ރައީސް ޞާލިހަކީ "ކަނޑު ފޭރޭ ޗޯރު" ކަމަށް ސިފަކޮށް ޗެނަލް-13އިން ދެއްކި ލަވަތަކެއްގެ މައްސަލަ ބަލަނީ

ރައީސުލްޖުމްޙޫރިއްޔާ އިބްރާހިމް މުޙައްމަދު ޞާލިހަކީ "ކަނޑު ފޭރޭ ޗޯރު" ކަމަށް ސިފަޗާގޮތަށް ޗެނަލް-13 އިން ގެނެސްދެމުންދާ 3 ލަވައެއްގެ މައްސަލަ ބަލަންފަށައި ޖަވާބުދާރީވާން އަންގައިފި އެވެ.

ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަށް ފާޑުކިޔައިވޗެނަލް13އިން ގެނެސްދެމުން އައި "ކަނޑު ފޭރޭ ޗޯރު އިބޫ"، " ލުޓޭރު އިބޫ" އަދި "ފެލާލައިފި" ލަވަ ގެނެސްދިނުން ހުއްޓާލުމަށް ބްރޮޑްކޮމްއިން ވަނީ އަންގާފައެވެ.

މީޑިޔާ ރިންގްގެ އެމްޑީއަށް އެޑްރެސްކޮށް ބްރޮޑްކޮމްއިން ފޮނުވި ސިޓީގައި ވަނީ މިމަހުގެ 22 ވަނަ ދުވަހުގައި ޗެނަލް13އިން ދެއްކި ތިން ލަވައަކީ މުޖުތަމައުގެ އަދަބު އަޚުލާޤުގެ މިންގަނޑުކަމަށް އާންމު ގޮތެއްގައި ޤަބޫލުކުރެވޭ މިންގަނޑުތަކާ ޚިލާފު އަދި އިޖުތިމާއީ މިންގަނޑުތަކަށް ނުފެތޭ ބަސްމަގު އަދި އިޝާރާތް ބޭނުންކޮށްފައިވާ ލަވަތަކެއް ކަމަށެވެ.

އޭގެ އިތުރަށް އެއީ ކޯޑް އޮފް ޕްރެކްޓިސްގައި ބަޔާންކުރާ މީހެއްގެ ނުވަތަ ބައެއްގެ ހުރުމަތް ކެނޑިދާފަދަ ނުވަތަ އިއްޒަތާއި ޤަދަރަށް އުނިކަމެއް އަތުވެދާފަދަ ނުވަތަ ނިކަމެތިކަމެއް ލިބިދާނެ ބަސްތަކާއި މަންޒަރާއި އަޑު ބްރޯޑްކާސްޓުކުރުންކަމަށްވެސް ބުނެފައިވެއެވެ.

އަދި އެ ލަވަތައް ހުށަހެޅުމަކީ، ޚަބަރާއި ކަރަންޓް އެފެއާޒް ގެނެސްދިނުމުގައި، ވަކި ފަރާތަކަށް ބުރަވުމެއް ނެތި ހަމަހަމަކަމާއެކު ގެނެސްދިނުމަށް އިސްކަންދިނުމާއި ތެދު މައުލޫމާތު ފެތުރުމަށް މަސައްކަތްކުރުމުގެ ހަމައާ ޚިލާފުކަމެއް ކަމަށްވެސް ބްރޯޑްކޮމްގެ ސިޓީގައި ބުނެފައިވެއެވެ.

އެ މައްސަލަ ކޮމިޝަނުން ބަލަމުން އަންނަނީ އެމައްސަލައަށް 12 ޖޫންވާ ހޯމަދުވަހުގެ 14:00ގެ ކުރިން ޖަވާބުދާރީވުމަށް ޗެނަލް-13އަށް ބްރޯޑްކޮމްއިން ފުރުސަތު ދީފައިވެއެވެ. ލިޔުމުން ޖަވާބުދާރީވަން އެދިފައިވާއިރު އެ މުއްދަތުގައި ޖަވާބުދާރީނުވެއްޖެ ނަމަ ލިބިފައިވާ ހެކިތަކުގެ މައްޗަށް ބަލައި ގޮތެއް ނިންމާނެ ކަމަށްވެސް އެ ބަޔާނުގައި ބުނެފައިވެއެވެ.

މީގެ އިތުރުން ވަކި އަތަކަށް ބުރަނުވެ ހަބަރާ މައުލޫމާތު ގެނެސްދިނުމަށް ވެސް ބްރޮޑްކޮމްއިން އަންގާފައިވެއެވެ. ބްރޮޑްކޮމްއިން މިހެން އަންގާފައިވާއިރު އެއީ ޗެނަލް-13 އިން ސަރުކާރު ޒިންމާދާރު ކުރުވަން ކުރާ މަސައްކަތަށް ހުރަސްއަޅަމުން ގެންދާ ލިއުމެއްގެ ގޮތުގައި އެ ޗެނަލުން ސިފަކުރެއެވެ.

ޖާވާބުދާރީވުމަށް ދީފައިވާ ފުރުސަތުގައި ޖަވާބު ނުދެވިއްޖެނަމަ ފިޔަވަޅުއަޅާނެކަމުގެ އިންޒާރު ބްރޮޑްކޮމްއިން ދީފައިވާއިރު މީގެ ކުރިންވެސް ސަރުކާރުންވަނީ އެ ޗެނަލްގެ ކޮންޓެންޓުތަކެއް ހުއްޓުވާ ފިޔަވަޅުއަޅާފައެވެ.