ނޫހު ޝަރީއަތް ނިމެންދެން، ދެން ތިބި މީހުން ބަންދަށް މުއްދަތު އިތުރުކޮށްފި

ގދ. ތިނަދޫގައި ހިނގާދިޔަ ރޭޕްގެ ހާދިސާއާ ގުޅިގެން ހައްޔަރުކުރި މީހުންގެ ބަންދަށް މުއްދަތު އިތުރުކޮށްފި އެވެ.

މި މައްސަލާގައި ނުވަ މީހަކު ހައްޔަރުކުރި އެވެ. މި މީހުން ހައްޔަރުކުރީ މި މަހުގެ 24 ވަަނަ ދުވަހު އެވެ. ބައެއް މީހުންގެ ބަންދަށް ފުރަތަމަ ޖެހީ ފަސް ދުވަހެވެ. އެ މީހުންގެ ބަންދާމެދު ގޮތެއް ނިންމުމަށް ދެވަނަފަހަރަށް ކޯޓަށް ހާޒިރު ކުރުމުން، އަޙްމަދު ނޫޙު ނިޔާޒު (20އ) ޝަރީއަތް ނިމެންދެން ބަންދުކުރުމަށް ވަނީ އަމުރުކޮށްފަ އެވެ.

އަދި މުޙައްމަދު މިޝަލް އަޙްމަދު ޒުހައިރު (20އ) އިތުރު 30 ދުވަހަށް ބަންދު ކުރުމަށް، ނަޖުމުﷲ ޙަސަން (35އ) 45 ދުވަހަށް ބަންދުކުރުމަށް އަދި މުޙައްމަދު ޞާލިޙު އަޙްމަދު (26އ) އާއި އަޙްމަދު ޞާނިޖު ޞާދިޤު (32އ) އިތުރު 5 ދުވަހަށް ބަންދު ކުރުމަށް ވަނީ އަމުރުކޮށްފަ އެވެ.

މި ހާދިސާއާ ގުޅިގެން ފުލުހުންގެ ޓީމެއް ތިނަދޫއަށް ދަނީ ތަހުގީގު ހިންގަމުންނެވެ.