ތާރީޚީ ކާމިޔާބީއެއް: އެމެރިކާގެ ސެނެޓަށް އިންތިޚާބުވި ފުރަތަމަ މުސްލިމަކަށް ޢަބްދުލް އަލް-ސައްޔިދު

އެމެރިކާގެ މިޝިގަން ސްޓޭޓުން ވާދަކުރައްވައި، ޑިމޮކްރެޓިކް ޕާޓީގެ ކެންޑިޑޭޓް ޢަބްދުލް އަލް-ސައްޔިދު އެމެރިކާގެ ސެނެޓުގެ ގޮނޑި ކާމިޔާބު ކުރައްވައި، އެ ގައުމުގެ ތާރީޚުގައި ސެނެޓަށް އިންތިޚާބުވި ފުރަތަމަ މުސްލިމް ބޭފުޅާގެ ޝަރަފު ހޯއްދަވައިފިއެވެ. މި އިންތިޚާބުގައި އޭނާ ވަނީ ރިޕަބްލިކަން ޕާޓީގެ ކެންޑިޑޭޓް މައިކް ރޮޖާސްގެ މައްޗަށް ކުރި ހޯއްދަވާފައެވެ.

ކުރިން ވޭން ކައުންޓީގެ ހެލްތު ޑިރެކްޓަރުގެ މަގާމު ފުރުއްވި އަލް-ސައްޔިދު މި އިންތިޚާބުގެ ޓިކެޓް ހޯއްދެވީ ޑިމޮކްރެޓިކް ޕްރައިމަރީގައި ވަރަށް ވާދަވެރި އަދި ގިނަ ޚަރަދުތަކެއް ހިނގި ކެމްޕޭނަކަށްފަހު، ހޭލީ ސްޓީވަންސް ކުޑަ ތަފާތަކުން ބަލިކުރެއްވުމަށްފަހުގައެވެ. ނަމަވެސް، ޕާޓީގެ އެތެރޭގެ ޚިޔާލުތަފާތުވުންތަކުގެ ތެރެއިން، އާދީއްތަ ދުވަހު ސްޓީވަންސް ވަނީ އަލް-ސައްޔިދުގެ ކެމްޕޭންގައި "ނަފުރަތު" އުފައްދާ ކަމަށް ބުނެ ފާޑުކިޔައި، އިދިކޮޅު ކެންޑިޑޭޓް ރޮޖާސްއަށް ތާއީދުކުރަން ނިންމިކަން ހާމަކޮށްފައެވެ.

އިންތިޚާބު ކާމިޔާބު ކުރެއްވުމަށްފަހު ސަޕޯޓަރުންނާ މުޚާޠަބު ކުރައްވައި ވާހަކަދައްކަވަމުން އަލް-ސައްޔިދު ވަނީ، އޭނާގެ ކެމްޕޭނުގައި އެންމެ ބޮޑަށް އަޑުއުފުލި ކަންކަން ކަމުގައިވާ، ދިރިއުޅުމުގެ ޚަރަދުތައް ކުޑަކުރުމާއި، ސިޔާސީ ކަންކަމަށް ނުފޫޒު ފޯރުވާ ފައިސާ ހުއްޓުވުމާއި، "މެޑިކެއަރ ފޮރ އޯލް" ފާސްކުރުމުގެ އިތުރުން ބޭރުގެ ހަނގުރާމަތަކަށް އެމެރިކާއިން ފައިސާ ޚަރަދުކުރުން ހުއްޓާލުމަށް އަނެއްކާވެސް ގޮވާލައްވާފައެވެ.

"ރައްޔިތުން ދައްކާ ޓެކްސް ފައިސާއަކީ އެހެން ބައެއްގެ ބޮލަށާއި އެމީހުންގެ ދަރިންގެ ގަޔަށް ބޮންއެޅުމުގެ ބަދަލުގައި، ތިޔަބޭފުޅުންނާއި ތިޔަބޭފުޅުންގެ ދަރިންގެ ލާބައަށް ޚަރަދުކުރެވޭ އެއްޗެއްކަން އެނގުމަކީ މިހާ އުނދަގޫ ކަމަކަށް ވެގެން ނުވާނެ،" އަލް-ސައްޔިދު ވިދާޅުވިއެވެ.

ކެމްޕޭނުގެ ތެރޭގައި އިސްލާމޮފޯބިއާ އަދި ނަސްލީގޮތުން ފުރައްސާރަކުރެއްވި ކަމަށް ބުނެ، ރައީސް ޑޮނަލްޑް ޓްރަމްޕަށާއި ނައިބު ރައީސް ޖޭޑީ ވެންސްއަށް ވެސް އޭނާ ވަނީ ރައްދު ދެއްވާފައެވެ.

"ޓްރަމްޕަށް، އަހަރެންގެ ނަން ކިޔަން އުނދަގޫވިކަން އެނގޭ. އެހެންވީމާ ޖެނުއަރީ މަހު ޖޭޑީ އަހަރެން މަގާމުގެ ހުވާކުރުވުމުން، ދެން އަހަންނަށް 'ސެނެޓަރ' އޭ ކިޔަސް އެންމެ ރަނގަޅު،" އޭނާ ވިދާޅުވިއެވެ.

މިޝިގަން ސްޓޭޓުން 1994 ވަނަ އަހަރުގެ ފަހުން އެއްވެސް ރިޕަބްލިކަން ކެންޑިޑޭޓަކު ސެނެޓް ގޮނޑިއެއް ކާމިޔާބު ކޮށްފައެއް ނުވެއެވެ. ނަމަވެސް ދެ ދައުރު ފުރިހަމަކުރެއްވި ޑިމޮކްރެޓިކް ސެނެޓަރު ގޭރީ ޕީޓާސް ރިޓަޔަރ ކުރެއްވުމާ ގުޅިގެން، މިއީ ސެނެޓުގެ އަޣުލަބިއްޔަތު ހޯދުމަށް ދެ ޕާޓީގެ މެދުގައި ވަރަށް ވާދަވެރި އަދި އިޝްތިހާރުތަކަށް އެކަނިވެސް 100 މިލިއަނަށް ވުރެ ގިނަ ޑޮލަރު ޚަރަދުވި ރޭހެކެވެ. މި ކާމިޔާބީއާ ގުޅިގެން އަލް-ސައްޔިދު ވިދާޅުވީ، ފައިސާއާއި ގިނަ ރައްޔިތުންނާ ދެމެދު ހިނގި މި ހަނގުރާމައިގައި، އާންމު ރައްޔިތުންނަށް ކާމިޔާބު ހޯދިދާނެކަން ސާބިތުކޮށްދެވިއްޖެ ކަމަށެވެ.