އަމީނީމަގު ހެދުމުގެ މަޝްރޫޢު ކުރިއަށް ގެންދެވެން އޮތީ ގަސް ކަނޑައިގެން: މިއުވާން

އަމީނީ މަގަކީ ކޮންމެހެންވެސް ހަދަން ޖެހިފައިވާ މަހެއް ކަމަށާ، އެމަގު ހެދުމުގެ މަސައްކަތް ކުރިއަށް ގެންދެވެން އޮތީ މަގުގައި ހުރި ބައެއް ގަސްތައް ކަނޑައިގެން ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.

ރައީސް އޮފީހުގެ ތަރުޖަމާނު، މިއުވާން މިއަދު ކުރިއަށް ގެންދެވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވިދާޅުވީ، ގަސްތައް ކެނޑުމަކީ އެއްވެސް މީހަކު ބޭނުންވާނެ ކަމެއް ނޫން ކަމަށެވެ. އެހެން ނަމަވެސް، މަޝްރޫއުތައް ކުރިއަށްދާއިރު ކުރިމަތިވާ ދަތިތައް ހައްލު ކުރުމަށް ބައެއް ގަސްތައް ކަނޑަންޖެހޭ ކަމަށެވެ.

"ބައެއް މަޝްރޫއުތައް ކުރިއަށްދާއިރު ކޮންމެވެސް ވަރަކަށް އެބަޖެހޭ މިކަހަލަ ބައެއް ކަންކަންވެސް އެބަ ހިނގާ. ދެން، މިގަސްތައް މި ކަނޑަނީ، ހަގީގަތުގައި އަޅުގަނޑުމެންނަށް މިހާރު މައުލޫތު ލިބިފައިވާ ގޮތުގައި، މޫ ތަކާއި އެއްޗެހި ހުރިގޮތުން މަގުގައި ހޮޅި ވަޅުލުމާއި މިކަންކަމަށް ވަރަށް ބޮޑު ދަތިތައް ދިމާވޭ. އެނގި ވަޑައިގަންނަވާނެ އަމީނީ މަގުގައި އިންދާފައި ހުރި ގަސްތަކަކީ އާއްމު ގޮތެއްގައި މިކަހަލަ މަގުތަކުގައި އިންދާ ގަސްތަކަަށްވުރެ ތަންކޮޅެއް ތަފާތު ގަހެއް." މިއުވާން ވިދާޅުވިއެވެ.

މީގެ އިތުރުން އަމީނީމަގު ހަދާއިރު ގަސްތައް ކަނޑަންޖެހެނީ މަގުގެ ދުވާރުގައި ވީލް ޗެއާރ ދުއްވާ ފަރާތްތަކާއި އަދި ހަމައެހެންމެ ލޯފަން މީހުންނަށް ވެސް މަގުގެ ބޭނުން ހިފޭނެ ގޮތް ހެދުމަށްޓަކައި ކަމަށް މިއުވާން ވިދާޅުވިއެވެ. އަދި ގަސްތައް މިހާރު އެ ހުރި ތަނުގައި ހުރި ނަމަ އޭގެ ސަބަބުން ދަތި ތަކާއި ކުރި މަތިވާނެ ކަމަށްވެސް އޭނާ ވިދާޅުވިއެވެ.

މިއުވާން ވިދާޅުވީ، އަމީނީ މަގު ހެދުމަކީ ކޮންމެ ގޮތެއްގައި ވެސް ކުރަންޖެހިފައިވާ ކަމެއް ކަމަށެވެ. އެހެންކަމުން އެކަން ކުރުމަށް ގަސްތައް ކަނޑާލަން ޖެހޭ ކަމަށާ، އަދި އެގަސްތައް ކެނޑުމަށްފަހު އުކާލުމުގެ ބަދަލުގައި އެހެން ތަނެއްގައި ގަސްތައް އިންދުމުގެ މަސައްކަތް ވެސް ކުރިއަށްދާނެ ކަމަށް ވިދާޅުވިއެވެ. އަދި އެ މަގު ހަދައި ނިމުމަށްފަހު މަގު ފެހި ކުރުމުގެ މަސައްކަތް ވެސް ކުރިއަށްދާނެކަން އޭނާ ފާހަގަކުރެއްވިއެވެ.

މިއަުވާން މިފަދައިން ވިދާޅުވެފައި ވާއިރު، އަމީނީމަގު ޒަމާނީ ފެންވަރަށް ތަރައްގީ ކުރުމަށް ކުރަމުންދާ މަސައްކަތުގެ ތެރެއިން އެމަގުގައި ހުރި ބައެއް ބިޔަ ގަސްތައް ކަނޑަމުންދާތީ އެކަން ހުއްޓުވުމުގެ އަމުރަކަށް އެދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފަރާތުން ކޯޓަށް ހުށަހެޅުއްވުމަށް ވެސް ހަމަޖެހިފައިވާ ކަމަށް، ނަޝީދުގެ ފަރާތުން މައްސަލަ ކޯޓަށް ހުށަހަޅަން ނިންމާފައިވާކަން ހާމަކޮށް ޝުނާނާ އެންޑް ކޯ އެލްއެލްޕީން ވަނީ ބުނެފައެވެ.