އަލިފުށީ އެއާޕޯޓުގެ މަސައްކަތް މިހާރަށްވުރެ ހަލުވި ސްޕީޑުގައި ނިންމާނަން: ޑރ މުއިއްޒު

މި ސަރުކާރުން ފެށި ނަމަވެސް، އަލިފުށީ އެއާޕޯޓުގެ މަސައްކަތް މިހާރަށްވުރެ ހަލުވި ސްޕީޑުގައި ކުރިއަށް ގެންގޮސް ނިންމާދެއްވާނެކަމަށް ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓު ޑރ މުހައްމަދު މުއިއްޒު ވިދާޅުވެއްޖެ އެވެ.

ޑރ މުއިއްޒު މިފަދައިން ވިދާޅުވެފައި ވަނީ ރ އަތޮޅަށް އެމަނިކުފާނު ކުރައްވާ ރިޔާސީ ކެމްޕޭނު ދަތުރުފުޅުގައި އެ އަތޮޅު އަލިފުއްޓަށް ވަޑައިގެން އެ ރަށުގެ ރައްޔިތުންނާއި މުޚާތަބުކުރައްވާ ވާހަކަދައްކަވަމުން ނެވެ.

އެ ޖަލްސާގައި ވާހަކަދައްކަވަމުން ޑރ މުއިއްޒު ވިދާޅުވީ މި ސަރުކާރުން ފެށި ނަމަވެސް އަލިފުށީގައި އެއާޕޯޓު އެޅުމަކީ ޕްރޮގްރެސިވް ކޮންގްރެސް ކޯލިޝަނުން ބޭނުންވި، އެ ކޯލިޝަންގެ ތަސައްވުރެއް ކަމަށެވެ.

އެހެންކަމުން، މި ވެރިކަން ބަދަލުވި ނަމަވެސް އެއާޕޯޓުގެ މަސައްކަތް ހުއްޓާނުލާނެ ކަމަށާއި، އެއާޕޯޓުގެ މަސައްކަތް މިހާރަށް ވުރެ ހަލުވި ސްޕީޑުގައި ކުރިއަށް ގެންގޮސް ނިންމާލައްވަނެ ކަމަށް ޑރ މުއިއްޒު ވިދާޅުވި އެވެ.

"މި ރަށުގެ (އަލިފުށީ) އެއާޕޯޓު މަޝްރޫއަކީ އެބޭފުޅުންނަށް ވުރެ ބޮޑަށް އަޅުގަނޑުމެން ތި ބޭފުޅުންނަށްޓަކައި ކޮށްދޭން ބޭނުންވާ ކަމެއް. މިހާރަށްވުރެ ފުރިހަމަކޮށް މިހާރަށް ވުރެ ބާރަށް ގެންގޮސް އިރާދަކުރެއްވިއްޔާ އެއާޕޯޓުގެ މަސައްކަތް ނިންމާ، އެ ހުވަފެން ހަގީގަތަކަށް ހަދައިދޭނަން"

ޑރ މުހައްމަދު މުއިއްޒު

ޑރ މުއިއްޒުގެ ވާހަކައިގައި ވަނީ ޕްރިގްރެސިވް ކޮންގްރެސް ކޯލިޝަންގެ ވެރިކަމެއްގައި އަލިފުއްޓަށް ކޮށްދެއްވާނެ އިތުރު ކަންކަން ވެސް ހާމަކުރައްވާފަ އެވެ. އޭގެ ތެރޭގައި ހިމެނެނީ:

1. ސިނާއީ މަސައްކަތް ކުރުމަށް ބިން އިތުރުން

2. ބޭންކު ބުރާންޗެއް ހުޅުވާ ޚިދުމަތް ދޭން ފެށުން

3. އަލިފުށީ ސިއްހީ މަރުކަޒު ހޮސްޕިޓަލަކަށް ބަދަލުކޮށް ޚިދުމަތް ފުޅާކުރުން

4. ފުޓުބޯޅަ ދަނޑާއެކު ޒުވާނުންނަށް ބޭނުންވާ ކުޅިވަރު ވަސީލަތްތައް ގާއިމްކޮށްދިނުން

5. ކުނި މެނޭޖުކުރުމުގެ ނިޒާމު ގާއިމްކުރުން

ޑރ މުއިއްޒު ވިދާޅުވީ މި ސަރުކާރު ބަދަލުވެއްޖެ ނަމަ މިހާރު ފަށާފައިވާ މަޝްރޫއުތައް ހުއްޓާލާނެކަމަށް ބުނެ ސަރުކާރަށް ނިސްބަތްވާ ފަރާތްތައް ވާހަކަދައްކަވަމުން ދަނީ ރައްޔިތުންގެ ހިތުގައި ބިރުވެރިކަން އުފެއްދުމަށް ކަމަށެވެ. އެއީ އެ ފަރާތްތަކުން ކުރައްވާ ވަރަށް ނާ ތަހުޒީބު އަމަލެއްގެ ގޮތުގައި ޑރ މުއިއްޒު ސިފަކުރެއްވި އެވެ.

އެއާއެކު އެމަނިކުފާނު ވިދާޅުވީ މިހާރު ފަށާފައިވާ އެއްވެސް މަޝްރޫއަކީ ރައްޔިތުންނަށް ފައިދާ ކުރަނިވި މަޝްރޫއެއް ކަމަށްވާނަމަ އެކަން ހުއްޓާނުލައްވާ، މިހާރަށްވުރެ ބާރު ސްޕީޑުގައި ނިންމާދެއްވާނެ ކަމަށެވެ. އަދި މި ސަރުކާރުން ވަޒާފާދިން އެއްވެސް މީހަކު ވަޒީފާއިން ވަކިނުކުރާނެ ކަމަށާއި، އެކަމާއި ރައްޔިތުން ބިރުނުގަތުމަށް ޑރ މުއިއްޒު ވަނީ އެދިވަޑައިގެންފަ އެވެ.

ޑރ މުއިއްޒު ވިދާޅުވީ ޕްރޮގްރެސިވް ކޮންގްރެސް ކޯލިޝަންގެ ޓީމު އޮތީ ރައްޔިތުންނަށް ޚިދުމަތްކޮށްދިނުމަށް ތައްޔާރަށް ކަމަށެވެ. އަދި އެ ފުރުސަތު ރައްޔިތުން ދެއްވައިފިނަމަ ނަތީޖާ ނެރެދެއްވާނެކަމަށް ޑރ މުއިއްޒު ވިދާޅުވި އެވެ.