ޙިިޔާލު ފާޅުކުރުމުގެ މިނިވަންކަން ނެތްނަމަ ވަކިވި މެމްބަރުނަށް މަޖިލީހަށް ނުވަދެވޭނެ: ނިޔާޒް

ޙިޔާލު ފާޅުކުރުުމުގެ މިނިވަންކަމާއި ސިޔާސީ މިނިވަންކަން ނެތްނަމަ އެމްޑީޕީ އިން ވަކިވި 12 މެމްބަރުން ތިއްބަވާނީ މަޖިލީހަށް ނުވަދެވިފައި ކަމަށް ހުޅުމާލެ ދާއިރާގެ މެމްބަރު އަލީ ނިޔާޒް ވިދާޅުވެއްޖެއެވެ.

ނިޔާޒް މިހެން ވިދާޅުވެފައި ވަނީ މިއަދުގެ މަޖިލީހުގައި ވާހަކަފުޅު ދައްކަވަމުންނެވެ.

ނިޔާޒް ވިދާޅުވީ އިންތިޚާބެއްގެ ސައްހަކަން ކަށަވަރުކުރެވެނީ ވަށައިގެން ހުންނަ ހުރިހާ ކަމަކާ އެކުގައިކަމަށެވެ.  އެހެންކަމުން, އިންތިޚާބު ބާއްވަން ތިން މަސް ދުވަހަށް ވެފައިވާއިރު، މިއަދު އިންތިޚާބަށް ހުރަސްއެޅޭފަދަ އެއްވެސް ކަމެއް ނެތްކަމަށް އޭނާ ވިދާޅުވިއެއެވެ. އަދި އިންތިޚާބަށް ހުރަސްއެޅޭ ކަަމަށް ބުނެ ބައެއް ފަރާތްތަކުން މަސައްކަތްކުރަނީ ކޮން މިނިވަންކަމެއް ނުލިބިގެންތޯ އޭނާ ސުވާލުކުރެއްވިއެވެ.

"2018  ވަނަ އަހަރުގެ ރިޔާސީ އިންތިޙާބަށް ދިޔައިރު، އިންތިޚާބަށް ކުރިމަތިލާން ހިތު ނިޔަތް ގަތަ މީހަކު ވިޔަސް ހުރީ ޖަލުގައި، މިއަދު އެހްންތޯ? މިއަދު ކިތައް ކެނޑިޑޭޓުންތޯ އެތިއްބެވީ، ސަރުކާރުގެ ތެރޭގަ ތިއްބެވި ބޭފުޅުވެސް އެކަމުފެ ޝައިޤުވެރިކަން އޮތީމަ އެކަން ކުރައްވަނީ، ޕާޓީގައި ތިއްބަވައިގެން ޕާޓީގެ ޕްރައިމަރީގައި ވާދަކުރެއްވުމަށް ފަހު ނާކަމިޔާބުވެވަޑައިގަތުމުން، ވަކިން ޕާޓީއެއް ހައްދަވައިގެންވެސް ރިޔާސީ އިންތިޚާބަށް ކުރިމަތިލެއްވުމުގެ މަސައްކަތް ދަނީ ކުރައްވަމުން"

ނިޔާޒް ވިދާޅުވިއެވެ.

ނިޔާޒް ވިދާޅުވީ އެކަން އެގޮތަށް ކުރެވެނީ އެ މާހައުލު ފަހިކޮށްދީފައި އޮތުމުން ކަަމަށާއި، އެހެން ނޫންނަމަ އެމްޑީޕީން ވަކިވި 12 މެންބަރުންނަށް މަޖިލީހަށް ނުވަދެވޭނެކަަމަށް އޭނާ ވިދާޅުވިއެވެ.

މަޖިލިސް ބަހުސްގައި ވާހަކަފުޅު ދައްކަވަމުން ނިޔާޒް އިތުރަށް ވިދާޅުވީ މިއަދު މަޖިލީހުގައި އެމްޑީޕީން ވަކިވި މެންބަރުން ތިބީ މިނިވަންކަމާއެކު ޑިމޮކްރަސީގެ ވާހަކަދައްކަން ކަމަށެވެ. މެޖޯރިޓީއަށް ތަބާވުމަކީ ޑިމޮކްރަސީގެ ހަމަކަމަށާއި އެ ވާހަކަ ދެއްކުމުން، އެއީ ހިޓުލަރުގެ އުސޫލު ކަމަށް ބުނުމަކީ ފަހަތަށް ދިއުން ކަމަށް ނިޔާޒް ވިދާޅުވިއެވެ.

ކުރިއާ ޚިލާފަށް، ސިޔާސީ ގޮތުން ފާޑުކީ އެއްވެސް މީހަކާމެދު ފިޔަވަޅު ނާޅާކަމަށް ނިޔާޒް ވިދާޅުވިއެވެ. ނިޔާޒް ވަނީ ޑިމޮކްރަސީގައި އިންތިޚާބުގެ ނަތީޖާ ބަލައިގަންނަން އެނގެންޖެހޭ ކަމަށާއި އެކަން ކުރެވެން ވާނެ ކަަމަށްވެސް ވިދާޅުވެފައެވެ.