އާރުޓީއެލް ފެރީ މަޝްރޫއާއެކު ވަޒީފާގެ ފުރުސަތު އިތުރުވެގެންދާނެ: އާޒިމް

ރާއްޖެ ޓްރާންސްޕޯޓް ލިންކު (އާރުޓީއެލް) ފެރީގެ ހިދުމަތުން ތަރައްގީ އާއި ވަޒީފާގެ ތަނަވަސްކަން އުފެދިގެންދާނެ ކަމަށް އެމްޓީސީސީގެ ސީއީއޯ އާދަމް އާޒިމް ވިދާޅުވެއްޖެއެވެ.

އާރުޓީއެލް ފެރީ ބޮޑުތިލަދުންމަތީގައި ރަސްމީކޮށް އިފުތިތާހުކުރުމަށް ހއ. ދިއްދޫގައި ރޭ ބޭއްވި ރަސްމިއްޔާތުގައި ވާހަކަދައްކަވަމުން އާޒިމް ވިދާޅުވީ، އެ މަޝްރޫއު އެއްކޮށް ނިމިގެންދާއިރު ގިނަ އަދަދެއްގެ ވަޒީފާތައް އުފެދިގެންދާނެ ކަމަށެވެ. އަދި ހަމައެހެންމެ އެ ފަރާތްތަކަށް ރަނގަޅު އާމްދަނީއެއްވެސް ލިބިގެންދާނެ ކަމަށް އާޒިމް ވިދާޅުވިއެވެ.

އާޒިމް ވިދާޅުވީ، މުޅި ރާއްޖެއަށް މި ހިދުމަތް ތައާރަފުވެގެންދާއިރު ފަޅުވެރިންނާއި ސަޕޯޓް ސްޓާފުންގެ ގޮތުގައި 800 އެއްހާ މުވައްޒަފުންނަށް ވަޒީފާ ލިބިގެންދާނެ ކަމަށާއި، އެއީ މުސާރައަށް ބަލައިލާނަމަ ގާތްގަނޑަކަށް 10،000 އާއި 18،000 އާ ދެމެދުގެ މުސާރައެއް ގެންދާނެ ބައެއް ކަމަށެވެ.

އާރުޓީއެލް ފެރީގެ ހިދުމަތް މުޅި ރާއްޖެއަށް ދެވޭއިރު ފްލީޓުގައި 82 ފެރީ އާއި ކޮންމެ ރަށެއްގައި ޓާމިނަލެއް އަދި ތިން ސަރަހައްދެއްގައި ފެރީގެ އުޅަނދުތަކަށް ހިދުމަތް ދޭނެ ބޯޓު ޔާޑެއް ހުންނާނެ ކަމަށް އާޒިމް ވިދާޅުވިއެވެ.

އާރްޓީއެލް ފެރީގެ ޒޯން އެކެއްގައި ހިމެނޭ 41 ރަށުން މިހާތަނަށް ބައިލައްކައަށް ވުރެ ގިނަ މީހުން ވަނީ މި ޚިދުމަތް ބޭނުންކޮށްފައެވެ.