ސިޓީން ބަލިނުވެ ދަމަހައްޓަމުން އައި ރެކޯޑް ބްރެންޓްފޯޑް އިން ނިމުމަކަށް ގެނެސްފި!

އިގިރޭސި ޕްރެމިއާ ލީގުގައި ރޭ އަމިއްލަ ދަނޑުގައި 1-0 ގެ ނަތީޖާއަކުން މެންޗެސްޓާ ސިޓީ ބަލިކޮށް މެޗަކުން ބަލިނުވެ އެޓީމު ދަމަހައްޓަމުން އައި ރެކޯޑް 25 މެޗަށްފަހު ބްރެންޓްފޯޑް އިން ނިމުމަކަށް ގެނެސްފި އެވެ.

ރޭގެ މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު ފުރަތަމަ ހާފުގެ 10 މިނެޓު ބްރެންޓްފޯޑްގެ ކޮންގޯ ފޯވާޑް ޔޯނޭ ވިސާ ފޮނުވާލި ހަމަލާ އަމާޒުވީ ގޯލުގެ އަރިމަތީ ދަނޑިއަށެވެ.

މީގެއިތުރުން ވެސް ފުރަތަަމަ ހާފުގެ 36 ވަނަ މިނެޓުގައި ބްރެންޓްފޯޑަށް ވަނީ ލަނޑު ޖަހާނެ ރަގަޅު ފުރުސަތުތަކެއް ލިބި ބޭނުންނުކުރެވިފައެވެ. ސިޓީގެ ޕެނަލްޓީ އޭރިއާ ތެެރެއިން އެޓީމުގެ ބެން މީ ފޮނުވާލި ބޯޅަ ގޯލްކީޕަރު އެޑަސަން ވަނީ ދިފާއުކޮށްފައެވެ.

ފުރަތަަމަ ހާފުގައި ގިނަވަގުތު ބޯޅަ ހިފަހައްޓައިގެން މެންޗެސްޓާ ސިޓީ އިން ކުޅުނު ނަމަވެސް މިހާފުގައި ބްރެންޓްފޯޑްގެ ގޯލާއި އަމާޒުކޮށް ނުރައްކާތެރި އެންމެ ހަމަލާއެއް ވެސް އެޓީމަށް ފޮނުވާލެވިފައެއް ނުވެއެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 0-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

ދެވަނަ ހާފުގައި މެންޗެސްޓާ ސިޓީ އިން އެޓީމުގެ އެޓޭކުތަށް ވަރުގަދަކޮށް ބްރެންޓްފޯޑްގެ ގޯލާއި އަމާޒުކޮށް ވަނީ ގިނަ ހަމަލާތަކެއް ފޮނުވާލާފައެވެ. އޭގެ ތެރޭގައި އެޓީމުގެ އާޖެންޓީނާ ފޯވާޑް އަލްވަރޭޒް އާއި އިގިރޭސި މިޑްފީލްޑަރު ފިލް ފޯޑެން އަށް ލިބުނު ހުސް ފުރުސަތުތަކުގައި އެކުޅުންތެރިންނަށް ބޭނުން ހިފޭ ގޮތެއްނުވިއެވެ.

ނަތީޖާއެއްގެ ގޮތުން ދެވަނަ ހާފުގެ 85 ވަނަ މިނެޓުގައި ބްރެންޓްފޯޑުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މި ލަނޑު އެޓީމަށް ކާމިޔާބުކޮށްދިނީ އެޓީމުގެ ޖެމެއިކާގެ ޑިފެންޑަރު އީތަން ޕިނޮކްއެވެ. މިއީ އެޓީމުގެ ކެމަރޫން ފޯވާޑް ބްރަޔަން އެބިއުމޯ ތަނަވަސްކޮށްދިން ފުރުސަތެއްގައި އޭނާ ކާމިޔާބުކޮށްދިން ލަނޑެކެވެ.

މި މެޗުން ލިބުނު ތިން ޕޮއިންޓާއެކު އެކު ބްރެންޓްފޯޑުން ވަނީ ލީގުގައި ކުޅުނު 38 މެޗުން 59 ޕޮއިންޓް ހަމަކޮށް ތާވަލުގެ 09 ވަނައަށް ކުރިއަށް ޖެހިލާފައެވެ. އަދި މި މެޗުން ބަލިވި މެންޗެސްޓާ ސިޓީއަށް ލީގުގައި ކުޅުނު 38 މެޗުން ވަނީ 89 ޕޮއިންޓް ލިބިފައެވެ.