ޣައްޒާގައި ވޮލަންޓިއަރެއްގެ ގޮތުގައި ޚިދުމަތްކުރެއްވި ޑރ. އާދަމް ޙަމަވީ އެމެރިކާގެ ކޮންގްރެސްގެ ގޮނޑިއެއް ކާމިޔާބު ކުރައްވައިފި

ޣައްޒާގެ ޤަތުލްޢާއްމުގައި ޒަޚަމްވާ މީހުންނަށް ފަރުވާ ދިނުމަށް ވޮލަންޓިއަރެއްގެ ގޮތުގައި ޚިދުމަތް ދެއްވި ޑޮކްޓަރު، ޑރ. އާދަމް ޙަމަވީ، އެމެރިކާގެ ހައުސް އޮފް ރެޕްރެޒެންޓެޓިވްސްގެ ގޮނޑިއެއް ކާމިޔާބު ކުރައްވައި ތާރީޚުގެ ތެރެއިން ޖާގަ ހޯއްދަވައިފިއެވެ.

ޑިމޮކްރެޓިކް ޕާޓީގެ ފަރާތުން ނިއު ޖާޒީގެ 12 ވަނަ ކޮންގްރެޝަނަލް ޑިސްޓްރިކްޓަށް ވާދަކުރެއްވި އުމުރުން 57 އަހަރުގެ ޙަމަވީ މި އިންތިޚާބު ކާމިޔާބު ކުރެއްވީ ރިޕަބްލިކަން ޕާޓީގެ ކެންޑިޑޭޓް ގްރެގް މެލޭއާ ވާދަކުރައްވައެވެ. އެސޯސިއޭޓެޑް ޕްރެސް (އޭޕީ) އިން ރިޕޯޓްކޮށްފައިވާ ގޮތުގައި، ވޯޓުގެ 80 އިންސައްތަ ގުނިފައިވާއިރު ޙަމަވީ ވަނީ ވޯޓުގެ %70.8 ކާމިޔާބު ކުރައްވާފައެވެ. މިއާއެކު، އޭނާ ވެގެން ގޮސްފައިވަނީ ނިއު ޖާޒީން އެމެރިކާގެ ހައުސްއަށް އިންތިޚާބުވި ފުރަތަމަ މުސްލިމް އަދި ފުރަތަމަ އަރަބި ދަރިކޮޅުގެ މެންބަރަށެވެ. އަދި އޭނާއަކީ އެމެރިކާގެ ކޮންގްރެސްގައި ޚިދުމަތް ކުރައްވާ މިސްރު ދަރިކޮޅުގެ ދެވަނަ ބޭފުޅާއެވެ.

އެމެރިކާގެ އަސްކަރިއްޔާގައި ކުރިން ސާޖަންއެއްގެ ގޮތުގައި މަސައްކަތް ކުރެއްވި ޙަމަވީ، އޭނާގެ ކެމްޕޭނުގައި އެންމެ ބޮޑު އިސްކަމެއް ދެއްވީ ހަނގުރާމައިގެ މައިދާންތަކުގައި ބަލިމީހުންނަށް ފަރުވާ ދިނުމުގައި ލިބިވަޑައިގެންނެވި ތަޖުރިބާތަކުގެ މައްޗަށެވެ. ޚާއްޞަކޮށް، އިސްރާއީލުން ޣައްޒާއަށް ދެމުންދާ ލާއިންސާނީ ޙަމަލާތަކާ ގުޅިގެން، 2024 އަދި 2025 ވަނަ އަހަރު ޕަލަސްޓީނިއަން އެމެރިކަން މެޑިކަލް އެސޯސިއޭޝަނާއި ޑަބްލިއުއެޗްއޯ ގުޅިގެން ކުރިއަށްގެންދިޔަ މެޑިކަލް މިޝަންތަކުގައި އޭނާ ވަނީ ޣައްޒާގެ ރައްޔިތުންނަށް ފަރުވާ ދެއްވުމުގައި އިސް ދައުރެއް އަދާކުރައްވާފައެވެ.

"އަހަރެން ޣައްޒާއަށް ދިޔައީ ސާޖަންއެއްގެ ގޮތުގައި. އެނބުރި އައީ، އަހަރެންނަށް އެތަނުން ފެނުނު ކަންކަމަށް ވެރިކަމުގެ ބާރުތަކުގައި ތިބި މީހުންނަށް ދެން އިތުރަށް ލޯމަރާލައިގެން ނުތިބެވޭނެކަން ކަށަވަރުކުރުމުގެ ވަރުގަދަ އަޒުމާއެކު،" 2026 ވަނަ އަހަރުގެ ޖޫން މަހު 'މުސްލިމް.ކޮމް' އަށް ދެއްވި އިންޓަވިއުއެއްގައި ޙަމަވީ ވިދާޅުވެފައިވެއެވެ.

ފާއިތުވި 30 އަހަރުގެ ތެރޭގައި ޙަމަވީ ވަނީ ދުނިޔޭގެ އެކި ކަންކޮޅުތަކުގައި ހިނގި ހަމަނުޖެހުންތަކާއި ކާރިސާތަކުގައި، އިންސާނީ އެހީތެރިކަން ފޯރުކޮށްދެއްވައި ވޮލަންޓިއަރެއްގެ ގޮތުގައި މަސައްކަތް ކުރައްވާފައެވެ. އޭގެ ތެރޭގައި ހައިޓީ، ސޫދާން، ސީރިއާ، ލުބުނާން، އުރުދުން، ތުރުކީ، ބޮސްނިއާ އަދި ކޮލަމްބިއާ ފަދަ ޤައުމުތައް ހިމެނެއެވެ. އަދި އިރާޤު ހަނގުރާމައިގެ ދުވަސްވަރު ބަޣުދާދުގައި ހުންނަ އަސްކަރީ ހޮސްޕިޓަލުގައިވެސް 9 މަސްދުވަހު އޭނާ މަސައްކަތް ކުރެއްވިއެވެ.

ޚާރިޖީ ސިޔާސަތާ ގުޅޭގޮތުން ވާހަކަދައްކަވަމުން ޙަމަވީ ވަނީ އިސްރާއީލަށް އެމެރިކާއިން ދޭ އަސްކަރީ އެހީތައް ވަގުތުން ހުއްޓާލުމަށް ގޮވާލައްވާފައެވެ. އަދި އިންސާނީ ޙައްޤުތަކަށް އަރައިގަންނަ އެއްވެސް ޤައުމަކަށް އެމެރިކާއިން އަސްކަރީ އެހީ ދިނުމާ ދެކޮޅު ކަމަށް އޭނާ ވިދާޅުވިއެވެ. މީގެއިތުރުން، އީރާނާ ދެކޮޅަށް ހިންގާ ހަނގުރާމައަކީ ޣައިރު ޤާނޫނީ އަދި އަޚްލާޤީ ގޮތުން ބަލައިގަނެވޭނެ ކަމެއް ނޫން ކަމަށް ސިފަކުރައްވައި، އެމެރިކާގެ ސަރުކާރުން އައިޕެކް (AIPAC) ފަދަ ޖަމާއަތްތަކާއި އިސްރާއީލުގެ މަސްލަހަތުތަކަށް އިސްކަންދޭ ކަމަށް ވިދާޅުވެ އޭނާ ވަނީ ވަރަށް ބޮޑަށް ފާޑުވިދާޅުވެފައެވެ.