ރަސްމާލެ މަޝްރޫއުން އިންތިހާ ފައިދާ އޮތީ އީގަލް ހިލްސްއަށް، މަޝްރޫއު ހުއްޓާލަންޖެހޭ: ރައީސް ސޯލިހް

ރަސްމާލެ މަޝްރޫއުން އިންތިހާ ފައިދާ އޮތީ އީގަލް ހިލްސްއަށް، އެ މަޝްރޫއު މިހާރު ރޭވިފައިވާ ގޮތަށް ކުރިއަށް ނުގެންގޮސް ހުއްޓާލަން ޖެހޭ ކަމަށް ކުރީގެ ރައީސް އިބްރާހިމް މުހައްމަދު ސޯލިހް ވިދާޅުވެއްޖެ އެވެ.

ރައީސް ސޯލިހް މިހެން ވިދާޅުވީ ސޯޝަލް މީޑިއާގައި ކުރެއްވި ޕޯސްޓެއްގަ އެވެ. ވިޔަފާރީގައި ވެސް ހަރަކާތްތެރިވެވަޑައިގަންނަވާ ރައީސް ސޯލިހް ވިދާޅުވި ގޮތުގައި ރަނގަޅު ވިޔަފާރި މުޢާމަލާތެއްގައި މުދާ ވިއްކާ ފަރާތާއި ގަންނަ ފަރާތަށް ނުވަތަ ކުއްޔަށް ދޭ ފަރާތާއި ކުއްޔަށް ހިފާ ފަރާތަށް ވެސް ފައިދާވާން ޖެހޭނެ އެވެ.

‏ރަސްމާލޭން 500 ހެކްޓަރު ބިން ހިލޭ، އީގަލް ހިލްސަށް ދާއިމަށް ދިނުމުގައި އެފަދަ ފައިދާއެއް ރާއްޖެއަށް ލިބޭ މަންޒަރު ނުފެންނަ ކަމަށް ވިދާޅުވި އެވެ.

‏"އިންތިހާއަށް ފައިދާވަނީ އީގަލް ހިލްސްއަށް. ރާއްޖެއަށް މާލީގޮތުން ލިބެންޖެހޭ ފައިދާ ލިބޭތަނެއް ނުފެނޭ،" ވެރިކަމުގައި ހުންނަވާ ނޫނު އަތޮޅުން ބޮޑު ބަޔަކާއި ވާވު އަތޮޅުން ވެސް ބޮޑު ބައެއް ބޭރުގެ ފަރާތަކަށް ކުއްޔަށް ދެއްވި ރައީސް ސޯލިހް ވިދާޅުވި އެވެ.

ރައީސް ސޯލިހް ވިދާޅުވީ 500 ހެކްޓަރު ބިން ހިއްކަނީ ދިވެހި ރައްޔިތުންގެ ފައިސާއިން 700 މިލިއަނަށް ވުރެ ގިނަ ޑޮލަރު ހޭދަކޮށްގެނެވެ. ނަމަވެސް އެ ބިން އީގަލް ހިލްސްއަށް ދެނީ ހިލެ އެވެ. އަދި އެކަމުން ދައުލަތަށް ލިބޭ އެއްވެސް ފައިސާއެއް ނެތް ކަމުގައި ވިދާޅުވި އެވެ.

‏މީގެ އިތުރުން އީގަލް ހިލްސުން އަޅާނެކަމަށް ބުނާ 5,000 ހައުސިންގ ޔުނިޓް ޖެހެނީ ދިވެހި ސަރުކާރުން ގަންނާން ކަމުގައި ސޯލިހް ވިދާޅުވި އެވެ.

‏މީގެ އިތުރުން މި ޕްރޮޖެކްޓް މިހާރު ރޭވިފައިވާ ގޮތުން މުސްތަޤުބަލުގައި މުޅި ޤައުމަށް ބޮޑެތި އެތައް ގޮންޖެހުންތަކާ ކުރިމަތިލާންޖެހޭ ތަން ފެންނަ ކަމުގައިވެސް ވިދާޅުވި އެވެ.

‏"އަޅުގަނޑުގެ އިލްތިމާސަކީ މި ޕްރޮޖެކްޓް މިހާރު ރޭވިފައިވާ ގޮތަށް ކުރިއަށް ނުގެންގޮސް ހުއްޓާލުމެވެ،" ރައީސް ސޯލިހްގެ ޕޯސްޓްގައި ވިދާޅުވެފައިވެ އެވެ.