ކޮންމެ އަތޮޅެއްގައި ޕިކްނިކް ދާނެ ރަށެއް ތަރައްޤީކުރަން އަންނަ އަހަރުގެ ބަޖެޓްގައި ހިމަނައިފި

ދިވެހިރާއްޖޭގެ ކޮންމެ އަތޮޅެއްގައި އާއިލާތަކަށް ހިތްފަސޭހަކަމާއެކު ދަތުރުގޮސް ވަގުތު ހޭދަކޮށްލެވޭނެ ފަދަ ޕިކްނިކް ރަށެއް ތަރައްޤީކުރުމަށް ބޭނުންވާ ފައިސާ އަންނަ އަހަރުގެ ބަޖެޓުގައި ހިމަނައިފިއެވެ.

ފިނޭންސް މިނިސްޓްރީން މިކަން ހާމަކުރެއްވީ ރައްޔިތުންގެ މަޖިލީހުގައި މިއަދު އަންނަ އަހަރުގެ ބަޖެޓް ހުށަހަޅުއްވައިދެއްވަމުންނެވެ. މާލީ ވަޒީރު ވިދާޅުވީ، ދިވެހިންގެ މެދުގައި ދުޅަހެޔޮ އަދި އެކުވެރި ބަދަހި މުޖުތަމައެއް ބިނާކުރުމަކީ މި ސަރުކާރުން އަބަދުވެސް ވަރަށް ބޮޑު އަހަންމިއްޔަތުކަމެއް ދޭ ކަމެއް ކަމަށެވެ. އެގޮތުން އާއިލާތަކާއި ރަހުމަތްތެރިންނަށް އެކުގައި އުފާވެރި މާހައުލެއްގައި ވަގުތު ހޭދަކޮށް، ހިތްހަމަޖައްސާލުމުގެ ފުރުސަތު ފަހިކޮށްދިނުމުގެ މުހިންމު ބޭނުމުގައި، ރާއްޖޭގެ ކޮންމެ އަތޮޅެއްގައި ޕިކްނިކް ދާނެ ރަށެއް ތަރައްޤީކުރުމުގެ މަޝްރޫޢުތައް އަންނަ އަހަރުގެ ދައުލަތުގެ ބަޖެޓުގައި ހިމަނާފައިވާނެ ކަމަށް ވަޒީރު ވިދާޅުވިއެވެ.

ރާއްޖޭގެ ކޮންމެ އަތޮޅެއްގައި ދަތުރުދާނެ ހާއްސަ ރަށެއް ތަރައްޤީކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. މިހާތަނަށް ރާއްޖޭގެ ގިނަ އަތޮޅުތަކުގައި މިފަދަ ހާއްސަ ޕިކްނިކް ރަށްތަކެއް ރަސްމީ އުސޫލުން ގާއިމުކުރެވިފައި ނެތް ނަމަވެސް، ސަރުކާރުގެ މި ނިންމުމާއެކު އަތޮޅުތަކުގެ ރައްޔިތުންނަށާއި އަދި އެ ސަރަހައްދުތަކަށް ޒިޔާރަތްކުރާ ފަތުރުވެރިންނަށްވެސް އާއިލާއާއެކު ހިތްއުފާކޮށްލަން ދެވޭނެ ފުރިހަމަ އިންތިޒާމުތައް ހަމަޖެހިގެންދާނެއެވެ.

ފިނޭންސް މިނިސްޓްރީން ހާމަކޮށްފައިވާ ގޮތުގައި، އަންނަ އަހަރަށް ލަފާކުރާ ދައުލަތުގެ ބަޖެޓުގައި އިގްތިސާދީ ކަންކަމުގެ ތެރެއިން ކެޕިޓަލް ހަރަދުގެ ގޮތުގައި 3.1 ބިލިއަން ރުފިޔާ ހަރަދުކުރުމަށް ވަނީ ކަނޑައަޅާފައެވެ. މީގެއިތުރުން، ރައްޔިތުންގެ ދިރިއުޅުމުގެ ފެންވަރު މަތިކުރުމަށާއި، ހިޔާވަހިކަމާއި ޖަމާއަތުގެ ފަސޭހަތަކާ ގުޅުންހުރި ކަންކަމަށް 948.7 މިލިއަން ރުފިޔާ ވަނީ ބަޖެޓުގައި ހިމަނާފައެވެ.