ޒަމާނުއްސުރެވެސް އަތޮޅުތެރޭގެ ރަށެއްގައި ތަރައްޤީގެ ކަމެއް ކުރަން ޖެހިއްޖެނަމަ ނުކުރެވޭ: ނަޝީދު

ޒަމާނުއްސުރެވެސް އަތޮޅުތެރޭގެ ރަށެއްގައި ތަރައްޤީގެ ކަމެއް ކުރަން ޖެހިއްޖެނަމަ ދަތިތަކެއް ދިމާވެ ނުކުރެވޭ ކަމަށް ރައްޔުތިންގެ މަޖިލީހުގެ ނޮޅިވަރަމް ދާއިރާގެ މެމްބަރު މުޙައްމަދު ނަޝީދު ވިދާޅުވެއްޖެއެވެ.

ނަޝީދު މިފަދައިން ވިދާޅުވީ ރައްޔިތުންގެ މަޖިލީހުގެ ތަޅުމަށް މިއަދު ހޯރަފުށީ ދާއިރާގެ މެމްބަރު އަހްމަދު ސަލީމް ހުށައެޅުއްވެވި ފުށިދިއްގަރު ފަޅު ހިއްކައިގެން ތަރައްޤީ ކުރާ ރަސްމާލެ މަޝްރޫޢާ ގުޅޭ މައުލޫތު ހޯދުމާއި ގުޅޭ ކުއްލި މައްސަލައަށް ބަހުސް ކުރައްވަމުންނެވެ.

ފުށިދިއްގަރު ފަޅު ހިއްކައިގެން މާލޭ މީހުންނަށް ގޯތިދޭ ވާހަކަ ފާހަގަ ކުރައްވައި ނަޝީދު ވިދާޅުވީ ދިވެހިދައުލަތަށް ޓެކްސް ދައްކަނީ ހަމައެކަނި މާލެ ރައްޔިތުން ނޫން ކަމަށެވެ.

“ޕްރައިމް ލޮކޭޝަނުން ބިން ލިބެންވީމަ މާލޭ ރައްޔިތުންނަށް އެކަނި ބިން ލިބެންވީ، މިއީ އިންސާފެއް ނޫން، މިއީ ހަމައެއް ނޫން ލަމައެއް ނޫން، އުސޫލެއް ނޫން، އެސަރުކާރު ކުރިޔަސް މިސަރުކާރުކުރިޔަސް ހަމަޔާ އިންސާފު ވާނީ ހަމަޔާ އިންސާފަށް” ނަޝީދު ވިދާޅުވިއެވެ.

ފުށިދިއްގަރު ހިއްކުން ބަޖެޓުން އެމްޑީޕީ އިން މަޖިލީހުގައި އޮތް ބާރުގެ ބޭނުން ކޮށްގެން ރައީސް ޑރ މުޙައްމަދު މުޢިއްޒު އެދިވަޑައިގެންފައި އޮއްވައި އުނި ކުރިކަން ފާހަގަކުަރައްވަމުން ނަޝީދު ވިދާޅުވީ ޤާނޫނު އަސާސީގައި ރައީސް އަށް ކުރެވެނެ ކަންކަމާއި ނުކުރެވޭނެ ކަން ކަން ޤާނޫނުގައި ބަޔާން ކޮށްފަައި އެބައޮތް ކަމަށެވެ.

“އަޅުގަނޑުމެންނަށް ކަމެއް ވާންވީމަ އެކަމެއް ނުވޭ، އެކަމަކު މާލެ ސަރަހައްދުގައި އެސަރުކާރެއް މިސަރުކާރެއް އެހެންނެއް މިހެންނެއް ކިޔާނެ ކަމެއް ނެތޭ، ރަސްރަސްކަލުން ހިސާބުން ފެށިގެން މުޙައްމަދު އަމީނެއް ފަރީދެއް އިބްރާހިމް ނާސިރެއް މައުމޫނެއް ޔާމިނެއް ނަޝީދެއް ކާސިމެއް ޤާސިމެއް ކިޔާނެ ކަމެއްނެތް، މިހުރިހާ އިރަކު މާލެ ސަރަހައްދަށް ކަމެއް ކުރަންވީމަ އެކަމެއް އެބަ ކުރެވޭ، ބްރިޖް އަޅަންވީމަ ބްރިޖްވެސް އެޅޭ، ބިންހިއްކަން ވީމަ މިން ހިއްކޭ، އަޅުގަނޑުމެން ވެއްޖެއްޔާ އީއައިއޭ ހަދަން ޖެހޭ ދެންހުރި އެއްޗެއް ހަދަން ޖެހޭ، އީއައިއޭ ކަމަކު ނުދާނެ، ނެރެއް ކޮންނަން ވިޔަސް އީއައިއޭ ހަދަން ޖެހޭ، މިތާ ކުރަންވީމަ އީއައިއޭ ހަދާކަށް ނުޖެހޭ،” ނަޝީދު ވިދާޅުވިއެވެ.

ނަޝީދު ވިދާޅުވީ އީއައިއޭ ހަދަން ޖެހެނީ ވަކި ބައެއް ކަމަށާއި އެ ލިބެނީވެސް ވަކި ބަޔަކަށް ކަމަށެވެ.

ނަޝީދުގެ ވާހަކަފުޅުގައި ވަނީ އެމަނިކުފާނުގެ ދާއިރާގެ ނަން ބޭނުން ކޮށްގެން ބަޖެޓުގައި ޖެއްސި ލާރިން އެދާއިރާއަށް ކަމެއް ނުވެ އެލާރި ގެންދިޔަ ބައެއްގެ ވާހަކަ އާއި އެލާރި އަނބުރާ އެދާއިރާއަށް ހޯދޭނެ ގޮތުގެ ވާހަކަވެސް ދައްކަން ޖެހޭ ކަމަށެވެ.