފީއަލީ ރައްޔިތުން ބޭނުންޖެހިފައިވާ ކަންކަން ސަރުކާރުން ކޮށްދެއްވާނެކަމުގެ ޔަގީންކަން ރައްޔިތުންގެ ނެތްކަން ފާހަގަކުރެވުނުކަމަށް ޙަލީމު ވިދާޅުވި އެވެ.
އެހެން ނަމަވެސް އޭނާ ވިދާޅުވީ، އޭރު ވެސް ރައީސް ޞާލިހު ރަށްތަކުގެ މެދުގައި ތަފާތު ނުކުރައްވާނެކަމުގެ ޔަގީންކަން އޮތްކަމަށާއި، އެމަނިކުފާނު ކޮށްދެއްވާނެކަމަށް ވިދާޅުވެއްޖެ ނަމަ ނުވަތަ ވައުދުފުޅެއް ވެއްޖެނަމަ އެ ވައުދު ފުޅު ފުއްދާދެއްވާނެކަމުގެ ޔަގީންކަން ވެސް އޮތްކަމަށެވެ.
"ރައީސުލްޖުމްޙޫރިއްޔާ ވިދާޅުވި ގޮތަށް މިރަށުގެ ބިން ހިއްކިގެންދާނެކަން އަޅުގަނޑު ޝައްކެއް ނުކުރަން. މިހާތަނަށް އަޅުގަނޑަށް އޮންނަ އެންމެ ބޮޑު ޔަގީންކަމަކީ ވެސް ރައީސުލްޖުމްހޫރިއްޔާ ވިދާޅުވެއްޖެއްޔާމު އެގޮތަކަށް އެކަން ހިނގާކަން. މީ އަޅުގަނޑު ދައްކާ ވާހަކައެއް ނޫން. މިއީ ރާއްޖޭގެ ހުރިހާ ކޮޅަކުން ވެސް ފެންނަން ހުރި ހަގީގަތެއް"
ބިލެއްދޫ މެމްބަރު ޙަލީމު
ޙަލީމު ވިދާޅުވީ މި ވެރިކަމުގައި ފީއައްޔަށް އައިސްފައިވާ ކުރިއެރުންތަކަށް ބަލާއިރު ރައީސް ޞާލިހަށް އޮތް އިތުބާރު އެތައް ގުނައަކަށް އިތުރުވެގެން ގޮސްފައިވާ ކަމަށެވެ. އޭނާގެ ވާހަކައިގައި ވަނީ ފީއަލީގައި މި ސަރުކާރުން ހިންގާ މަޝްރޫއުތަކަށް ވެސް އަލިއަޅުވާލައްވާފަ އެވެ.
އެގޮތުން ފީއަލީގައި ފެނާއި ކަރަންޓުގެ ޚިދުމަތް ގާއިމްކުރެވިގެންދާއިރު، ކޭބަލް ނެޓުވޯކެއް ގާއިމްކުރެވިފައިވާކަން ވެސް ޙަލީމު ފާހަގަކުރެއްވި އެވެ.
އަދި އައިސް ޕްލާންޓެއް ހަދައި، ފީއަލީގެ ބިން ހިއްކުމުގެ މަޝްރޫއަކީ ރައްޔިތުން އުންމީދުކޮށްގެން ތިބި މަޝްރޫއުތަކެއް ނޫން ކަމަށާއި، އަދި އެ މަސައްކަތްތަކުގެ ސަބަބުން ރަށުގެ ރައްޔިތުންނަށް އެތައް ގޮތަކުން ލުއި ފަސޭހަކަން ލިބިގެންދާނެކަމަށް ޤަބޫލުފުޅު ކުރައްވާކަމަށް ޙަލީމު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
