ރައީސް ޞާލިހު ވެރިކަމަށް ގެނައީ ގާބިލު ވީމައެއް ނޫން؛ އެ ނޫން ގޮތެއް ނެތީމާ: ގާސިމް

2018 ވަނަ އަހަރު، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވެރިކަމަށް ގެންނަން ގުޅިފައިވާ ކޯލިޝަނުން ނިންމީ އެ ނޫން އެހެން ގޮތެއް އޭރު ނެތުމުން ކަމަށާ، އެއީ އެމަނިކުފާނަކީ އެކަމަށް އެންމެ ގާބިލު މީހާއަށް ވީމާ ނިންމި ނިންމުމެއް ނޫން ކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ގާސިމް އިބްރާހިމް ވިދާޅުވެއްޖެއެވެ.

ރިޔާސީ ކެންޕެއިނަށް ބ ތުޅާދޫ އަށް ވަޑައިގެން އެ ރަށު ރައްޔިތުންނާ ބައްދަލު ކުރައްވާ ވާހަކަ ދައްކަވަމުން ގާސިމް ވިދާޅުވީ، އަދުގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހަށް ވެރިކަން ހޯދާދިނުމަށް މަސައްކަތް ކުރެއްވީ، އެމަނިކުފާނު އެ މަސައްކަތް އަމާނާތްތެރިކަމާއެކު ކުރައްވާނެ ކަމަށުގެ އުއްމީދުގައި ކަމަށެވެ.

އިބްރާހީމް މުހައްމަދު ޞާލިހު ވެރިކަމަށް ގެނެވުނީމާ، ދެން އަޅުގަނޑުމެންނަށް ވަރަށް އަމާނާތްތެރިކަމާއެކީގައި، ވަރަށް އިޚްލާޞްތެރި މަސައްކަތްތަކެއް އަޅުގަނޑުމެންގެ ގައުމަށް ކޮށްދެއްވާނެ ކަމަށް. އެ އުއްމީދުގައި (ވެރިކަމަށް ގެނައީ)

ގާސިމް އިބްރާހިމް

އަދި އެމަނިކުފާނު ވެރިކަމަށް ގެނައީ އެނޫން އެހެން ގޮތެއް ނެތުމުން ކަމާއި، އެއީ އެންމެ ގާބިލު ބޭފުޅާ ކަމަށް ވުމުން ނޫން ކަމަށްވެސް ގާސިމް ވިދާޅުވި އެވެ.

އަޅުގަނޑުމެންނަށް އެހެން ގޮތެއް ނެތުނީމާ، އަޅުގަނޑުމެން އެންމެން ވެގެން، އިއްތިފާގުން ކޮންމެސް މީހަކު ނެރެން ވެގެން، އޭރުވެސް އެންމެ ބޮޑު ޕާޓީ ކަމަށް ވިސްނޭ ޕާޓީގެ ކެންޑިޑޭޓެއް ނެރެން ވެގެން (ރައީސް ޞާލިހު) ނެރުނީ. އެއްގޮތަކަށްވެސް އެއީ އެންމެ ގާބިލް މީހާއަށް ވީމައެއް ނޫން. މިއަދު އޭނާގެ ހުރި ނާގާބިލުކަން އަޅުގަނޑުމެންނަށް ފެނިގެން ހިގައްޖެ. ޚިޔާނާތްތެރިކަން އަޅުގަނޑުމެންނަށް ތަސައްވުރު ކުރެވިއްޖެ. އަޅުގަނޑު (މިހެން) މި ދަންނަވަނީ ވަރަށް ސާފުކޮށް ކެރި ހުރެ.

ގާސިމް އިބްރާހިމް

އެހެންނަމަވެސް، އެމަނިކުފާނަށް ވެރިކަން ހަވާލު ކުރުމުން މި ގައުމު އިންޑިއާގެ އަޅުވެތި ކަމަށް ދާ ކަމަށާ، ވެރިކަމަށް ކުރިމަތި ލެއްވީ، އެތަން ބަލަން ނުހުރެވިގެން އެތައް ބައެއްގެ އާދޭސް ތަކާއި ހުރެ ކަމަށް ގާސިމް ވިދާޅުވި އެވެ.

ގާސިމް އިބްރާހިމް ވިދާޅުވީ ގައުމުގެ މިހާރުގެ ހާލަތާއި މިސަރުކާރުގެ އަމަލުތަކުގެ ސަބަބުން ލިބުނު ނިކަމެތިކަމުގެ ވާހަކަ ރައްޔިތުންނަށް އެނގިތިބެ ސެޕްޓެމްބަރ 9 ވަނަ ދުވަހު ނަގާ ވޯޓުގައި އެހެންގޮތަކަށް ނިންމާފިނަމަ އެކަމުގެ ސަބަބުން ގައުމަށް ލިބޭނެ ނިކަމެތިކަން ވަޒަންނުކުރެވޭނެ ކަމަށެވެ. އަދި ރައީސް ޞާލިހު ދެވަނަ ދައުރަކަށް އިންތިހާބު ކުރުމަކީ އަޅުވެތި ކަމަށް އެނބުރި ދިޔުން ކަމަށްވެސް އެމަނިކުފާނު ވިދާޅުވި އެވެ.