ޔާމީނުގެ ވެރިކަމުގައި ފޯޅަވަހިން ގެއްލުނުބައި ހޯދުމުގެ މަސައްކަތް ފަށާނުން: އާދަމް ޝަރީފް

ރައީސް އަބްދުﷲ ޔާމީނުގެ ވެރިކަމުގައި، ފޯޅަވަހިން ގެއްލުނުބައި ހޯދުމުގެ މަސައްކަތް ފަށައިގެން ކުރިއަށް ގެންދާނެ ކަމަށް ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވިދާޅުވެއްޖެއެވެ.

އާދަމް ޝަރީފް މިހެން ވިދާޅުވީ، "ޗަ ގޯސް" ގެ ނަމުގައި ރޭ ހެދިގޮނޑުދޮށުގައި ބޭއްވި ޖަލްސާގައި ވާހަކަ ދައްކަވަމުންނެވެ.

ޝަރީފް ވިދާޅުވީ ރާައްޖޭގެ ކަނޑުގެ ސަރަހައްދުން ބައެއް ގެއްލުމަކީ ދިވެހިންނަށް ފޫ ނުބެއްދޭ ވަރުގެ ކަމަކަށް ވެގެންދާނެ ކަމަށެވެ.

މި މައްސަލައިގައި ރާއްޖެއަކީ އެއް ހަސްމަކަށް ވާއިރު، ރާއްޖެއަކީ މަސްވެރިކަމަށް ބަރޯސާވާ ވެފައި މޮރިޝަސްއަކީ މަސްވެރި ގައުމަކަށް ނުވާއިރު، މޮރިޝަސްއިން ކުރިން ދެއްކި ވާހަކަތަކަށް ރާއްޖެއިން ޗެލެންޖް ކުރަމުން އައި އައުން މި ސަރުކާރުން ދޫކޮށްލައި، ފޯޅަވަހީގެ ސިޔާދަތީ ބާރުތައް މޮރިޝަސްއަށް ދޫކޮށްލުމަކީ މި ސަރުކާރުން މި ގައުމަށްވީ ވަރަށް ބޮޑު ގައްދާރުވުމެއް ކަމަށް ޝަރީފް ވިދާޅުވިއެވެ.

"މި ސަރުކާރުން މި ދިން އަނިޔާ ދިވެހި ރާއްޖެއިން އަބަދުވެސް ތަހައްމަލު ކުރަން ޖެހޭނެ. މި ބަދަލުގެ ސަބަބުން އަޅުގަނޑުމެންނަށް މި ގެއްލިގެން ދިޔައީ އަޅުގަނޑުމެން ހީވެސް ނުކުރާ ވަރުގެ، އަޅުގަނޑުމެންގެ ކުރިއަށްއޮތް ޖީލަށްވެސް، އަޅުގަނޑުމެންގެ ދަރިންގެ ދަރިންނަށްވެސް، އަޅުގަނޑުމެންގެ މަސްވެރިންނަށްވެސް، ދުވަހަކުވެސް ދެން އެހިސާބަށް ނުދެވޭވަރުގެ ގެއްލުމަކަށް"

ޝަރީފް ވިދާޅުވިއެވެ.

މީގެ އިތުރުން ޝަރީފް ވިދާޅުވީ، ރާއްޖޭގެ ކަނޑުގެ ސަރަހައްދު ވިއްކާލައި 500 މިލިއަން ޑޮލަރު ހޯދި މައްސަލަ ބަލާނެ ކަމަށެވެ.

"ﷲ ގެ ވާގިފުލާއެކީގާ، ރައީސް ޔާމީނުގެ ޒަމާއަތުގައި ޕްރޮގްރެސިވް ކޮންގްރެސް ކޯލިޝަނުން މިއަދު އެ ގެއްލުނު ބައިތައް ހޯދުމުގެ މަސައްކަތް އަޅުގަނޑުމެން ފައްޓައިގެން ކުރިއަށް ގެންދާނަމޭ"

ޝަރީފް ވިދާޅުވިއެވެ.

މި މައްސަލަތަކަށް އޮތީ އެންމެ ހައްލެއް ކަމަށާއި، އެއީ ރައީސް ޔާމީން މިނިވަން ކުރުން ކަމަށް ޝަރީފް ވިދާޅުވިއެވެވ.

ޗާގޯސް އައިލެންޑްސް އާއި ރާއްޖެއާ ދެމެދު އިން ކަނޑައަޅަން މޮރިޝަސް އިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީސް (އިޓްލޮސް) އަށް ހުށަހަޅާފައިވާ މައްސަ ނިމުނީ ރާއްޖެއިން ވަކާލާތު ކުރި ގޮތަށެވެ.

ރާއްޖެ އާއި ޗާގޯސް ޖަޒީރާއާ ދެމެދު އެއްވެސް ފަރާތަކަށް 200 ނޯޓިކަލް މޭލު ހަމަނުވެ، ހާއްސަ އިގުތިސޯދީ ސަރަހައްދު ފުށުއަރާ ގާތްގަނޑަކަށް 95،000 އަކަކިލޯމީޓަރުގެ ސަރަހައްދެއް އޮވެއެވެ.

އިޓްލޮސް އިން އެ މައްސަލައިގައި ހުކުމް އިއްވީ ފުށުއަރާ 200 ނޯޓިކަލް މޭލުގެ ސަރަހައްދު ރާއްޖެއާއި މޮރިޝަސްއާ ދެމެދު އެއްވަރަކަށް ބެހުމަށެވެ.

މި މައްސަލާގައި މޮރިޝަސްއިން ވަކާލާތު ކުރަމުން އައީ އިން ކަނޑައެޅުމުގައި ބްލެންހެމް ފަރުން މިން އަޅަން ފެށުމަށެވެ. ނަމަވެސް ރާއްޖޭން ވަކާލާތު ކުރަމުން އައީ މޮރިޝަސްއިން ބޭނުންވާ ފަދައިން ބްލެންހެމް ފަރުން މިންއެޅުމުގެ ބަދަލުގައި ޕެރޯސް ބަންހޯސްއާއި ސެލޮމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކަކުން ފެށިގެން ކަނޑުގެ ސަރަހައްދު މިންކުރުމަށެވެ.

ދެ ފަރާތުގެ ވާހަކައަށް ބެލުމަށް ފަހު އިޓްލޮސް އިން ނިންމީ މޮރިޝަސްގެ ހުށަހެޅުން ބަލައިނުގަނެވޭނެ ކަމަށެވެ. އަދި ބްލެންހެމް ފަރަކީ ބޭސްޕޮއިންޓުކަމަށް ކަމަށް ބެލުމަށް ޤަބޫލުކުރެވޭ މިންވަރަށް މޮރިޝަސްއަށް ހެކި ހުށަހެޅިފައިނުވާކަމަށް އިޓްލޮސްގައި މައްސަލަ ބެއްލެވި ޗެމްބަރުން ބުނެފައިވެއެވެ.

އެހެންކަމުން، ރާއްޖެއާއި ޗާގޮސްގެ މެދުގައިވާ ކަނޑުގެ ސަރަހައްދުން ފުށުއަރާ ސަރަހައްދު ބައިކުރާނީ ރާއްޖެއިން އެދުނު ގޮތަށް ޕެރޯސް ބަންހޯސްއާއި ސޮލަމަން އައިލެންޑްސް ދެ އަތޮޅުގައި ފާހަގަކުރާ ނުކުތާތަކުން ފެށިގެން ޗާގޮސްގެ ކަނޑުގެ ސަރަހައްދު މިންކޮށްގެން ކަމަށް އިޓްލޮސްގައި މައްސަލަ ބެއްލެވި ޗެމްބަރުން ވަނީ ނިންމާފައެވެ.