ތުޅާދޫ 100 ހައުސިން ޔުނިޓް: ލިބުނު ޕޮއިންޓް މިހާރު ބެލޭނެ، ޝަކުވާ ހުށައެޅުން ނޮވެންބަރު 16ގެ ނިޔަލަށް

ބ. ތުޅާދޫގައި އިމާރާތްކުރި 100 ޔުނިޓަށް ހުށަހެޅި ފޯމަށް ލިބިފައިވާ ޕޮއިންޓް މިހާރު ބަލާލެވޭނެ ކަމަށާ ޝަކުވާ ހުށައަޅަން ބޭނުންވާ ފަރާތްތަކަށް މިހާރު ފުރުސަތު ހުޅުވާލާފައިވާ ކަމަށް މިނިސްޓްރީ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓުން ބުނެފި އެވެ.

ސަރުކާރުގެ، ބޯހިޔާވަހިކަން އެންމެންނަށް ސިޔާސަތުގެ ދަށުން، ތުޅާދޫގައި ސަރުކާރުން އިމާރާތްކޮށްފައިވާ 100 ހައުސިންގ ޔުނިޓު ދޫކުރުމަށް ހަމަޖެހިފައިވާ ގޮތުގެ އުސޫލާއި އެއްގޮތަށް ވެރިފައިކޮށް ނިމިފައިވާ ކަމަށް އެ މިނިސްޓްރީން ވަނީ ބުނެފަ އެވެ.

އެ މިނިސްޓްރީން ބުނީ ފޯމު ހުށަހެޅި ފަރާތްތަކަށް ހިޔާވެހި ޕޯޓަލަށް ލޮގިންވުމުން، ހުށަހެޅި ފޯމަށް ލިބިފައިވާ ޕޮއިންޓު ބެލޭނެ ގޮތް ހަމަޖެހިފައިވާ ކަމަށެވެ.

ލިބިފައިވާ ޕޮއިންޓާ ގުޅިގެން ޝަކުވާއެއް ހުށަހަޅަން ބޭނުންވާނަމަ، ނުވަތަ އިތުރު ޝަކުވާއެއް ހުށަހަޅަން ބޭނުންވާނަމަ، އެ ޝަކުވާއެއް ހުށަހަޅަން ޖެހެނީ ހިޔާވެހި ޕޯޓަލް މެދުވެރިކޮށެވެ. ޝަކުވާ ހުށަހަޅަންވާނީ 16 ނޮވެމްބަރު 2026 ގެ 14:00 ގެ ކުރިންނެވެ.

ހިޔާވެހި ޕޯޓަލް ނޫން އެހެން ގޮތަކުން ހުށަހަޅާ ޝަކުވާތަކާއި، މި މުއްދަތު ހަމަވުމަށްފަހު ހުށަހަޅާ ޝަކުވާތައް ބަލައިނުގަނެވޭނެ ކަމަށްވެސް އެ މިނިސްޓްރީން ބުންޏެވެ.