ހިޔާ ފްލެޓު ކުލި ކުޑަކުރެވޭނެ ފޯމިއުލާ ވަނީ ހޯދިފަ: ރައީސް ޞާލިހު
ހުޅުމާލޭ ދެވަނަ ފިޔަވަހީގައި އަޅާފައިވާ ހިޔާ ފްލެޓުތަކުގެ ކުލި ކުޑަ ނުކުރެވޭނެ ކަމަށާއި، ހިޔާގެ ފިނިޝިން ސަރުކާރުގެ ޚަރަދުގައި ނިންމުމަކީ ބޮޑު ދައުލަތުގެ މާލިއްޔާއަށް އުފުލޭނެ ބުރައެއް ނޫންކަމަށް މީގެ ކުރިން ސަރުކާރުން ބުނި ނަމަވެސް މިހާރު ހިޔާ ފްލެޓުގެ ކުލި ކުޑަ ކުރެވޭނެ ފޯމިއުލާ ހޯދިފައިވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.
ރައީސް ޞާލިހު މިފަދައިން ވިދާޅުވެފައިވަނީ ކުއްލި ގޮތަކަށް ސަރުކާރުން ހިޔާ ފްލެޓުގެ ކުލި ކުރީ ސަރުކާރުން ކަނޑައަޅާފައިވާ ގޮތަށް 5300 ރުފިޔާއަށް ކުޑަކުރަން ނިންމީ ކޮން ސަބަބަކާއި ހުރެތޯ ރައީސް އޮފީހުން ރޭ ބޭއްވި ޕްރެސް ކޮންފަރެންސްގައި ނޫސްވެރިއަކު ކުރި ސުވާލަށް ޖަވާބުދެއްވަމުން ނެވެ.
ރައީސް ޞާލިހު ވިދާޅުވީ ހިޔާ ފްލެޓުގެ ކުލި ކުޑަކުރުމާއި ގުޅޭގޮތުން މަޝްވަރާ ކުރެވެމުން އަންނަތާ ކުޑަ ދުވަސްކޮޅެއް ވެއްޖެ ކަމަށެވެ. އެގޮތުން ހިޔާ ފްލެޓު ޔޫނިއަންގެ ބައެއް ބޭފުޅުންނާއި އެކުވެސް މަޝްވަރާތައް ކުރެވިފައިވާ ކަމަށާއި، އަދި ސަރުކާރުން ކުރި މަސައްކަތްތަކާއެކު ހިޔާ ފްލެޓުގެ ކުއްޔަށް މިހާރަށްވުރެ ލުއި ގޮތެއް ހޯދިފައިވާކަމަށް ރައީސް ޞާލިހު ވަނީ ވިދާޅުވެފަ އެވެ.
"ކުރީގައި ވެސް އޮތް ޚަރަދު އެއީ އޮތް ޚަރަދު. އެ މަހަކަށް ބެހީމަ 25 އަހަރަށް، އަހަރަކު 12 މަސް ދުވަހަށް ކަމަށް ބެލީމަ ޖެހޭ އަދަދު އަދިވެސް އަންނަނީ. އެހެން ނަމަވެސް އެހެން ގޮތް ގޮތް ހުންނާނެ އެކަން ކުރެވޭނެ. އެހެންވީމަ އެގޮތުން އަޅުގަނޑުމެންނަށް މަޝްވަރާކޮށްފަ ހޯދުނު ފޯމިއުލާއެއް އެއީ"
ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު
ރައީސް ޞާލިހު ވިދާޅުވީ ހިޔާ ފްލެޓުގެ ކުލި ކުޑަކުރެވޭނެ ގޮތެއް ސަރުކާރަށް ހޯދިފައި ވީނަމަވެސް އޭގެ ސަބަބުން މިހާރު ކޮށްފައިވާ އިންވެސްޓުމަންޓަށް ގެއްލުމެއް ނުލިބޭނެ ކަމަށެވެ. އަދި އެތަނަށް ކޮށްފައި ހުރި ޚަރަދުން ފްލެޓަކަށް ޖެހޭ އަގުވެސް ކުޑަ ނުވާކަމަށް ރައީސް ޞާލިހު ވިދާޅުވި އެވެ.
ހިޔާ ފްލެޓުގެ ކުލި ކުޑަކޮށްފައިވާކަމަށް ނޫސްތަކުގައި ރިޕޯޓުތައް ޝާއިއުކުރި ނަމަވެސް އަދި ރަސްމީކޮށް ސަރުކާރުން އަގުތައް ކަނޑައަޅާ އެ އަގުތައް ހާމަކޮށްފައި ނުވާނެކަމަށް ރައީސް ޞާލިހު ވަނީ ވިދާޅުވެފައެވެ.
އެހެން ނަމަވެސް އެމަނިކުފާނު ވިދާޅުވީ ކުއްޔަށް ލުއި ގޮތްތަކެއް މިހާރު ސަރުކާރުން ހޯދާފައިވާނެ ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
