ތިނަދޫއަކީ ސިޓީއަކަށް ހަދާނަން: ޑރ މުއިއްޒު
ޕްރިގްރެސިވް ކޮންގްރެސް ކޯލިޝަންގެ ވެރިކަމުގައި ގާނޫނަށް ގެންނަން ޖެހޭ ބަދަލުތައް ގެނެސްގެން ގދ ތިނަދޫއަކީ ސިޓީއަކަށް ހަދާނެކަމުގެ ޔަގީންކަން އެ ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ދެއްވައިފި އެވެ.
ޑރ މުއިއްޒު މިފަދައިން ވައުދުވެވަޑައިގެންފައި ވަނީ ގދ ތިނަދޫގައި ބޭއްވި އެމަނިކުފާނުގެ ރިޔާސީ ކެމްޕޭނު ޖަލްސާއެއްގައި ރައްޔިތުންނާއި މުޚާތަބުކުރައްވާ ވާހަކަފުޅުދައްކަވަމުން ނެވެ.
އެގޮތުން ޑރ މުއިއްޒު ވިދާޅުވީ ރައީސް ޔާމިނުގެ ޒައާމަތުގައި ތިނަދޫގައި 1 ބިލިއަން ރުފިޔާގެ ތަރައްގީގެ މަޝްރޫއުތައް ހިންގަވާފައިވާ ކަމަށެވެ. އަދި އެ ރަށަށް ބޭނުންވާ ވަރަށް ގިނަ ކަންތައްތަކެއް ފުރިހަމަކޮށްދެއްވާފައިވާ ކަމަށެވެ.
"މި ރަށުގެ ތަރައްގީއަށް އެންމެ ގިނަ މަސައްކަތް ކޮށްދެއްވީ އަޅުގަނޑުމެންގެ ތަރައްގީގެ ބާނީ ރައީސް ޔާމީން. 1 ބިލިއަނަށް ވުރެ ގިނަ ރުފިޔާގެ އެމަނިކުފާނުގެ 5 އަހަރުގެ ތެރޭގައި ކޮށްދެއްވާފައިވާކަން އަޅުގަނޑުމެންނަށް ފެންނަން އެބަހުރި. ބިން ހިއްކުމާއި، ހައުސިން ޕްރޮޖެކްޓުތަކާއި މަގުހެދުމާއި، އިސްލާމީ މަރުކަޒާއި، ދެން މިހެން ގޮސް ވަރަށް ގިނަ މަސައްކަތް އެ ވަނީ ކުރެވިފައި"
ޑރ މުހައްމަދު މުއިއްޒު
އެކަން ފާހަގަކުރައްވާ ޑރ މުއިއްޒު ވިދާޅުވީ ތިނަދޫގައި މިހާރު ގާއިމްކުރެވިފައިވާ ވަސީލަތްތަކަށް ބަލާއިރު، އާބާދީގައި 10000 މީހުން ހަމަވަންދެން ސިޓީއެއްގެ ދަރަޖަ ނުދީ ބޭއްވުމުގެ އެއްވެސް މާނައެއް ނެތް ކަމަށެވެ. މުހިންމީ ވަސީލަތްތައް ގާއިމުކޮށް ޚިދުމަތް ދިނުންކަން ޑރ މުއިއްޒު ފާހަގަކުރެއްވި އެވެ.
އެއާއެކު އެމަނިކުފާނު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި ގާނޫނަށް ގެންނަން ޖެހޭ ބަދަލުތައް ގެނެސްގެން ތިނަދޫއަކީ ސިޓީއެއްކަމަށް ކަނޑައަޅާ، ސިޓީއަކުން ލިބެން ޖެހޭގެ ޚިދުމަތްތައް އެ ރަށުގައި ގާއިމްކުރާނެ ކަމަށެވެ.
"ތިނަދޫގައި ސިޓީއަކަށް ބޭނުންވާނެ ހުރިހާ ކަމެއް މިވަނީ ގާއިމްކުރެވިފައި ރައީސް ޔާމިނުގެ ވެރިކަމުގައި. އެހެންވީމަ އަޅުގަނޑު ދޭ ޔަގީންކަމަކީ ތިބޭފުޅުން އަޅުގަނޑަށް އިތުބާރުކޮށް 9 ސެޕްޓެމްބަރުގައި އޮންނަ ވޯޓުގައި، އިންތިޚާބުގައި އިތުބާރު ކުރައްވައިފި ނަމަ އަޅުގަނޑުމެންގެ ސަރުކާރެއްގައި ގާނޫނުތަކަށް ގެންނަން ޖެހޭ ބަދަލު ގެނެސް ތިނަދޫއަކީ ސިޓީއެއް ކަމުގައި އިރާދަކުރެއްވިއްޔާ ކަނޑައަޅައިދޭނަން"
ޑރ މުހައްމަދު މުއިއްޒު
ސިޓީއަކަށް ވުމުން ތަރައްގީގެ މަޝްރޫއުތައް ހިންގުމަށް އިތުރު ފުރުސަތުތަކެއް ލިބިގެންދާނެކަމަށް ޑރ މުއިއްޒު ވިދާޅުވި އެވެ. އަދި އެ ހިސާބުން ރައްޔިތުންގެ އަތުގައި ހިފައިގެން ތިނަދޫ ތަރައްގީކުރުމުގެ މަސައްކަތްތައް ބާރަށް ކުރިއަށް ގެންގޮސްދެއްވާނެކަމަށް ޑރ މުއިއްޒު ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
