ޖީ.ސީ.އެފްގެ ޑައިރެކްޓް އެކްސެސް އެންޓިޓީއެއްގެ ގޮތުގައި އެމް.އެފް.އެލް.ސީ ފާސްކޮށް، ރާއްޖެއިން ތާރީޚީ ކާމިޔާބީއެއް ހާސިލުކޮށްފި

ޖީ.ސީ.އެފްގެ ޑައިރެކްޓް އެކްސެސް އެންޓިޓީއެއްގެ ގޮތުގައި އެމް.އެފް.އެލް.ސީ ފާސްކޮށް، ރާއްޖެއިން ތާރީޚީ ކާމިޔާބީއެއް ހާސިލުކޮށްފިއެވެ.

މިއީ ދިވެހިރާއްޖެއިން މޫސުމަށް އަންނަ ބަދަލުތަކަށް ހޭނުމަށާއި، ޖައްވަށް ބޭރުވާ ވިހަ ގޭހުގެ މިންވަރު ކުޑަކުރުމަށް ކުރަމުންދާ މަސައްކަތްތަކަށް ބައިނަލްއަޤްވާމީ ފަންޑުތަކުން ސީދާގޮތެއްގައި މާލީ އެހީތެރިކަން ހޯދުމަށް ކުރަމުންދާ މަސައްކަތުގައި ތާރީޚީ މުހިއްމު ކާމިޔާބީއެއްކަން ފާހަގަކޮށްލެވެއެވެ.

މީގެ އިތުރުން، މިއީ ރާއްޖޭގެ މުއައްސަސާއަކަށް ޖީ.ސީ.އެފްގެ މިފަދަ ދަރަޖައެއް ލިބުނު ފުރަތަމަ ފަހަރެވެ.

މި ކާމިޔާބީ ފާސްވެގެން ގޮސްފައިވަނީ އޮކްޓޫބަރު 26 އިން 29 އަށް ދެކުނު ކޮރެއާގެ ސޮންގްޑޯގައި ބޭއްވުނު ޖީ.ސީ.އެފްގެ 46 ވަނަ ބޯޑު ބައްދަލުވުމުގައެވެ. ޖީ.ސީ.އެފްއަކީ މޫސުމީ ބަދަލުތަކުން ލިބޭ ގެއްލުންތައް ކުޑަކުރުމަށާއި، ތިމާވެށްޓާ ރައްޓެހި އުސޫލުތަކަށް ބަދަލުވުމަށް ތަރައްޤީވަމުން އަންނަ ޤައުމުތަކަށް އެހީތެރިވުމަށް އުފައްދާފައިވާ ދުނިޔޭގެ އެންމެ ބޮޑު މޫސުމީ ފަންޑެވެ.

މީގެ ކުރިން މިފަދަ ފަންޑުތަކުން އެހީ ހޯދުމުގައި ބޭރުގެ ބައިނަލްއަޤްވާމީ އިދާރާތަކަށް ބަރޯސާވާން ޖެހުނު ނަމަވެސް، މި އެކްރެޑިޓޭޝަންގެ ސަބަބުން ދިވެހި މުއައްސަސާތަކަށް ސީދާ ޖީ.ސީ.އެފްއާ ގުޅިގެން މަޝްރޫޢުތައް އެކުލަވާލައި ހިންގުމުގެ ފުރިހަމަ އިޚްތިޔާރާއި ބާރު ލިބިގެންދާނެއެވެ.

މި އެކްރެޑިޓޭޝަން ހާސިލުކުރުމަށްޓަކައި ވޭތުވެދިޔަ 11 މަސްދުވަހުގެ ތެރޭގައި އެމް.އެފް.އެލް.ސީއިން ވަނީ ބޮޑެތި މަސައްކަތްތަކެއް ކޮށްފައެވެ. މި މަސައްކަތްތައް ކުރިއަށްގެންގޮސްފައިވަނީ މިނިސްޓްރީ އޮފް ކްލައިމެޓް ޗޭންޖް، އެންވަޔަރަންމަންޓް އެންޑް އެނަރޖީއާއި ޖީ.ސީ.އެފް ސެކްރެޓޭރިއެޓްގެ ސީދާ އެއްބާރުލުމާއި އިރުޝާދުގެ ދަށުންނެވެ.

އެކްރެޑިޓޭޝަންގެ ހަރުދަނާ މަރުޙަލާތައް ފުރިހަމަކުރުމުގެ ތެރޭގައި އެމް.އެފް.އެލް.ސީގެ ހިންގުމުގެ ނިޒާމާއި ފަންނީ މިންގަނޑުތައް ވަނީ ބައިނަލްއަޤްވާމީ ފެންވަރަށް މަތިކޮށްފައެވެ.

މި މަރުޙަލާގައި ކުރިމަތިވި ތަފާތު ގޮންޖެހުންތަކުން އަރައިގަނެ، ޖީ.ސީ.އެފް އިން ކަނޑައަޅާފައިވާ އުސޫލުތަކާއި މިންގަނޑުތަކަށް އެމް.އެފް.އެލް.ސީގެ ޤާބިލުކަން ވަނީ އިތުރުކޮށްފައެވެ. މިއީ ބައިނަލްއަޤްވާމީ މޫސުމީ ފަންޑުތަކުން ދިވެހިރާއްޖޭގެ އަމިއްލަ މުއައްސަސާތައް މެދުވެރިކޮށް އެހީ ހޯދުމަށް ކުރަމުންދާ މަސައްކަތަށް ލިބުނު ވަރަށް މުހިއްމު ކުރިއެރުމެކެވެ. މީގެ ސަބަބުން ޤައުމީ ފެންވަރުގައި ތިމާވެށީގެ ކަންކަމުގައި އިސްނެގުމުގެ ފުރުސަތު އިތުރަށް ފުޅާވެގެންދާނެއެވެ.

މި އެކްރެޑިޓޭޝަނާއެކު، އިއާދަކުރަނިވި ހަކަތަ އުފެއްދުމާއި، ހަކަތަ އިޤްތިޞާދުކުރުމާއި، ދެމެހެއްޓެނިވި ކަނޑުދަތުރުފަތުރާއި، ފެނުގެ ރައްކާތެރިކަން ކަށަވަރުކުރުން ފަދަ މުހިއްމު ދާއިރާތަކުން މާލީ އެހީތެރިކަން ހޯދުމަށް އެމް.އެފް.އެލް.ސީއަށް މަގުފަހިވެގެންދާނެއެވެ.

ކުރިއަށް އޮތް ތަނުގައިވެސް ރާއްޖޭގެ މޫސުމީ ޤައުމީ ޕްލޭންތަކާ އެއްގޮތަށް، ބައިނަލްއަޤްވާމީ ފަންޑުތަކަށް ސީދާ ވާސިލްވުމުގެ ފުރުސަތުތައް އިތުރަށް ފުޅާކޮށް، ރާއްޖޭގެ ވިލުންތެރިކަމާއި ދެމެހެއްޓެނިވި ތަރައްޤީއަށް ކުރެވޭ މަސައްކަތްތައް އިތުރު ހަރުފަތަކަށް ގެންދިއުމަށް ވަނީ ރޭވިފައެވެ.