ކުރިއަށްއޮތް އަހަރަށް ލަފާކުރާ ދައުލަތުގެ ބަޖެޓް ހުށަހެޅުން މިއަދު

ކުރިއަށްއޮތް 2027 ވަނަ އަހަރަށް ލަފާކުރާ ދައުލަތުގެ ބަޖެޓް ހުށަހެޅުން މިއަދު މެންދުރަށް ތާވަލްކޮށްފިއެވެ.

ރައްޔިތުން މަޖިލީޙުގެ މިއަހަރުގެ ތިންވަނަ ދައުރުގެ 12 ވަނަ ޖަލްސާގެ އެޖެންޑާއަށް ބަލާއިރު، ބަޖެޓް ހުށަހެޅުމަށް ހަމަޖެހިފައިވާ މި ޖަލްސާ ތާވަލްކޮށްފައިވަނީ މެންދުރުފަހު 13:30 ގައެވެ.

އަންނަ އަހަރުގެ ބަޖެޓް މިއަދު ހުށަހެޅުމަށް މާލީ ވުޒާރާއިން ތައްޔާރުވަމުންދާއިރު، އެ ބަޖެޓްގައި އެންމެ ބޮޑު އިސްކަމެއްދެއްވާނީ މިހާރު ފަށާފައިވާ ތަރައްޤީގެ މަޝްރޫޢުތައް ނިންމަންކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވަނީ ވިދާޅުވެފައެވެ. ސަރުކާރުގެ މަސައްކަތްތައް ރައްޔިތުންނާ ހިއްސާކުރުމަށް ގެނެސްދޭ ނޭޝަން ޗެޓްގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވެފައިވަނީ، ފަށާފައިވާ މަޝްރޫޢުތަކުގެ 70 އިންސައްތަ މަސައްކަތް ނިންމުމަށް އަންނަ އަހަރުގެ ބަޖެޓްގައި އަމާޒުހިފާފައިވާނޭކަމަށެވެ. މީގެ އިތުރުން ހަރަދު ކުޑަކުރުމުގެ ސިޔާސަތުވެސް އަންނަ އަހަރުގެ ބަޖެޓުން ފެނިގެންދާނޭކަމަށް ރައީސް ވަނީ ވިދާޅުވެފައެވެ.

ސަރުކާރުން މިހިނގާ އަހަރަށް ލަފާކޮށް ފާސްކޮށްފައިވަނީ 64.2 ބިލިއަން ރުފިޔާގެ ބަޖެޓެކެވެ. އެގޮތުން މިއަހަރުގެ ބަޖެޓް ބޮޑަށް ހާއްސަވެގެން ދިޔައީ މީގެ ކުރިން ނަގާފައިވާ ބޭރުގެ ދަރަނިތައް އަނބުރާ ދެއްކުމަށެވެ. އެގޮތުން މިފަހަރުގެ ބަޖެޓުގައި ހިމަނާފައިވާ 9.3 ބިލިއަން ރުފިޔާގެ ސުކޫކާއި ބޮންޑު އަނބުރާ ދެއްކުމުގެ ޚަރަދު ނުލައި ބަޖެޓަކީ 55.0 ބިލިއަން ރުފިޔާ އެވެ. މީގެ އިތުރުން މިއަހަރުގެ ބަޖެޓް އެކުލަވާލީ ބޭރުގެ ހިލޭއެހީއަށް ބަރޯސާވާން ނުޖެހޭގޮތަށް ބަލައިގެންކަމަށްވެސް ފިނޭންސުން ވަނީ ބުނެފައެވެ.

ސަރުކާރުން މިއަހަރަށް 64.2 ބިލިއަން ރުފިޔާގެ ބަޖެޓެއް ފާސްކުރިއިރު، އޭގެ ކުރީ 2025 ވަނަ އަހަރު ފާސްކޮށްފައިވަނީ، 56.6 ބިލިއަން ރުފިޔާގެ ބަޖެޓެކެވެ.