ޖަމިއްޔާތައް އުވާލަން ކުރި އިއުލާން ބާތިލްކޮށްފި!

ދިވެހިރާއްޖޭގައި ރަޖިސްޓަރީ ކޮށްގެން ހިންގަމުންދާ ޖަމްއިއްޔާތަކުގެ ތެރެއިން ލިޔެކިޔުންތައް ފުރިހަމަނުވާ ޖަމްއިއްޔާތައް އުވާލަން ނިންމައި މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވާމަންޓް އިން ކުރި އިއުލާން ބާތިލް ކޮށްފިއެވެ.

2023 ވަނަ އަހަރުގެ ނިޔަލަށް ވިދިވިދިގެން 2 އަހަރުގެ އަހަރީ ރިޕޯޓް ހުށަހަޅާފައި ނުވާތީ ނުވަތަ ހިންގާ ކޮމެޓީ ރަޖިސްޓްރީ ކޮށްފައި ނުވާތީ 1989 ޖަމިއްޔާ އުވާލުމަށް ނިންމާ، އެ ޖަމްއިއްޔާތަކުގެ ލިސްޓް ޔޫތު މިނިސްޓްރީން ވަނީ އިއްޔެ އިއުލާން ކޮށްފައެވެ.

އަދި މި ޖަމްޢިއްޔާތަކުގެ ތެރެއިން އެ ޖަމްޢިއްޔާއެއް އުވާލުން ހުއްޓުވައިދިނުމަށް އެދޭ ޖަމިއްޔާ ތަކުން، އެ ޖަމްޢިއްޔާގެ މެންބަރަކަށް ނުވަތަ މަޞްލަޙަތު އޮތް ތިންވަނަ ފަރާތަކަށް ޖަމްޢިއްޔާތަކުގެ ރަޖިސްޓްރާރ އަށް ލިޔުމުން ހުށަހެޅުމުގެ ފުރުޞަތު 24 ސެޕްޓެމްބަރ 2023 ވާ އަންގާރަ ދުވަހުގެ 14:00 އާއި ހަމައަށް އޮތްކަމުގައި ކަމަށްވެސް ޔޫތު މިނިސްޓްރީން ބުނެފައިވެއެވެ.

ޔޫތު މިނިސްޓްރީން ބުނީ، 24 ސެޕްޓެމްބަރު ގެ ނިޔަލަށް ލިޔުމުން ހުށަނާޅާ ޖަމްޢިއްޔާތައް، ޖަމްޢިއްޔާތަކުގެ ރަޖިސްޓްރީން އެ ޖަމްޢިއްޔާގެ ނަން އުނިކުރެވޭނެ ކަމަށެވެ.

ޔޫތު މިނިސްޓްރީގެ އެ ލިސްޓުގައި ފުޓުބޯޅަ ކްލަބް ތަކާއި، ވަރަށް އެކްޓިވް ދީނީ ޖަމިއްޔާ ތަކާއި ސިޔާސީ އެކި ފަރާތްތަކުގެ ފައުންޑޭޝަން ތައްވެސް ހިމެނެއެވެ. އޭގެތެރޭގައި، ވިކްޓްރީ ސްޕޯޓްސް ކްލަބް އާއި، ޖަމިއްޔަތުއް ސަލަފް އާއި މައުމޫން ފައުންޑޭޝަން ފާހަގަކޮށްލަންޖެހެއެވެ.

މިނިސްޓްރީގެ މި އިއުލާނާ ގުޅިގެން ރޭ ޔޫތު މިނިސްޓަރު އަޙްމަދު މަހުލޫފު ކުރެއްވި ޓުވީޓެއްގައި ވިދާޅުވީ، އޭނާއަށް ޖަމްއިއްޔާތައް އުވައިލަންކުރި އިއުލާނު ފެނުނީ ނޫސްތަކުން ކަމަށެވެ. އަދި އުވައިލަން އިއުލާނުކުރި ޖަމްއިއްޔާތަކުގެ ތެރޭގައި ޖަމްއިއްޔާތަކުގެ ރަޖިސްޓަރާގެ ދަށުގައި ނުހިމެނޭ ބައެއް ކުޅިވަރު އެސޯސިއޭޝަންތަކާއި ކުޅިވަރު ކުލަބުތައްވެސް ހިމެނޭ ކަމަށެވެ.

"އަދި ހަރަކާތްތެރިކޮށްފެންނަ ބައެއް ޖަމުޢިއްޔާތައްވެސް އެބަހިމެނޭ. މިކަމާއި ގުޅިގެން ބައެއް ފަރާތްތަކުގެ ކަންބޮޑުވުންވަނީ އަޅުގަނޑަށް ލިބިފަ. މިކަންކަން ބަލާ ރަނގަޅުކުރުމަށް ވާނީ ރިކުއެސްޓުކޮށްފަ." މަހުލޫފް ވިދާޅުވިއެވެ.

ޖަމިއްޔާތައް އުވާލަން ނިންމި އެ ނިންމުމާއި ގުޅިގެން ގިނަ ބައެއްގެ ފާޑުކިޔުންތައް ޔޫތު މިނިސްޓްރީއަށް އަމާޒުވަމުން ދަނިކޮށް، އެ މިނިސްޓްރީން ރޭ ކުރި އިއުލާނެއްގައި ވަނީ ޖަމިއްޔާތައް އުވާލަން ކުރި އިޢުލާން، ބާޠިލު ކުރަން ނިންމާފައިވާ ކަމަށެވެ. އަދި އެ ނިންމުން ނިންމީ، އިދާރީ ގޮތުން ބަލަންހުރި ކަންކަން އަދި ހުރުމުގެ ސަބަބުން ކަމަށްވެސް ބުނެފައިވެއެވެ.