އާރްޓީއެލް ފެރީގެ ޚިދުމަތް ރައްޔިތުން ބޭނުންވާ ފެންވަރަށް ގެނެސްދޭނަން: ރައީސް މުޢިއްޒު
އާރްޓީއެލް ފެރީގެ ޚިދުމަތަކީ ރައްޔިތުން ބޭނުންވާ ފެންވަރުގައި ދެވޭ ހިތްފަސޭހަ ޚިދުމަތަކަށް ހެއްދެވުމަށް މަސައްކަތްކުރައްވަމުން ގެންދަވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ނޫސްވެރިންގެ ބައްދަލުވުމެއްގައި ނޫސްވެރިޔަކު ކުރެއްވި ސުވާލަކަށް ޖަވާބުދެއްވަމުން ރައީސް ވިދާޅުވީ މި ޚިދުމަތް މުޅި ރާއްޖެއަށް ގުޅައިލުމުގެ މަސައްކަތް ކަނޑައެޅި ތާވަލާ އެއްގޮތަށް ނުނިމި ލަސްވެފައިވާ ކަމަށެވެ.
އެކަން ލަސްވީ މެދުއިރުމަތީގެ ހަނގުރާމައާ ގުޅިގެން ރާއްޖެއަށް ކުރިމަތިވި ދަތިތަކުގެ ސަބަބުން ފައިސާ ޚަރަދުކުރުމުގައި އިސްކަންދޭ ތަރުތީބު ކަނޑައަޅަން ޖެހުމުން ކަމަށް އެމަނިކުފާނު ވިދާޅުވިއެވެ.
"އާރްޓީއެލް ޚިދުމަތަކީ ރާއްޖޭގެ ހުރިހާ އަތޮޅެއްގައި ގާއިމުކުރަން މަސައްކަތްކުރާކަމެއް. ކަނޑައެޅި ޓާގެޓަށް ނިންމުމުގަ ޑިލޭތަކެއް އައިއްސި. ހަނގުރާމައިގެ ހާލަތުގަ ރާއްޖެއަށް ވެސް ދިމާވި ދަތިތައް ފައިސާ ޚަރަދުކުރުމުގަ އިސްކަންދޭންޖެހޭ ތަރުތީބު ކަނޑައެޅުމުގައި. ބައެއް ކަންކަން މަޑުޖެހިފައި އެބަހުރި. އަޅުގަނޑުމެން މި ބަލަނީ އާރްޓީއެލް ޚިދުމަތަކީ ހިތްފަސޭހަ ޚިދުމަތަކަށް ހަދަން. މީހުން ބޭނުންވާ ފެންވަރުގަ އަވަހަށް ރަނގަޅަށް ދެވޭ ޚިދުމަތަކަށް ހެދުމަށް" ރައީސް ވިދާޅުވިއެވެ.
2022 ވަނަ އަހަރު ފެށި މި ޚިދުމަތް މިހާތަނަށް 15 އަތޮޅެއްގައި ވަނީ ޤާއިމުކޮށްފައެވެ. މިހާރު 35 ލޯންޗު ބޭނުންކުރަމުން އަންނައިރު އިތުރު 12 ލޯންޗު ބަނުމުގެ މަސައްކަތް ދަނީ ކުރެވެމުންނެވެ.
މި ޚިދުމަތް ރާއްޖޭގެ 145 ރަށަކަށް ލިބެމުން އަންނައިރު މުޅި ރާއްޖޭގައި ޚިދުމަތް ފެށުމަށް ފަހު ދެން ފަށާނީ އެއް އަތޮޅުން އަނެއް އަތޮޅާ ގުޅުވައިލުމުގެ މަސައްކަތް ކަމަށް ދަތުރުފަތުރާ ބެހޭ ވުޒާރާއިން ވަނީ ވިދާޅުވެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
