ގޮނޑުހޮވައި މަގުމަތިވެގެން އުޅޭ ހާހެއްހާ ކުދިން މާލެ ސަރަހައްދުގައި އެބަތިބި: މޭޔަރު އާޒިމް

މާލެ ސަރަހައްދުގައި މަގުމަތިވެގެން އުޅޭ ހާހެއްހާ ކުދިން އެބަތިބިކަމަށް މާލެސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

މާލެސިޓީ ކައުންސިލުން މިއަދު ބެއްވި ބައްދަލުވުމުގައި ވާހަކަދައްކަވަމުން މޭޔަރު އާޒިމް ވިދާޅުވީ، މާލޭގެ އެކި ސަރަހައްދުތަކުގައި މަގުމަތިވެގެން އުޅޭ ކުށްކުރާ ހާހެއްހާ މީހުން އުޅެމުންދާކަމަށް ކަމާބެހޭ އިދާރާއިން މައުލޫމާތު ދީފައިވާކަމަށެވެ. އޭގެ ތެރެއިން ބައެއް މީހުންނަކީ ކުށްކުރުމުގެ ރެކޯޑް އޮންނަ ބައެއްނަމަވެސް އެފަދަ ފަރާތްތަކާމެދު ފިޔަވަޅު އެޅެމުން ނުދާކަމަށް މޭޔަރު ވިދާޅުވިއެވެ. މޭޔަރު ވިދާޅުވީ، މިކަމުގައި ފުލުހުންގެ އިދާރާވެސް ހަރުދަނާވާން ޖެހޭ ކަމަށާއި، ފުލުހުންގެ އިދާރާއަށް ބޭނުންވާ ވަސީލަތްތައްވެސް ދައުލަތުން ފުލުހުންނަށް ދޭންޖެހޭކަމަށެވެ.

އާޒިމް ވިދާޅުވީ މާލޭގެ މަގުތައްމަތީ އަދި އެތައް މިތަނުގައި ނިދައި ގޮނޑު ހޮވައިގެން އުޅޭކުދިން އެބަތިބިކަމަށާއި، އެކުދިން ގޮނޑުންތަކެތި ހޮވައިގެން ގެނެސް ބޭނުންނުވާތަކެތި މަގުތަކަށް އުކާލަމުންދާކަމަށެވެ. މޭޔަރު އާޒިމް ވިދާޅުވީ ގޮނޑުހޮވައިގެން އުޅޭކުދިން މި މުޖުތަމައުގައި އުޅެންޖެހިގެން ނުވާނޭކަމަށާއި ކައުންސިލާއި ދައުލަތާ ގުޅިގެން އެކުދިންނަށް ގޮތްތަކެއް ހޯދައިދޭން ޖެހޭކަމަށެވެ.

އެކުދިން ރިހެބިލިޓޭޓް ކޮށްފަ އަލުން މުޖުތަމައުއަށް ގެންނަން މަސައްކަތް ކުރަންޖެހޭ. އަބަދުވެސް މި އެކުދިން މާލެ ތެރޭ އެބައުޅޭ ތިމަންނަމެންނަށް އެ ކުދިންނަށް ފިޔަވަޅެއް ނޭޅޭ. ފިޔަވަޅު އަޅާކަށް ނޫން ބޭނުންވަނީ. އެމީހުން ޖަލަށް ލާކަށް ނޫން ބޭނުންވަނީ. ބޭނުންވަނީ އެމީހުން ރަނގަޅު ކުދިންނަށް ހަދައިދީ މުޖުތަމައުއަށް ނެރެން

މޭޔަރު އާޒިމް

އާޒިމް ވިދާޅުވީ މާލެ ސަރަހައްދުގައި އުޅޭ މިފަދަ ކުދިން އަލުން މުޖުތަމައުއަށް ނެރުމަށް އެންޑީއެމްއޭ އާއި ފުލުހުންނާއި، މާލެސިޓީ ކައުންސިލް އަދި ސަރުކާރު ގުޅިގެން މަސައްކަތްތަކެއް ކުރަންޖެހޭކަމަށެވެ. މި ހުރިހާ އެންމެންވެގެން ރަނގަޅު ނިޔަތެއްގައި މަސައްކަތް ކޮށްފިނަމަ އެންހާސްކުދިން އަލުން މުޖުތަމައުއަށް ނެރުމަކީ އުނދަގޫ ކަމަކަށް ނުވާނޭކަމަށް މޭޔަރު ވިދާޅުވިއެވެ. އެގޮތުން އެކުދިން ގޯސްކޮށް މިހެން ދާނަމަ ކަންކަން ރަނގަޅު ވެގެން ނުދާނޭކަމަށާއި، އެ އެންހާސްކުދިން ރަނގަޅު ކުރެވިއްޖެނަމަ މާލޭގެ ވެއްޓަށް ހެޔޮ ބަދަލެއް އަންނާނޭކަމަށްވެސް މޭޔަރު ވިދާޅުވިއެވެ.

މާލެ ސަރަހައްދުގައި މަގުމަތިވެގެން އުޅޭ ކުށަށް އަރައިގަންނަ މީހުން ރަނގަޅުކުރުމަށް ޕްރޮގްރާމްތަކެއް ހިންގަންޖެހޭކަމަޑް މޭޔަރު ވިދާޅުވިއިރު، ކުނި ޑަސްބިންތައް ހޮވުމާއި އެކި ސަރަހައްދުގައި ނިދާހަދާ މީހުންގެ އަދަދު މިހާރު ވަރަށްބޮޑަށް އިތުރުވަމުން އަންނަކަން އާއްމުން ފާަހގަކުރެއެވެ. މީގެ ތެރެއިން ބައެއް މީހުން މިސްކިތްތަކުގައި ނިދުމާއި މިސްކިތު ފާހާނާތައް ބޭނުންކޮށް ހަޑިކުރާ މައްސަލަވެސް ފެންމަތިވެފައި އެބަހުއްޓެވެ. މިކަމާހެދި މިސްކިތްތަކުގެ ފާހާތައް ތަޅުލައި ހެދުމުން މިސްކިތްތަކަށް ގެއްލުންދޭކަންވެސް ފާހަގަކޮށްލެވެއެވެ.