އަންނަ އަހަރަށް ލަފާކޮށް 59.7 ބިލިއަން ރުފިޔާގެ ބަޖެޓެއް ހުށަހަޅައިފި

2027 ވަނަ އަހަރަށް ލަފާކޮށް ޖުމްލަ 59.7 ބިލިއަން ރުފިޔާގެ ބަޖެޓެއް ހުށަހަޅައިފިއެވެ. މިއީ 2026 ވަނަ އަހަރަށް ފާސްކުރި ބަޖެޓާ އަޅާބަލާއިރު 4.5 ބިލިއަން ރުފިޔާ ދަށް އަދަދެކެވެ.

މަޖިލީހުގެ މިއަދުގެ ޖަލްސާގައި ދައުލަތުގެ ބަޖެޓު ހުށަހަޅުއްވައިދެއްވީ މާލީ ވަޒީރު ޙަސަން ޒަރީރެވެ.

2027 ވަނަ އަހަރަށް ލަފާކޮށް ސަރުކާރުން ހުށަހަޅާފައިވަނީ 59,704,440,795 (ފަންސާސް ނުވަ ބިލިއަން، ހަތްސަތޭކަ ހަތަރު މިލިއަން، ހަތަރުލައްކަ ސާޅީސްހާސް ހަތް ސަތޭކަ ނުވަދިހަ ފަސް) ރުފިޔާގެ ބަޖެޓެކެވެ.

ހުށަހެޅުނު ބަޖެޓުގެ ތަފުސީލު ދެއްވަމުން ވަޒީރު ވިދާޅުވީ، މި ބަޖެޓުގެ ތެރެއިން ދައުލަތުގެ ޖުމްލަ ޚަރަދުގެ ގޮތުގައި ހިނގާނީ 52.6 ބިލިއަން ރުފިޔާ ކަމަށެވެ. އޭގެ ތެރޭގައި ހިންގުމުގެ ޚަރަދު ނުވަތަ ރިކަރަންޓް ޚަރަދުގެ ގޮތުގައި 42.7 ބިލިއަން ރުފިޔާ ހިމެނޭއިރު، ތަރައްޤީގެ މަޝްރޫޢުތަކާއި އިންވެސްޓްމަންޓްތައް ހިމެނޭ ކެޕިޓަލް ޚަރަދުގެ ގޮތުގައި ކަނޑައަޅާފައިވަނީ 9.9 ބިލިއަން ރުފިޔާއެވެ. އަދި ތަރައްޤީގެ މަޝްރޫޢުތައް ކުރިއަށް ގެންދިއުމަށްޓަކައި ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) އަށް 8.2 ބިލިއަން ރުފިޔާ ވަނީ ކަނޑައަޅާފައެވެ.

އާމްދަނީގެ އަންދާޒާތަކަށް އަލިއަޅުއްވާލައްވަމުން ވަޒީރު ވިދާޅުވީ، 2027 ވަނަ އަހަރު އާމްދަނީއާއި ހިލޭ އެހީގެ ގޮތުގައި 43.2 ބިލިއަން ރުފިޔާ ލިބޭނެ ކަމަށް ލަފާކުރެވޭ ކަމަށެވެ. މިއީ 2026 ވަނަ އަހަރާ އަޅާބަލާއިރު 1.4 ބިލިއަން ރުފިޔާގެ އިތުރުވުމެކެވެ. މެދުރާސްތާގައި ދައުލަތުގެ އާމްދަނީ އިތުރުވަމުންދާނެ ކަމަށް ލަފާކުރައްވައި ވަޒީރު ވިދާޅުވީ، 2028 ވަނަ އަހަރު 46.6 ބިލިއަން ރުފިޔާ އަދި 2029 ވަނަ އަހަރު 49.7 ބިލިއަން ރުފިޔާ ލިބޭނެ ކަމަށް އަންދާޒާކުރެވޭ ކަމަށެވެ.

ވަޒީރު ފާހަގަކުރެއްވި ގޮތުގައި، އަންނަ އަހަރު އާމްދަނީ އިތުރުކުރުމަށްޓަކައި ރައްޔިތުން އަތުން ނަގާ އެއްވެސް ޓެކުހެއް މަތިނުކުރުމަށް ސަރުކާރުން ވަނީ ނިންމާފައެވެ. އޭގެ ބަދަލުގައި ސަރުކާރުގެ ވިސްނުމަކީ ޓެކްސް ނިޒާމު ހަރުދަނާކޮށް، ނިޒާމުގައި ހުރި ބާގަނޑުތައް ބައްދައި، ގާނޫނުތަކަށް އަމަލުކުރާ މިންވަރު އިތުރުކުރުމެވެ.

މިގޮތުން، މި އަހަރު ތަޢާރަފުކުރި "މޯލްޑިވްސް ގެސްޓް އިންފޮމޭޝަން ސިސްޓަމް" ގެ ބޭނުން އިތުރަށް ފުޅާކުރުމަށާއި، ބައިނަލްއަޤްވާމީ މިންގަނޑުތަކާ އެއްގޮތަށް ޒަމާނީ "އީ-އިންވޮއިސިންގ" ނިޒާމެއް ތަޢާރަފުކުރުމަށް ވަނީ ނިންމާފައެވެ. މީގެ ސަބަބުން ދައުލަތަށް ލިބެންޖެހޭ ޓެކުހުގެ ފައިސާ ފުރިހަމައަށް ލިބިގެންދާނެ ކަމަށް ވަޒީރު ވިދާޅުވިއެވެ.

މީގެއިތުރުން، އާމްދަނީގެ ސިޔާސަތުތައް ތަންފީޒުކުރުން ހަރުދަނާކޮށް، ގަވާއިދުތަކަށް ބޯލެނބުން އިތުރުކުރުމުގެ މަސައްކަތް އަވަސްކުރުމަށްޓަކައި، މޯލްޑިވްސް ކަސްޓަމްސް ސަރވިސްގެ ފިސްކަލް މެންޑޭޓް ފިނޭންސް މިނިސްޓްރީން ބަލަހައްޓާ ގޮތަށް ބަދަލުކުރުމަށާއި، ޓެކުހާ ގުޅޭ ޤާނޫނުތަކަށް އިސްލާހު ގެނައުމަށް މި ބަޖެޓުގައި ވަނީ ހިމަނާފައެވެ.