ރައްޔިތުންނަށް ޚިދްމަތް ކުރުމުގެ ވިސްނުމެއް ނެތް ބަޔަކަށް ދެންވެސް އެކަމެއް ނުކުރެވޭނެ: ރައީސް ޞާލިޙް
ރައްޔިތުންނަށް ޚިދްމަތް ކުރުމުގެ ވިސްނުމެއް ނެތް ބަޔަކަށް ކުރިއަށް އޮތް ތަނުގައިވެސް ރައްޔިތުންނަށް ޚިދްމަތް ކޮށް ނުދެވޭނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ ރިޔާސީ އިންތިޚާބުގައި ތާއީދު ހޯއްދެވުމަށް ތ.އަތޮޅަށް ކުރައްވަމުން ގެންދަވާ ކެމްޕޭނު ދަތުރުފުޅުގައި ތ.ހިރިލަންދުއަށް ވަޑައިގެން އެރަށު ރައްޔިތުންނާއި އެކު ބޭއްވި ބައްދަލުވުމެއްގައި ވާހަކަދައްކަވަމުންނެވެ.
ރައީސް ޞާލިޙްގެ ވާހަކަފުޅުގައި ވިދާޅުވީ 2018ގެ އިންތިޚާބުގެ ކެމްޕޭނަށް ރައީސް ޔާމިން ހިރިލަންދުއަށް ވަޑައިގެންނެވުމުން އެރަށުގެ ބިން ހިއްކައިދިނުމަށް އެރަށުގެ ރައްޔިތުން އެދުމުން ހިރިލަންދޫގެ ފުއްޓަރު ފަރާތައް އަރާ ރާޅުގެ ބޮޑުކަމުން ރަށް ހިއްކެން ނެތް ކަމަށް ވިދާޅުވިކަމަށެވެ. އަދި އެކަމަކީ ތިމަންމަނިކުފާނަށް ކުރެއްވޭނެ ކަމެއް ނޫންކަށް ވިދާޅުވިކަމަށެވެ. ރައީސް ޞާލިޙް ވިދާޅުވީ އޭރު އެމަނިކުފާނަށް ލަފާ އަރުވަން ހުންނެވީ އޭރުގެ ހައުސިންގ އެންޑް ޕްލޭނިންގ މިނިސްޓަރު ކަމަށެވެ.
" މިއަދު ވެރިކަމަށް ނުކުމެ ވަޑައިގެން އެހުންނެވީ އެބޭފުޅާ، އެބޭފުޅާއަށް ވެރިކަން ލިބިވަޑައިގެންފިނަމަ ދެން ކަންވެގެންދާނެ ގޮތް ތިބޭފުޅުން ވިސްނަވާ، މިއިން ރަށެއްގައި ހިއްކާނެ ތަނެއް ނޯންނާނެ، ނުހިއްކޭނޭ ވިދާޅުވާނީ، ބަނދަރެއް ނުހެދޭނޭ ވިދާޅުވާނީ، ފެނާއި ނަރުދަމާއެއް ނޭޅޭނޭ ވިދާޅުވާނީ މިތަން ހަރުކަމުން ނުކޮނެވޭނޭ، ބަނދަރުގަ އޮތީ ގަލޭ އެތަނެއް ނުނެގޭނޭ، ފުނެއް ނުކުރެވޭނޭ" ރައީސް ޞާލިޙް ވިދާޅުވިއެވެ.
ރައީސް ވިދާޅުވީ މިއީ ވާދަވެރިންގެ ވިސްނުމާއި ޙިޔާލު ހުރިގޮތް ކަމަށާއި މިއަދުވެސް އެކަމަށް ބަދަލެއް ނާންނަކަމަށެވެ. ރައީސް ވިދާޅުވީ އިންތިޚާބުގައި ގޮތެއް ނިންމާއިރު މިކަމާއިމެދު ވިސްނަން ޖެހޭ ކަމަށެވެ.
"އުފާވެރި އަމާން ރާއްޖެ ހޯދައިދިނުމަށްޓަކައި އަޅުގަނޑުމެން ފެށި މަސައްކަތް އަދި ނިމުމަކަށް ނާދޭ، އަދި ކިރިޔާ މިރަށްރަށުގައި މީހުންނަށް ދިރިއުޅެވޭ ހިސާބަށް އަޅުގަނޑުމެންނަށް ކަންތައްތައް މިފުރިހަމަ ކޮށްދެވުނީ"
ރައީސް އިބްރާހިމް މުޙައްމަދު ޞާލިޙް
ރައީސް ވިދާޅުވީ އަސާސީ ކަންކަން ރަނގަޅަށް ރަށްރަށުގައި ހަމަނުވާ ކަމަށާއި، މިއީ އިންސާނުން އުޅުނު ވެރިން ވެރިކަން ކުރި ޤައުމެއް ކަމަށެވެ. ރައްޔިތުންގެ އަސާސީ ޚިދްމަތްތައް އޭރު ވެރިން ހަނދާން ނެތް ކަމަށެވެ.
"ދައުލަތުގައި ފައިސާވެސް ހުރި، ނަމަވެސް މަސައްކަތް ކުރުމުގެ ވިސްނުމެއް ނެތް ބަޔަކަށް، ރައްޔިތުންނަށް ޚިދްމަތް ކުރުމުގެ ވިސްނުމެއް ނެތް ބަޔަކަށް ދެނެއްވެސް ނުކުރެވޭނެ"
ރައީސް އިބްރާހިމް މުޙައްމަދު ޞާލިޙް
ރައީސް ވިދާޅުވީ އުފާވެރި އަމާން ރާއްޖެ އެއް ހޯދުމަށް މިފަށާ ދަތުރުގައި ކޮންމެ ރައްޔިތެއްގެ ވޯޓަކީވެސް ވަރަށް މުހިންމު ވޯޓެއް ކަމެށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
