އަލަށް އުފަންވާ ކުދިން ރަޖިސްޓަރީ ނުކުރުމުން ކުރިންވެސް ޖޫރިމަނާ ކުރޭ: ޝިފާއު

އަލަށް އުފަންވާކުދިން މުއްދަތުގައި ރަޖިސްޓްރީ ނުކުރުމަކީ ކުރިންވެސް އަދި މިހާރުވެސް ޖޫރިމަނާ ކުރަމުން އަންނަކަމެއް ކަަމަށް ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވެއްޖެެއެވެ.

އަލަށް އުފަންވާ ކުދިން ހަތް ދުވަހުގެ ތެރޭގައި ރަޖިސްޓަރަި ނުކޮށްފި ނަމަ، 10،000ރ. އިން ޖޫރިމަނާ ކުރުމަށް އެކުލަވާލި ބިލު ރައްޔިޔުންގެ މަޖިލީހުން އިއްޔެ ފާސްކުރުމާއި ގުޅިގެން ގިނަ ބައެއްގެ ފާޑުކިޔުންތައް ސަރުކާރަށް އަމާޒުވަމުންދަނިކޮށް، ސަރުކާރުގެ އެ ނިންމުން ދިފާއުކޮށް ޝިފާއު ކުރެއްވި ޓުވީޓެއްގައި ވިދާޅުވީ، އަލަށް އުފަންވާކުދިން މުއްދަތުގައި ރަޖިސްޓްރީ ނުކުރުމަކީ މިހާރުވެސް ޖޫރިމަނާ ކުރަމުން އަންނަކަމެއް ކަމަށެވެ.

"(އެއީ) ވޭތުވެދިޔަ ތަނުގައިވެސް އަމަލުކުރަމުން އަންނަ އުސޫލު. އުފަންވުމާއި މަރުވުން ރަޖިސްޓުރީކުރުމާއި އުފަންދުވަހުގެ ސެޓްފިކެޓު އަދި ދރއކ ހެއްދުމުގެ އުސޫލުތަކަށް މިހާރު ޤާނޫނުގައި ބަޔާންކުރީ."

އުފަންވުމާއި މަރުވުން ރަޖިސްޓަރީ ކުރުމާއި އުފަންދުވަހުގެ ސެޓްފިކެޓް އަދި ދިވެހި ރައްޔިތެއްކަން އަންގައިދޭ ކާޑު ހެދުމާބެހޭ ބިލު ސަރުކާރުގެ ފަރާތުން މަޖިލީހަށް ހުށަހެޅުއްވީ ހެންވޭރު އުތުރު ދާއިރާގެ އެމްޑީޕީގެ މެމްބަރު އިބްރާހިމް މުއިއްޒު އެވެ. އެ ބިލު މަޖިލީހުން ފާސްކުރީ 52 މެންބަރުންގެ ތާއީދާއެކު އެވެ.

މަޖިލީހުގެ ގައުމީ ތަރިކަ އާއި ތަރައްގީގެ ކޮމިޓީ އަދި އިޖުތިމާއީ ކޮމެޓީ ގުޅިގެން ދިރާސާކުރި މި ބިލުގައި ބުނެފައި ވަނީ ރާއްޖޭގައި އުފަންވާ ކޮންމެ ކުއްޖަކު އުފަންވާތާ ހަތް ދުވަހުގެ ތެރޭގައި ފޫޅުމާ ފޯމާ އެކު، ރަށް ނުވަތަ ސިޓީ ކައުންސިލަށް ހުށަހެޅުމަކީ އެ ކުއްޖެއްގެ މައިންބަފައިން ނުވަތަ ބެލެނިވެރިޔާގެ މައްޗަށް ލާޒިމު ކަމެއް ކަމަށެވެ.

އެ ބިލު އެންމެ ފުރަތަމަ ކޮމިޓީ އަށް ހުށަހެޅިއިރު އޮތީ ހަފުތާއެއްގެ ތެރޭގައި ރަޖިސްޓްރީ ނުކޮށްފި ނަމަ 10،000ރ. އިން ޖުރިމަނާކުރާ ގޮތަށެވެ. ނަމަވެސް، ކޮމެޓީގައި މަޝްވަރާކުރުމަށް ފަހު ނިންމީ ޖޫރިމަނާކުރާނީ އެ ހާލަތް މެދުވެރިވި ސަބަބަށް ރިއާޔަތްކުރުމަށް ފަހުގައި ކަމަށެވެ.

އަދި ފޫޅުމާ ފޯމުގައި ބައްޕައަށް ސޮއިނުކުރެއްވިއްޖެ ހާލަތެއްގައި މަންމައަށް ސޮއިކުރެވޭ ގޮތަށާއި, މަންމައަށް ސޮއިނުކުރެވިއްޖެ ހާލަތެއްގައި ބެލެނިވެރިޔަކަށް ސޮއިކުރެވޭނެ ކަމަށް އެބިލުގައި ވަނީ ބުނެފައެވެ.

މީީގެ އިތުރުން ރާއްޖެއިން ބޭރުގައި ދިރިއުޅޭ ދިވެހިން ވިހާ ކުދިން، އެ ގައުމެއްގައި އުފަންވި ކަމުގެ ރަސްމީ ލިޔުމާ އެކު، ރާއްޖެ އެނބުރި އަންނަ ދުވަހުން ފެށިގެން ހަތް ދުވަހުގެ ތެރޭގައި ރަޖިސްޓަރީ ކުރަން ހުށަހަޅަން ޖެހޭނެ ކަމަށް އެ ބިލުގައި ބުނެ އެވެ.

އަދި އެ ކުދިން އުފަންވާ ތާރީހުން ފެށިގެން ހަ މަސްދުވަހުގެ ތެރޭގައި، އުފަންދުވަހުގެ ސެޓިފިކެޓް ހައްދަން ރަށް ނުވަތަ ސިޓީ ކައުންސިލަށް ހުށަހަޅަން ޖެހޭނެ ކަމަށް ވެސް ބުނެފައިވެއެވެ.