ނޭޕާލް އަންހެނަކަށް ވަޅިން ހަމަލާދިން ޖަހަންގިރް 20 އަހަރަށް ޖަލަށްލާން ހުކުމް ކޮށްފި

ހުޅުމާލޭގެ ފިހާރައެއްގެ ތެރޭގައި ނޭޕާލް އަންހެނެއްގެ ކަރަށް ވަޅިން ހަމަލާދިން ބަންގްލަދޭޝް ފިރިހެނެއް ކަމަށްވާ ޖަހަންގިރް މިއާ، 20 އަހަރު ދުވަހުގެ މުއްދަތަށް ޖަލަށްލުމާއެކު 7 މިލިއަން ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން ހުކުމް ކޮށްފިއެވެ.

މިދިޔަ އަހަރު، ސެޕްޓެމްބަރު މަހު 27 ވަނަ ދުވަހު މެންދުރު 12:15 އާއި 12:45 އާ ދެމެދުގެ ވަގުތެއްގައި، ހުޅުމާލޭ ނިރޮޅުމަގުގައި ހުންނަ އޯ.ސީ.ސީ ފިހާރައަށް ގޮސް، އެ ފިހާރައިގެ ކޭޝިއަރެއްގެ ގޮތުގައި މަސައްކަތް ކުރަމުންދިޔަ ނޭޕާލްގެ ރައްޔިތެއް ކަމަށްވާ ޗަންދްރިކާ ލިމްބޫގެ ކަރަށް، ޖަހަންގިރް ވަނީ ވަޅިއަކުން ހަމަލާދީފައެވެ.

މި ހާދިސާއަށްފަހު ފިލައިގެން އުޅުނު ޖަހަންގިރް ފުލުހުން ހައްޔަރުކޮށްފައިވަނީ ހުޅުމާލެ ފޭސް ދޭއްގައި އުޅެނިކޮށެވެ. އޭނާ ހޯދައި ހައްޔަރުކޮށްފައިވަނީ ސީސީޓީވީ ފުޓޭޖުތަކާއި ފުލުހުންނަށް ލިބުނު އެހެނިހެން މައުލޫމާތުތަކުގެ އަލީގައެވެ. އަދި އޭނާ ހައްޔަރުކޮށް ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ޝަރީއަތް ނިމެންދެން އޭނާ ބަންދުގައި ބެހެއްޓުމަށް ކޯޓުން އަމުރުކޮށްފައިވެއެވެ.

މި މައްސަލާގައި ޖަހަންގިރި މިއާގެ މައްޗަށް ދައުލަތުން އުފުލާފައިވަނީ މީހަކާމެދު ނުރައްކާތެރި މާރާމާރީ ހިންގުމުގެ ކުށުގެ ދައުވާއެވެ. މި ދައުވާ އޭނާގެ މައްޗަށް ކޮށްފައިވަނީ ގޭންގުތަކުން ހިންގާ ކުށްތަކާއި އެނޫންވެސް ނުރައްކާތެރި ކުށްތައް ހުއްޓުވުމުގެ ޤާނޫނުރގެ ދަށުންނެވެ.

ކޯޓުން މި މައްސަލާގައި ޖަހަންގިރްގެ މައްޗަށް އަދަބެއްގެ ގޮތުގައި ކަނޑައެޅީ 20 އަހަރު ދުވަހުގެ މުއްދަތަށް ޖަލަށްލުމާއެކު 7 މިލިއަން ރުފިޔާއިން ޖޫރިމަނާ ކުރުމަށެވެ.

ނަމަވެސް، ޝަރީއަތް ނިމެންދެން އޭނާ ބަންދުގައި ހުރި މުއްދަތު އުނިކުރުމަށްފަހު، ތަންފީޒު ކުރަންޖެހޭ އަދަބެއްގެ ގޮތުގައި ކަނޑައަޅާފައިވަނީ 18 އަހަރާއި 10 މަހާއި 29 ދުވަހުގެ ޖަލު ހުކުމަކާއެކު، 7 މިލިއަން ރުފިޔާގެ ޖޫރިމަނާއެވެ.