ހުޅުމާލޭ ފޭސް 2 ހިއްކަން ހަވާލުކުރީ އަޅުގަނޑު؛ ބްރިޖު އެޅުމުގައިވެސް ހިއްސާ ނެތްކަމަށް ނުވާނެ: ޑރ. ވަހީދު

ހުޅުމާލޭ ދެވަނަ ފިޔަވަހި ހިއްކުމުގެ މަސައްކަތަކީ އެމަނިކުފާނުގެ ވެރިކަމުގައި ސޮއި ކުރެވުނު މަޝްރޫޢު އެއް ކަމަށާ، އަދި ސިނަމާލޭ ބްރިޖުގެ މަޝްރޫއު ކުރިއަށް ގެންދިޔުމުގައިވެސް އެމަނިކުފާނުގެ ހިއްސާ ނެތް ކަމަށް ނުވާނެ ކަމަށް ކުރީގެ ރައީސް، ޑރ. މުހައްމަދު ވަހީދު ހަސަން މަނިކު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައި ވަނީ އއ ތޮއްޑޫގައި ބޭއްވި ޤާސިމް އިބްރާހިމްގެ ރިޔާސީ ކެމްޕޭނު ބައްދަލުވުމުގައި ވާހަކަދައްކަވަމުން ނެވެ.

އެގޮތުން ޑރ ވަހީދު ވިދާޅުވީ އެމަނިކުފާނަކީ މިހާރު އެއްވެސް މަގާމެއް ބޭނުންވެގެން އުޅޭ ބޭފުޅެއް ނޫން ކަމަށާ އެމަނިކުފާނަށް "މަޑު މަޑުން ގޭގައި ހުރެވިދާނެ" ކަމަށެވެ. އެހެން ނަމަވެސް ދިވެހިރާއްޖެ އަކީ އެމަނިކުފާނުގެވެސް ގައުމު ކަމަށާ، މި ގައުމު މިހާރު އޮތް ހިސާބަށް ގެނައުމުގައި އެމަނިކުފާނުގެ ހިއްސާވެސް އޮންނާނެ ކަމަށް ޑރ. ވަހީދު ވިދާޅުވި އެވެ. އަދި ކޮންމެ މީހަކު ކޮންމެ ނަމަކުން ގޮވި ނަމަވެސް ގައުމަށްޓަކައި އެމަނިކުފާނު ކަމެއް ކޮށް ނުދެއްވާ ކަމަށް ނުވާނެ ކަމަށްވެސް ވިދާޅުވި އެވެ.

"ކޮންމެ މީހަކު ކޮންމެ އެއްޗެއް ކިޔަސް، މި ގައުމުގެ ވައިގެ އެއާޕޯޓް ޖީއެމްއާރު އަތުން، އަޅުގަނޑު ނާތުލާ ކަމަކަށްވެސް ނުވާނެ. ކޮންމެ މީހަކު އެވާހަކަ ދެއްކިޔަސް. އަދި މާލޭ އަޅާފައި ތިއޮތް ބްރިޖު، އެޅުމުގައިވެސް، އޭގައިވެސް އަޅުގަނޑުގަ ހިއްސާއެއް ނެތް ކަމަކަށް ނުވާނެ. ލާމު އަތޮޅުގައި ހަދާފައި އެ އޮތް މަގުވެސް، އެހެން މީހަކު ހެދި އެއްޗަކަށް ނުހެދޭނެ."

ޑރ. މުހައްމަދު ވަހީދު ހަސަން މަނިކު

"އަދި ތި ބޭފުޅުން ހައިރާންވެ ވަޑައިގެންނަވާފާނެ އަޅުގަނޑު މިވާހަކަ ދެންނެވީމާ. އެއީ ހުޅުމާލޭގެ ދެވަނަ ފޭސް ހިއްކަންފެށީ، ހިއްކަން 59 މިލިއަން ޑޮލަރު ހަވާލުކުރީ ޖޫން މަހު. 2013 ވަނަ އަހަރު. އެ ފައިސާ، އެތަން ހިއްކަން ހަވާލުކުރިއިރު، އޭރުގެ ރައީސުލްޖުމްހޫރިއްޔާ އަކަށް އޭރުގައި ހުރީ އަޅުގަނޑު. އެކަމު އެތަން ހިއްކުމުގައިވެސް އަޅުގަނޑުގެ އެއްވެސް ރޯލެއް އޮތް ކަމަކަށް ނުވޭ. އެއީ އަޅުގަނޑު ސިޔާސީ ކަންކަމުން ދުރުގައި ހުރީމާ. އަޅުގަނޑުގެ ވާހަކަ ދައްކާނެ މީހަކު ނެތީ." ޑރ. ވަހީދު ވިދާޅުވި އެވެ.

ރައީސް ވަހީދު އިތުރަށް ވިދާޅުވީ، އެމަނިކުފާނަށް ލިބިލެއްވި ދެ އަހަރު ދުވަހުގެ ކުޑަ މުއްދަތުގެ ތެރޭގައި ވަރަށް ގިނަ ޚިދުމަތްތަކެއް ކޮށްދެއްވާފައިވާނެ ކަމަށެވެ. އެގޮތުން ރަށްރަށުގެ ބަނދަރު ހެދުމާއި، އެއާޕޯޓް ތައް އެޅުން ފަދަ ކަންކަން ކުރެއްވި ކަމަށް ވިދާޅުވި އެވެ. އޭގެ ތެރެއިން ތިމަރަފުށީ އެއާޕޯޓަކީ އެމަނިކުފާނުގެ ވެރިކަމުގައި ފަށައި އަދި ނިންމާފައިވާ އެއާޕޯޓެއް ކަން ޑރ. ވަހީދު ފާހަގަކުރެއްވިއެވެ.

އެހެންކަމުން، އެމަނިކުފާނާއި ދިމާއަށް ކާޅަށް ނޫނީ ބާޒަށް ގޮވި ނަމަވެސް އެ ހަގީގަތް ވާނީ ހަގީގަތަށް ކަމަށް ޑރ. ވަހީދު ވިދާޅުވި އެވެ.