ރަސްމާލެ މަޝްރޫއުގެ ތަފުސީލު ހާމަކުރުމަށް ގޮވާލާ މަޖިލީހަށް ކުއްލި މައްސަލައެއް ހުށައަޅައިފި

މި ސަރުކާރުން ކުރިއަށް ގެންދާ ބޯހިޔާ ވަހިކަމުގެ އެންމެ ބޮޑު މަޝްރޫއު ކަމުގައިވާ، ފުށިދިއްގަރު ފަޅު ހިއްކުމުގެ މަޝްރޫއު ކުރިއަށްގެންދާ ގޮތުގައި ހާމަކަމެއް ނެތް ކަމަށް ވިދާޅުވެ އެކަމާއި މެދު ކަންބޮޑުވުން ފާޅުކޮށް އެ މަޝްރޫއުގެ ތަފުސީލު ހާމަކުރުމަށް ގޮވާލާ ކުއްލި މައްސަލައެއް މަޖިލީހުގެ ނައިބު ރައީސް، އަހުމަދު ސަލީމް މަޖިލީހަށް ހުށަހަޅައިފި އެވެ.

ސަލީމް ހުށައެޅުއްވި މައްސަލައިގައި ބުނެފައިވަނީ ފުށިދިއްގަރު ފަޅުގެ މަސައްކަތް ފަށާފައި ވަނީ އެ ބިން ތަރައްގީ ކުރާނެ ގޮތާއި ބިން ހިއްކުމުގެ މަޝްރުއަށް ހިނގާނެ ޖުމުލަ ހަރަދު ހާމަ ކުރުމެއް ނެތި ކަމަށާއި ކުއްލި ގޮތަކަށް އެ މަޝްރޫއު ބަޔަކާ ހަވާލު ކުރުމަކީ ސުވާލު އުފެދޭ ކަމެއް ކަމަށެވެ.

ފުށިދިއްގަރު ފަޅުން 1153 ހެކްޓަރުގެ ބިން އަށް މަސްދުވަހުގެ ތެރޭގައި ނިންމުމަށް އަމާޒު ހިފައި މަސައްކަތް ފެށީ މުޅި އެ ފަޅުގެ އެންވަޔަރަމަންޓު އިމެޕެކްޓު އެސެސްމެންޓު (އީއައިއޭ) ނުހަދައި ކަމަށްވެސް އެމައްސަލައިގައި ވަނީ ބުނެފައެވެ. އަދި އީއައިއޭ ހަދާފައި ވަނީ ހަމައެކަނި 29 ހެކްޓަރުގެ ސަރަހައްދެއްގެ ކަމަށްވެސް ސަލީމް ހުށައެޅުއްވި ކުއްލި މައްސަލައިގައި ވަނީ ބުނެފައެވެ.

މީގެ އިތުރުންވެސް ސަލީމް ވަނީ އީއައިއޭ ހަދާފައިވާ 29 ހެކްޓަރަކީ ހިއްކުމަށް ހަމަޖެހިފައިވާ ސަރަހައްދުގެ އެންމެ 2.26 އިންސައްތަކަން ފާހަގަކޮށް އެއީ އީއައިއޭ ހެދުމުގައި އަމަލުކުރާ އުސޫލުގެ ބޭރުން ހާއްސަ އިމްތިޔާޒެއްގެ ދަށުން ކޮށްފައިވާ ކަމެއް ކަމަށް ބެލުމުގެ ޖާގަ އޮތް ކަމަށް ވިދާޅުވެފަ އެވެ.

އަދި ބިން ހިއްކާ ކުންފުނި ކަމުގައިވާ ސީއެމްސީސީ އަށް 70 ހެކްޓަރުގެ ބިން ދޫކޮށްލާއިރު މަޖިލީހަށް ސަލީމް ހުށަހެޅުއްވި މައްސަލައިގައި ވަނީ އެކަމާ ކަންބޮޑުވުން ފާޅު ކުރައްވައި ދިވެހި ފަސްގަނޑުން 99 އަހަރަށް ބޭރު ބަޔަކަށް ބިން ދިނީ ކޮން ގޮތަކަށް އަގު ކޮށްފައިތޯ ސުވާލު އުފައްދާފައެވެ. އަދި ރާއްޖޭގެ ބިމުން ބޭރު ބަޔަކަށް ބިން ލިބޭ ގޮތަށް ނިންމި ނިންމުމަކީ އެންމެ ފައިދާ ހުރި ގޮތަށް ކޮށްފައިވާ ކަމެއްކަން އެނގޭނެ ގޮތެއް ނެތް ކަމަށް ވެސް މި ކުއްލި މައްސަލައިގައި ވެއެވެ.

ފުށިދިއްގަރު ފަޅު ހިއްކުމަށް އަންނަ އަހަރަށް ލަފާ ކުރާ ބެޖެޓުގައި ހިމަނާފައި އޮތް 400 މިލިއަން ރުފިޔާ އުނި ކުރުމުން މަޖިލީހުގެ ނިންމުމަށް ގޮންޖަހައި އެ މަޝްރޫއު ކުރިއަށް ގެންދިޔުމަށް ނިންމުމަކީ ދައުލަތުގެ ބާރުތައް ބެހިފައި ވާގޮތަށް ގޮން ޖެހުން ކަމަށާއި އެއީ ޑިމޮކްރެސީގެ ހަމަތަކާއި ގުޑް ގަވަނަންސްގެ އުސޫލުތަކާ ހިލާފު ކަމެއް ކަމަށް ވެސް ސަލީމް ހުށައެޅުއްވި މައްސަލައިގައި ވަނީ ބުނެފައެވެ.