ޤުރްއާނާ ގުޅޭ ބިޔަ ޙަރަކާތްތަކެއް ކުރިއަށް ގެންދަން މަންފާއިން ނިންމައިފި

ކީރިތި ޤުރްއާންގެ ޢިލްމާ ގުޅޭ ބިޔަ ޙަރަކާތްތަކެއް ރާއްޖޭގެ އެކި ކަންކޮޅުތަކުގައި ކުރިއަށް ގެންދިއުމަށް މަންފާއިން ނިންމައިފި އެވެ.

މަންމާއިން މިކަން ނިންމާފައިވަނީ މިއަދު ހަވީރު ބޭއްވި އެ ޖަމްޢިއްޔާގެ ހިންގާ ކޮމެޓީގެ ޚާއްސަ ބައްދަލުވުމެއްގަ އެވެ. އެ ޖަމިއްޔާއިން ބުނި ގޮތުގައި މި ޙަރަކާތާ ގުޅޭ އިތުރު ތަފްސީލް ވަރަށް އަވަހަށް ހާމަކުރާނެ އެވެ.

މި ބިޔަ ހަރަކާތުގެ އިސް ބޭފުޅަކަށް ހަމަޖައްސާފައިވަނީ މަޝްހޫރު ޤާރީ, މުހައްމަދު ތައުފީޤު އަލީ (ޤާރީ ތާއްޕެ) އެވެ. ވޮއިސްއާ ވާހަކަ ދައްކަވަމުން ތަޢުފީޤު ވިދާޅުވީ މި ހަރަކާތާއެކު ގެނެސްދޭނީ ޤުރުޢާނުގެ ބޮޑު ބަހާރެއް ކަމަށެވެ.

"ސިލްސިލާ ގޮތެއްގައި މި ހަރަކާތް މުޅި ރާއްޖޭގައި އިރާދަކުރެއްވިއްޔާ ހިންގުމަށް މި ނިންމީ. މި ހަރަކާތް އޮންނަ ރަށަކަށް ނުވަތަ އަތޮޅަކަށް އަޅުގަނޑުމެން މި ގެނެސްދެނީ ޤުރުއާނުގެ ބޮޑު ބަހާރެއް. ޤުރުއާނުގެ ޢިލްމާއި ޤުރުޢާނާއި ގުޅޭ ތަފާތު އެކިއެކި ކަންކަން," ތަޢުފީޤު ވިދާޅުވި އެވެ.

މަންފާ - ހަގު ޖަމިއްޔާއެއް ނަމަވެސް މިހާރު އެއްވަނަ

"މަންފާ" ޖަމިއްޔާ އަށް އަދި މިވީ ދިހަވަރަކަށް މަސް ދުވަހެވެ. ނަމަވެސް މިހާ ކުރު މުއްދަތެއްގެ ތެރޭގައި މަންފާ ވެފައިވަނީ ރާއްޖޭގެ ދައުވަތުގެ މައިދާނުގެ އެއްވަނަ އަށެވެ. ވަރަށް ގިނަ ރަށްރަށަށް ދަތުރުކޮށް ތަފާތު ޕްރަގްރާމްތައް ދަނީ ހިންގަމުންނެވެ. އެ ޕްރަގްރާމްތަކަށް ހުރިހާ ރަށަކުން ވެސް ބޮޑު ތަރުހީބެއް ލިބެމުން ދެ އެވެ.

އެގޮތުން ދަރުސްތަކާއި ފޯރަމްތަކާއި އަގީދާ އަދި ނަމާދު ވޯކްޝޮޕްތަކާއި އެ ނޫން ވެސް ގިނަ ހަރަކާތްތައް ހިމެނެ އެވެ.

މިފަދަ ޕްރަގްރާމްތައް ހިންގަން ވަރަށް ގިނަ ރަށްރަށުން މަންފާއަށް ދަނީ ރިކްއެެސްްޓްތައް ލިބެމުންނެވެ. މި ރޯދަ މަހުވެސް ކޮންމެ ހަފްތާ ބަންދަކު އެކި ރަށްރަށުގައި ތަފާތު ޕްރަގްރާމްތައް ހިންގަ އެވެ. އަދި ސޯޝަލް މީޑިއާ މެދުވެރިކޮށް ދީނީ ތަފާތު މަައުލޫމާތުތައް ކޮންމެ ދުވަހަކު ފޯރުކޮށްދެ އެވެ.

މަންފާ އުފެއްދި އަދި އެ ޖަމިއްޔާގެ ރައީސަކީ ދިވެހީންގެ ވަރަށް ބޮޑު ލޯބްތަކާއި އިހްތިރާމެއް އޮތް އަލީ ރަމީޒެވެ. އޭނާ ގެންދަނީ ދައުވަތުގެ މައިދާނުގައި ވަަރަށް މުހިންމު ދައުރެއް އަދާ ކުރަމުންނެވެ. އޭނާގެ އެ މަސައްކަތަށް މިހާރު 22 އަހަރުވީ އެވެ.