މާލެސިޓީ ކައުންސިލުގެ ދަށުގައި އޮތް 14 ބިމެއް ދައުލަތަށް ނެގުމާ ދެކޮޅު ގަރާރު ބޭރުކޮށްލައިފި

މާލޭ ސިޓީ ކައުންސިލްގެ ބެލެނިވެރިކަމުގައި ހުރި 14 ބިމެއް ދައުލަތުގެ މިލްކިއްޔާތަށް ބަދަލުކުރަން ހައުސިންގ މިނިސްޓްރީން ނިންމި ނިންމުމާ ދެކޮޅަށް ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް ރައްޔިތުންގެ މަޖިލީހަށް ހުށަހެޅުއްވި ގަރާރު، ބޭރުކޮށްލައިފިއެވެ.

މިއަދު ބޭއްވި ޖަލްސާގައި ވޯޓުގައި ބައިވެރިވެވަޑައިގެންނެވި 63 މެންބަރުންގެ ތެރެއިން 52 މެންބަރުން ވޯޓު ދެއްވީ ގަރާރަށް ބަހުސް ކުރުމާ ދެކޮޅަށެވެ. ގަރާރާ އެއްކޮޅަށް ވޯޓު ދެއްވީ 11 މެންބަރުންނެވެ.

މީކާއީލްގެ ގަރާރުގައި ފާހަގަކޮށްފައިވާ ގޮތުގައި، ޤައުމީ މަޝްރޫޢުތަކަށް ކައުންސިލެއްގެ ސަރަޙައްދުން ބިން ނެގުމުގެ ބާރު މިނިސްޓަރުންގެ މަޖިލީހަށް ލިބިދީފައި އޮތް ނަމަވެސް، ލާމަރުކަޒީ ޤާނޫނުގައި އެކަމަށް ކަނޑައެޅިފައިވާ އިޖުރާއަތުތަކެއް ފުރިހަމަ ކުރަން ޖެހެއެވެ. އެ ގޮތުން ބިން ވަކިކުރުމުގެ ކުރިން ހިންގާ މަޝްރޫޢުގެ ތަފުސީލު ކައުންސިލާ ހިއްސާކޮށް، ކައުންސިލުގެ ޚިޔާލު ހޯދަން ޤާނޫނުގައި ލާޒިމުކޮށްފައިވެއެވެ.

ނަމަވެސް ހައުސިންގ މިނިސްޓްރީން މި ނިންމުން ނިންމީ ސިޓީ ކައުންސިލާ އެއްވެސް މަޝްވަރާއެއް ކުރުމެއް ނެތި، ބިންތަކުގައި ހިންގާނެ މަޝްރޫޢުތަކުގެ ނަން ފިޔަވައި އެހެން ތަފުސީލެއް ހާމަ ނުކޮށް ކަމަށް ގަރާރުގައި ބުނެފައިވެއެވެ. މީގެ އިތުރުން، މި ބިންތަކަކީ މިސްކިތްތައް ބެލެހެއްޓުމާއި އިދާރީ ހިންގުމުގެ ޚަރަދުތައް ހަމަޖެއްސުމަށް ކައުންސިލަށް އާމްދަނީ ލިބެމުން އައި ބިންތައް ކަމުން، އެ ބިންތައް ނެގުމުން ކައުންސިލުގެ މާލީ ހާލަތަށް ބޮޑެތި ގެއްލުންތައް ލިބޭނެ ކަމަށް ވެސް ގަރާރުގައި ބަޔާންކޮށްފައިވެއެވެ.

ގަރާރުގައި އިތުރަށް ފާހަގަކޮށްފައިވާ ގޮތުގައި، ތޮއްޖެހުން ކުޑަކުރުމަށް ޕާކިންގ އިމާރާތްތަކާއި ހިތްފަސޭހަ މައިޒާންތައް ތަރައްޤީކުރުމުގެ ޕްލޭންތައް ކައުންސިލުން އެކުލަވާލަމުން ދަނިކޮށް ސަރުކާރުން މިފަދަ ނިންމުމެއް ނިންމުމަކީ މާލޭ ރައްޔިތުންނަށް ލިބޭ ގެއްލުމެއް ކަމަށާއި، ލާމަރުކަޒީ ނިޒާމަށް ހުރަސް އެޅޭނެ ކަމެއް ކަމަށެވެ.