ކާޑެއްދޫ އެއާޕޯޓް އިންޓަނޭޝަނަލް ކޮށް، ވިލިނގިލީގައި ވެސް އިންޓަނޭޝަނަލް އެއާޕޯޓެއް އަޅާނަން: ޑރ.މުއިއްޒު

އިންޓަނޭޝަނަލް 2 އެއާޕޯޓު ތަރައްގީކޮށް ހުވަދު އަތޮޅަކީ އިންޓަގްރޭޓެޑް ޓުއަރިޒަމް ޒޯނަމަށް ހަދައި، 10000 ޓުއަރިސްޓު އެނދު ހުވަދޫގައި ތަރައްގީކުރައްވާނެ ކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުޙައްމަދު މުއިއްޒު ވިދާޅުވެއްޖެ އެވެ.

ޑރ މުއިއްޒު މިފަދައިން ވިދާޅުވެފައި ވަނީ ހުވަދު އަތޮޅަށް އެމަނިކުފާނު ކުރެއްވި ރިޔާސީ ކެމްޕޭނު ދަތުރުފުޅުގައި، ގއ ވިލިގިލީގައި ބޭއްވި ކެމްޕޭނު ޖަލްސާގައި ވާހަކަދައްކަވަމުން ނެވެ.

ޕްރޮގްރެސިވް ކޮންގްރެސް ކޯލިޝަންގެ ވެރިކަމެއްގައި، މާލެ ސަރަހައްދުގެ އިތުރުން ރާއްޖޭގެ އުތުރާއި ދެކުނުގައި ތަރައްގީގެ ޒޯނުތަކެއް ހެދުމަށް ނިންމާފައިވާއިރު، ދެކުނުގައި އެ ޒޯނު ކަނޑައަޅާނީ އައްޑޫ ސިޓީއާއި ފުވައްމުލަކު ސިޓީގެ އިތުރުން ހުވަދު އަތޮޅު ހިމެނޭގޮތަށް ކަން ޑރ މުއިއްޒު ފާހަގަކުރެއްވި އެވެ.

އެ ޒޯނުތައް ވެގެންދާނީ އިގްތިޞާދީ، އިޖްތިމާއީ އަދި އުމުރާނީ ތަރައްގީގެ އެންމެ މަތީ ފަންތީގެ ފެސެލިޓީސްތައް ގާއިމްކުރެވިފައިވާ ޒޯނުތަކަކަށް ކަމަށް ޑރ މުއިއްޒު ވިދާޅުވި އެވެ.

އެގޮތުން އެ މަސައްކަތް ކުރުމަށްޓަކައި، އެ ޒޯނުގައި ހިމެނޭ ގއ އަދި ގދ އަތޮޅަކީ އިންޓަގްރޭޓެޑް ޓުއަރިޒަމް ޒޯނަކަށް ހަދައި ހުވަދުއަތޮޅުގައި 10000 ޓުއަރިސްޓު އެނދު ގާއިމްކުރައްވާނެކަމަށް ޑރ މުއިއްޒު ވަނީ ވިދާޅުވެފަ އެވެ.

"މި އަތޮޅަށް (ހުވަދު އަތޮޅަށް) ޓުއަރިޒަމް ގެނައުމުގައި މިހާރަށްވުރެ ޓުއަރިޒަމް ފުޅާކުރުމުގެ ފުރުސަތު އިންތިހާއަށް އެބޮތް. 10000 އެނދުގެ އެކްސްޕެންޝަންއެއް ގެނައުން އަޅުގަނޑުމެންގެ ޕްލޭނުގައި އޮތީ، އޭގެ ތެރޭގައި އިންޓަގްރޭޓެޑް ޓުއަރިޒަމް އަދި ލޯކަލް ޓުއަރިޒަމް ހިމެނޭ"

ޑރ މުހައްމަދު މުއިއްޒު

އެކަން ފާހަގަކުރައްވާ ޑރ މުއިއްޒު ވިދާޅުވީ ފަތުރުވެރިކަމުގެ ސިނާއަތު ފުޅާކުރާއިރު، އަތޮޅުގައި އިންޓަނޭޝަނަލް އެއާޕޯޓެއް ތަރައްގީކުރުމަކީ ވެސް ކުރަންޖެހޭ މުހިންމު މަސައްކަތެއް ކަމަށް ދެކިވަޑައިގަންނަވާ ކަމަށެވެ.

އެކަން ކުރުމަށްޓަކައި ގދ ކާޑެއްދޫ އެއާޕޯޓު އިންޓަނޭޝަނަލް އެއާޕޯޓަކަށް ހެދުމުގެ އިތުރުން، މިހާރު ކޫއްޑޫގައި މި އޮތް އެއާޕޯޓަކީ ޓްރެއިނިން އެއާޕޯޓަކަށް ބަދަލުކޮށް ވިިލިގިލީގައި އިންޓަނޭޝަނަލް އެއާޕޯޓެއް ތަރައްގީކުރައްވާނެ ކަމަށް ޑރ މުއިއްޒު ވިދާޅުވި އެވެ.

"އަޅުގަނޑުމެންގެ ތަރައްގީގެ ޕްލޭނުގައި އެކަން އޮތް ގޮތަކީ މިހާރު ކޫއްޑޫގައި މި އޮތް އެއާޕޯޓަކީ ޓްރެއިނިން އެއާޕޯޓަކަށް ބަދަލުކޮށް ވިލިގިލީގައި އަޅުގަނޑުމެންގެ ވިސްނުމުގައި މި އޮތީ މިތާ ކައިރީ މިއޮތް އެކަފަރު ހިމެނޭގޮތަށް ވިލިގިލީގައި އިންޓަނޭޝަނަލް ފެންވަރުގެ އެއާޕޯޓެއް އެޅުން"

ޑރ މުހައްމަދު މުއިއްޒު

ޑރ މުއިއްޒު ވިދާޅުވީ އެއާޕޯޓާއެކު ހުވަދުއަތޮޅުގައި އިންޓަގްރޭޓެޑް ޓުއަރިޒަމްގެ ބޮޑު މަޝްރޫއެއް ވެސް ހިނަގަވާނެ ކަމަށެވެ.

ޑރ މުއިއްޒު ވިދާޅުވީ އެމަނިކުފާނު އެ އިއުލާނުކުރެއްވި ޕްލޭނަކީ ރައީސް ޔާމިނުގެ ތަސައްވުރުކަމަށެވެ. އެމަނިކުފާނު ވަނީ މީގެކުރިން މިފަދައިން ވައުދުވެވަޑައިގެންފައި ކަމަށެވެ. އަދި އެކަން ކުރައްވާނެ ގޮތް ވެސް ކަނޑައަޅުއްވާފައި ކަމަށެވެ.

އެހެންކަމުން އެއީ ނުކުރެވޭނެ ކަމެއް ނޫން ކަމަށާއި، އަދި އެއީ ހަމަ ހުރެފައި ދައްކަވާ ވާހަކަތަކެއް ވެސް ނޫންކަމަށް ޑރ މުއިއްޒު ވިދާޅުވި އެވެ. އަދި ވިދާޅުވީ އެމަނިކުފާނު ބޭނުންފުޅުވަނީ ރައްޔިތުން އިތުބާރުކުރައްވާ ރައްޔިތުންނަށް ޚިދުމަތްކުރައްވާނެ ފުރުސަތު ދެއްވުން ކަމަށެވެ.

އެ ފުރުސަތު ދެއްވައިފިނަމަ ވައުދުތައް ފުއްދަވާ ރައްޔިތުން ބޭނުންވާ ތަރައްގީ ރާއްޖެއަށް ގެނެސްދެއްވާނެކަމުގެ ފުރިހަމަ ޔަގީންކަން ދެއްވާކަމަށް ޑރ މުއިއްޒު ވިދާޅުވި އެވެ.