އެމްޕީއެލަށް ގަތް ތެލަށް ހިޔާނާތްތެރިވި ދެ މީހަކު އަށް އަހަރަށް ޖަލަށް، ބަދަލުގެ ގޮތުގައި 13 މިލިއަން ދައްކަން އެންގި

މޯލްޑިވްސް ޕޯޓްސް ލިމިޓެޑްގެ އޮޕަރޭޝަންތަކަށް ބޭނުންވާ ތެޔޮ، ފިއުލް ސަޕްލައި މޯލްޑިވްސް މެދުވެރިކޮށް ގަނެ އެ ތެލަށް ޚިޔާނާތްތެރިވި މައްސަލާގަައި ދެ މީހަކު ޖަލަށްލާން ހުކުމްކޮށްފި އެވެ.

މި މައްސަލާގައި ދައުވާ އުުފުލީ ސ. ފޭދޫ ވާރުގޭ މުހައްމަދު އައިމަން އާއި ބަންގްލަދޭޝްގެ ރައްޔިތެއް ކަމަށްވާ ސޮޖިބްގެ މައްޗަށެވެ.

ދައުލަތުން ބުނީ އައިމަން، 2019 ވަނަ އަހަރުގެ ތެރޭގައި އެމްޕީއެލްގެ ޕްރޮކިއުމަންޓް ޑިޕާޓްމަންޓްގެ ޗީފް މެނޭޖަރުގެ މަގާމުގައި ހުރެ އެފްއެސްއެމް އިން އެމްޕީއެލަށް ތެޔޮ ގަތުމުގެ މުއާމަލާތްތައް ކުރުމުގައި އެ ކުންފުންޏަށް ނުލިބޭ ތެޔޮ ލިބިފައިވާ ކަމަށް ބަޔާންކޮށް ޖަނަވަރީ 13، 2020 އިން ފެށިގެން 10 އޮކްޓޫބަރު 2020 ގެ ނިޔަލަށް ތައްޔާރުކޮށްފައިވާ 119 ޑެލިވަރީ ނޯޓް ބަލައިގަނެ ސޮއިކުރުމަށް ފަހު އެމްޕީއެލަށް ލިބިފައި ނެތް 783،100 ލީޓަރުގެ ޑީސަލް ލިބިފައިވަ ކަމަށް ލިޔެކިޔުންތަކުން ދައްކުވައި އެ ޑީސަލަށްވާ 6,799,800 ރުފިޔާ އެފްއެސްއެމަށް ދައްކައި ޖުމްލަ 783,100 ލީޓަރުގެ ޑީސަލަށް ހިޔާނަތްތެރިވެފައިވާ ކަމަށެވެ.

އެހެން ކަމުން އޭނާގެ މައްޗަށް ވަނީ ހިިޔާނާތްތެރިވުމާއި މީހަކަށް ކަމެއް އޮޅުވާލުމުގެ ނިޔަތުގައި އެނގިހުރެ ސައްހަ ނޫން ލިޔެކިޔުމެއްގެ ތެދުކަން ދެއްކުމުގެ ގޮތުން އެފަދަ ލިޔުމެއްގައިވާ ކަމެއް ބަޔާންކުުރުމުގެ ދައުވާ އުފުލާފަ އެވެ. މި ދެ ދައުވާ ސާބިތުވެ ހިިޔާނާތްތެރިވުމުގެ އަދަބެއްގެ ގޮތުން 8 އަހަރަށް ޖަލަށްލައި އެނގިހުރެ ސައްހަ ނޫން ލިޔެކިޔުމެއްގެ ތެދުކަން ދެއްކުމުގެ ގޮތުން އެފަދަ ލިޔުމެއްގައިވާ ކަމެއް ބަޔާންކުުރުމުގެ ދައުވާގެ އަދަބެއްގެ ގޮތުން ނުވަ މަހާއި 18 ދުވަހަށް ޖަލަށްލާން ވަނީ ހުކުމްކޮށްފަ އެވެ.

އަދި މި މައްސަލާގައި ހިޔާނާތްތެރިވި 783,100 ލީޓަރުގެ ޑީސަލަށްވާ 6,799,800 ރުފިޔާ ބަދަލުގެ ގޮތުގައި ދައުލަތަށް ދައްކަން ވަނީ އަންގާފަ އެވެ. 

ބިދޭސީ މީހާވެސް 8 އަހަރާއި ނުވަ މަހާއި 18 ދުވަހަށް ޖަލަށްލައި މި މައްސަލާގައި ހިޔާނާތްތެރިވި 783,100 ލީޓަރުގެ ޑީސަލަށްވާ 6,799,800 ރުފިޔާ ބަދަލުގެ ގޮތުގައި ދައުލަތަށް ދައްކަން ވަނީ އަންގާފަ އެވެ.