އަންނަ އަހަރު އެއްވެސް ޓެކުހެއް ބޮޑު ނުކުރާނަން: މާލީ ވަޒީރު
މިހާރު ނަގަމުން އަންނަ އެއްވެސް ޓެކުހެއް އަންނަ އަހަރު ބޮޑު ނުކުރުމަށް ސަރުކާރުން ނިންމާފައިވާ ކަމަށް މާލީ ވަޒީރު ހަސަން ޒަރީރު ވިދާޅުވެއްޖެއެވެ.
މާލީ ވަޒީރު މިކަން ހާމަކުރެއްވީ އަންނަ އަހަރަށް ލަފާކުރާ ދައުލަތުގެ ބަޖެޓް ރައްޔިތުންގެ މަޖިލީހަށް ހުށަހަޅުއްވައި ދެއްވަމުން ދެއްކެވި ވާހަކަފުޅުގައެވެ. ވަޒީރު ވިދާޅުވީ، މި ހިނގާ އަހަރު ދިމާވި އިޤްތިޞާދީ އަދި މާލީ ގޮންޖެހުންތަކާއި ދަތިތަކާއެކުވެސް، ސަރުކާރުގެ މިސްރާބު ހުރީ ޓެކްސްގެ ނިޒާމުގެ އެފިޝިއެންސީ ނުވަތަ ހިންގުންތެރިކަން ވަރުގަދަކޮށް، ދައުލަތުގެ އާމްދަނީގެ ބޭސް ފުޅާކުރުމަށް ކަމަށެވެ. އެހެންކަމުން، އަންނަ އަހަރުގެ އާމްދަނީ އިތުރުކުރުމުގެ ގޮތުން ދައުލަތުން ނަގާ އެއްވެސް ޓެކުހެއްގެ ރޭޓު މަތި ނުކުރުމަށް ސަރުކާރުން ވަނީ ނިންމަވާފައެވެ.
ޓެކްސް ބޮޑުކުރުމުގެ ބަދަލުގައި، ސަރުކާރުން އިސްކަންދޭނީ ދައުލަތުގެ ޓެކްސް ނިޒާމު މިހާރަށްވުރެ އެފިޝިއެންޓްކޮށް، ނިޒާމުގައި ހުރި ލޫޕްހޯލްތައް ބައްދާލުމަށް ކަމަށް މާލީ ވަޒީރު ފާހަގަކުރެއްވިއެވެ. އަދި ޓެކުހުގެ ޤާނޫނުތަކާއި ގަވާއިދުތަކަށް ޢަމަލުކުރާ މިންވަރު އިތުރުކުރުމަށް ގިނަ މަސައްކަތްތަކެއް ކުރެވިގެންދާނެ ކަމަށްވެސް އެމަނިކުފާނު ވިދާޅުވިއެވެ.
ޓެކްސް ނިޒާމު ޒަމާނީކޮށް ހަރުދަނާކުރުމަށް ރޭވިފައިވާ މުހިންމު ކަންކަމަށް އަލިއަޅުއްވާލައްވަމުން ވަޒީރު ވިދާޅުވީ، މި އަހަރު އަލަށް ތަޢާރަފު ކުރެވުނު "މޯލްޑިވްސް ގެސްޓް އިންފޮމޭޝަން ސިސްޓަމް"ގެ ބޭނުން އިތުރަށް ފުޅާކުރެވިގެންދާނެ ކަމަށެވެ. އަދި ބައިނަލްއަޤްވާމީ "އިންޓަނޭޝަނަލް ބެސްޓް ޕްރެކްޓިސް" މިންގަނޑުތަކާ އެއްގޮތްވާ ގޮތުގެމަތިން، ޒަމާނީ "އީ-އިންވޮއިސިންގ" ނިޒާމެއް ތަޢާރަފުކުރުމަށް ވަނީ ރޭވިފައެވެ.
މާލީ ވަޒީރު ހަސަން ޒަރީރު އިތުރަށް ފާހަގަކުރެއްވި ގޮތުގައި، އަޅަން ނިންމާފައިވާ މި ފިޔަވަޅުތަކުގެ ސަބަބުން އިދާރީގޮތުން ދައުލަތުގެ އާމްދަނީ ބެލެހެއްޓުން ވަރަށް ބޮޑަށް ހަރުދަނާވެގެންދާނެއެވެ. އަދި ރައްޔިތުންނަށާއި ވިޔަފާރިތަކަށް ޓެކްސް ބޮޑުނުކޮށް، ދައުލަތަށް ލިބެންޖެހޭ ޓެކުހުގެ ފައިސާ އެންމެ ފުރިހަމަ ގޮތުގައި ލިބިގެންދާނެ މަގު ފަހިވެގެންދާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
