އަބުރު ކަތިލުމަކީ ސިޔާސީ އުކުޅެއް ކަމަކަށް ނުދެކެން: އަސްލަމް

މީހުންގެ އަބުރު ކަތިލާ، މީހުންނަށް ވަނަން ކިޔުމަކީ ސިޔާސީ ގޮތުން ބޭނުންކުރާ އުކުޅެއްކަމަށް ދެކިވަޑައި ނުގަންނަވާކަމަށް ރައްޔިތުންގެ މަޖިލީހުގެ ހިތަދޫ އުތުރު ދާއިރާ މެމްބަރު އަދި އެމްޑީޕީ ޕާލިމެންޓްރީ ގްރޫޕުގެ ލީޑަރު މުޙައްމަދު އަސްލަމް ވިދާޅުވެއްޖެ އެވެ.

އަސްލަމް މިފަދައިން ވިދާޅުވެފައިވަނީ ކުރީގެ ރައީސުންނާއި ގުޅުވާ ލަވަތައް ހަދާ، ނުވަތަ ނަންތައް ދީގެން ސިޔާސީ ހަރަކާތްތައް ހިންގަމުން ދިޔަގޮތަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ނިސްބަތްކޮށް "ކަނޑު ފޭރޭ ޗޯރު" ނުވަރަ "ޗޯރު އިބުރޭ" ކިޔުމަކީ މައްސަލައެއް ނޫންކަމަށް މަޖިލީހުގެ ރައީސް މުޙައްމަދު ނަޝީދާއި، އެމްޑީޕީއިން ވަކިވެ ވަޑައިގެންނެވި މެމްބަރުން މިއަދުގެ ޖަލްސާގައި ދެއްކެވި ވާހަކަތަކަށް ރައްދުދެއްވަމުން ނެވެ.

އެ ބަހުސް މަޖިލީހުގައި ފެށިގެން ދިޔައީ ރައީސުލްޖުމްޙޫރިއްޔާ އަކީ "ޗޯރު އިބުރޭ" ކަމަށް ސިފަކޮށް ޗެނަލް-13 އިން ގެނެސްދިން ކޮންޓެންޓާއި ގުޅޭ މައްސަލަ ބްރޯޑްކާސްޓިން ކޮމިޝަނުން ބަލަން ފެށުމަކީ އެ ކޮމިޝަން މެދުވެރިކޮށް މީޑިއާއަށް ބިރުދެއްކުމުގެ އަމަލެއްކަން ފާހަގަކޮށް މަޖިލީހަށް ހުށައެޅި ކުއްލި މައްސަލަ ބޭރުކޮށްލުމާއި ގުޅިގެންނެވެ.

މަޖިލީހުގެ ރިއީސް މުޙައްމަދު ނަޝީދު އަދި ގަލޮޅު އިތުރު ދާއިރާގެ މެމްބަރު އީވާ އަބްދުالله ވަނީ ޚުދު އެމްޑީޕީއިން އިދިކޮޅުގައި އޮތްއިރު އޭރު ވެރިކަމުގައި ތިއްބެވި ފަރާތްތަކަށް ހެދި ނަންތަކާއި އެ ފަރާތްތަކަށް ނިސްބަތްކޮށް ހެދި ލަވަތަކުގެ ހަނދާން އާކުރައްވާފަ އެވެ.

އަދި މެމްބަރު އީވާ ވިދާޅުވީ އިދިކޮޅުގައި އޮންނަ އިރު ވެރިކަމުގައި ތިބޭ ފަރާތްތަކަށް އެފަދައިން ނަން ކިޔާ ލަވަތައް ހެދުމަކީ ސިޔާސީގޮތުން ގެންގުޅޭ އުކުޅެއް ކަމަށެވެ.

އެހެންކަމުން، އެފަދައިން ރައީސުލްޖުމްހޫރިއްޔާއަށް ފާޑުކިޔުމުގެ މިނިވަންކަން އޮންނަން ޖެހޭނެކަމަށް އީވާ ވިދާޅުވި އެވެ.

އެ ވާހަކަތަކާއި ގުޅިގެން އަސްލަމް ވިދާޅުވީ އަބުރު ކަތިލުމާއި ދޮގު މަޢުލޫމާތު ފެތުރުމަކީ މީޑިއާގެ މިނިވަންކަމެއް ނޫން ކަމަށެވެ. އަދި މީހުންގެ އަބުރު ކަތިލާ، މީހުންނާއި ދޭތެރޭ ނަފްރަތު އުފެދޭ ޒާތުގެ ކަންކަން ކުރުމަކީ ސިޔާސީ އުކުޅެއްކަމަށް ޤަބޫލު ނުކުރައްވާކަމަށެވެ.

"ދެކެވެމުން މިދާ ވާހަކައަކީ ހިތު ހުރި އެއްޗެއް ގޮވަންވީ އޭ! ނޫން! ކޮންމެ މީހެއްގެ ވެސް އަބުރަކާއި އިއްޒަތެއް އޮންނާނެ. އަދި އެއީ ސިޔާސީ އުކުޅެއްކަމުގައި އަޅުގަނޑު ނުދެކެން"

އެމްޑީޕީގެ ޕީޖީ ލީޑަރު އަސްލަމް

ޗެނަލް-13 އަށް ފިޔަވަޅު އަޅައިގެން މަޖިލީހަށް ހުށައެޅީ ކުއްލި މައްސަލައެއްކަމަށް ގަބޫލުފުޅު ނުކުރައްވާކަމަށާއި، މަޖިލީހުގެ ރިޔާސަތުން ވޯޓަށް އެހުމުން އެ މައްސަލަ ބޭރުކޮށްލަން ވޯޓު ނުދީ އެ ސަބަބާއި ހުރެކަން އަސްލަމް ފާހަގަކުރެއްވި އެވެ.

އެއާއެކު އަސްލަމް ވިދާޅުވީ މި ސަރުކާރުން މީޑިއާގެ ޒިންމާތަކަށް ހުރަސްއަޅަމުން ނުދާކަމަށެވެ.

އެހެން ނަމަވެސް މީޑިއާގެ ނަހަަމަ ބޭނުންކޮށް، މީހުންގެ އަބުރު ކަތިލާ ފިތުނަ އުފެއްދުމަކީ ޖާގަދެވިގެންދާނެ ކަމެއްކަމަށް ދެކިވަޑައިނުގަންނަވާކަމަށް އަސްލަމް ވިދާޅުވި އެވެ.