ހަމަނުޖެހުން ހިންގާނެކަމުގެ އިންޒާރު ރައީސް ޞާލިހު ދެއްވި ކަމަށްބުނެ އެކަން ކުށްވެރިކޮށްފި
ރިޔާސީ އިންތިޚާބުގައި ދެވަނަ ބުރަކަށް ދާންޖެހިއްޖެނަމަ ޤައުމު ހަމަނުޖެހުމަކަށް ހިނގައިދާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވުމުން އެއީ ހަމަނުޖެހުން ހިންގާނެ ކަމަށް ރައީސް ރައްޔިތުންނަށް ދެއްވި އިންޒާރެއް ކަމަށްބުނެ ޑިމޮކްރެޓްސްގެ އިންތިޚާބީ ތަރުޖަމާނު އިމްތިޔާޒް ފަހުމީ އެކަން ކުށްވެރިކުރައްވައިފިއެވެ.
މާފަންނު އުތުރު ދާއިރާގެ މަޖިލިސް މެމްބަރު އިމްތިޔާޒް މިހެން ވިދާޅުވީ ޑިމޮކްރެޓްސްއިން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ.
ތ.އަތޮޅަށް ކުރެއްވެވި ދަތުރު ފުޅިގައި ކިނބިދޫގައި ދެއްކެވި ވާހަކަފުޅުގައި ރައީސް ޞާލިޙް ވިދާޅުވީ ރިޔާސީ އިންތިޚާބުގެ ދެވަނަ ބުރަކަށް ދާން ޖެހިއްޖެނަމަ ޤައުމު ހަލަބޮލިކަމެއްގެ ތެރެއަށް ހިނގައިދާނެ ކަމަށާއި، އެކަން އެހެން ވިޔަނުދިނުމަށްޓަކައި އެމަނިކުފާނަށް ވޯޓި ދެއްވުމަށެވެ.
އިއްޔެ ކިނިބިދޫގައި ރައީސް މިހެން ވިދާޅުވެފައި ވަނިކޮށް އިމްތިޔާޒް މިއަދު ބޭއްވެވި ނޫސްވެރިންގެ ބައްދަލުވުމުގައި ވިދާޅުވީ ދެވަނަ ބުރަކަށް ގޮސްފި ނަމަ ރާއްޖޭގައި ހަމަ ނުޖެހުން ހިންގާނެކަމަށް ރައީސް ޞާލިޙް ވިދާޅުވެފައިވާކަމަށާއި އެކަން ސިފަވަނީ އިންޒާރެއް ދެއްވިގޮތަށް ކަމަށެވެ.
އަދި އެފަދައިން ވިދާޅުވީ ކޮން ސަބަބަކާހުރެކަން ސާފުކޮށް ނުދެއްވާ އެއީ ރައީސް ޞާލިޙް ދެއްވި އިންޒާރެއްކަމަށް ގަބޫލު ކުރެވޭ ކަމަށާއި އެކަން ކުށްވެރިކުރައްވާ ކަމަށް އިމްތިޔާޒް ވިދާޅުވިއެވެ.
އިމްތިޔާޒް އިތުރަށް ވިދާޅުވީ ދެވަނަ ބުރަކަށް ދިޔަ ނަމަވެސް ހަމަ ނުޖެހުމެއް ހިނގައިގެން ނުވާނެކަމަށާއި ރައީސް ޞާލިޙް ރައީސް ކަމުގައި ހުންނަވާ އެ ޒިންމާ ނުވަތަ މަސްއޫލިއްޔަތު އަދާ ކުރެވޭ ނަމަ ހަމަ ނުޖެހުމެއް ހިންގަން ޖާގަ ދެއްވައިގެންވެސް ނުވާނެކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
