އެމްޕީއެލްގެ މަސައްކަތްތެރިންނަށް، މުޢިއްޒު ދެއްވީ ކަންބޮޑުވުންތަކަށް ދާއިމީ ހައްލެއް ގެންނަވާނެކަމުގެ ޔަގީންކަން!
މަޖޫރީންނާއި ޑްރައިވަރުން ހިމެނޭ ގޮތަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ގައި މަސައްކަތް ކުރާ މުވައްޒަފުންނަށް ދިމާވެފައި ހުރި ދަތިތަކަށް ދާއިމީ ހައްލެއް ހޯއްދަވައި ދެއްވާނެ ކަމުގެ ޔަގީންކަން އިދިކޮޅު ޕީޕީއެމް/ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ދެއްވައިފި އެވެ.
އިއްޔެ ހަވީރުގެ ވަގުތެއްގައި މުއިއްޒު ވަނީ އެމްޕީއެލް ސަރަހައްދަށް ވަޑައިގެން، އެމްޕީއެލްގެ މަޖޫރީންނާއި، ޑްރައިވަރުން އަދި އެހެނިހެން މުވައްޒަފުން ހިމެނޭހެން އެންމެނާއި ބައްދަލު ކުރައްވައި އެމީހުންގެ ކަންބޮޑުވުން ތައް އަޑު އައްސަވާފައެވެ.
އަދި އެމީހުންގެ އެ ހުރި ކަންބޮޑުވުންތަކާއި ގުޅިގެން ވާހަކަ ދައްކަވަމުން މުޢިއްޒު ވަނީ އެތަނުގައި މަސައްކަތްކުރާ ފަރާތްތަކުގެ ކަންބޮޑުވުންތަކަށް ދާއިމީ ހައްލެއް ގެނެސްދެއްވާނެ ކަމަށް ވިދާޅުވެފައެވެ.
އެގޮތުން މަސައްކަތުގެ މާހައުލަށް ގެންނަން ޖެހޭ ހެޔޮ ބަދަލުތަށް ގެނެސް، އިމާރާތުގެ ފެންވަރު ރަނގަޅު ކޮށްދީ ޕާކިންގ މައްސަލައަށް ހައްލެއް ހޯދައިދެއްވާނެ ކަމަށް މުޢިއްޒު ވިދާޅުވިއެެވެ.
މިއާއެކު މުޢިއްޒު ވަނީ އެކިއެކި ކުންފުނިތަކުގައި މަސައްކަތްކުރާ މުވައްޒަފުންވެސް އެމަނިކުފާނަށް އިތުބާރު ކުރެއްވުމަށް އެދިލައްވާފައެވެ. އަދި އެ މުވައްޒަފުންނާއި ބައްދަލު ކުރައްވާވެސް މުއިއްޒު ވަނީ، މާލޭގައި ވިޔަސް ރަށެއްގައި ވިޔަސް ސިޔާސީ މަޤާމްތަކުން ފިޔަވައި އެހެން އެއްވެސް ވަޒީފާއަކުން މީހަކު ވަކި ނުކުރައްވާނެ ކަމުގެ ޔަގީންކަން އެ ފަރާތްތަކަށް ދެއްވާފައެވެ.
އޭގެ ބަދަލުގައި މަސައްކަތުގެ މާހައުލަށް ގެންނަންޖެހޭ ހެޔޮ ބަދަލުތައް ގެނެސް އިތުރު ވަޒީފާތައް އުފައްދާ އާމްދަނީ އިތުރުވާނެ ގޮތް އެމަނިކުފާނު ހަމަޖައްސަވައިދެއްވާނެ ކަމަށާ، ހުރިހައި ރައްޔިތުންނަކީ ވެސް އަމިއްލަ ފައިމައްޗަށް ތެދުވެވޭ ފުދުންތެރި ބަޔަކަށް ހަދައިދެއްވާނެ ކަމަށް މުޢިއްޒު ވަނީ ވިދާޅުވެފަ އެވެ.
ހަމައެހެންމެ، ގެދޮރުވެރިކަން ޔަގީންކުރުމަށް ހިންގާ މަޝްރޫޢުގައި އެއްވެސް ތަފާތު ކުރުމެއް ނެތި ހުރިހާ ރައްޔިތުންނަށް ގެދޮރުވެރިކަން ކަށަވަރުކޮށްދެއްވަން ވެ ވަޑައިގެންނެވި ވަޢުދުވެސް މުޢިއްޒު ވަނީ ތަކުރާރު ކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
