ހުޅުމާލެ އެކްސިޑެންޓާއި ގުޅިގެން ހައްޔަރުކުރި މީހާގެ ބަންދުގެ މުއްދަތު އިތުރުކޮށްފި

ހުޅުމާލޭ ސެންޓަރަލް ޕާކު ކައިރީގައި ހިނގި، މީހަކު ނިޔާވި އެކްސިޑެންޓާއި ގުޅިގެން ހައްޔަރުކުރި މީހާގެ ބަންދުގެ މުއްދަތު އިތުރުކޮށްފިއެވެ.

އޭނާގެ ބަންދަށް އިތުރު ހަތްދުވަސް މިހާރުވަނީ ޖަހައިފައެވެ.

މިދިޔަ ހަފްތާގެ ހޯމަ ދުވަހުގެ ރޭ 19:42 ގައި ހުޅުމާލެ ސެންޓްރަލް ޕާކް ކައިރިން ބާރު ސްޕީޑުގައި ދުއްވާފައި ދިޔަ ކާރެއް ކޮންޓްރޯލް ނުވެ ގޮސް ތިން ސައިކަލުގައި ޖެހި އެކްސިޑެންޓެއް ހިނގާފައި ވެއެވެ. މި އެކްސިޑެންޓުގައި އަނިޔާވެފައިވަނީ ދެ ސައިކަލުގައި ތިބި ހަތަރު މީހުންނަށެވެ.

އޭގެ ތެރެއިން ދެ މީހުންނަށް އޭޭޑީކޭގައި ފަރުވާދެމުން ގޮސްފައިވާއިރު، އިއްޔެ ވަނީ އެކަކު ނިޔާވެފައެވެ.

މި އެކްސިޑެންޓްގައި ނިޔާވެފައި ވަނީ އުމުރުން 59 އަހަރުގެ މާލެއަށް ނިސްބަތްވާ ފިރިހެނެކެވެ.

މި އެކްސިޑެންޓާއި ގުޅިގެން ހައްޔަރުކޮށްފައިވަނީ ކާރު ދުއްވަން އިން މީހާ އެވެ. އޭނާގެ ބަންދަށް ފުރަތަމަ ޖެހީ ހަތް ދުވަހެެވެ. އޭނާގެ ބަންދުގެ މުއްދަތު ޖެހުމަށް އިއްޔެ ހުޅުމާލެ ކޯޓަށް ހާޒިރުކުރުމުން އިތުރު ހަތް ދުވަސް ވަނީ އެނާގެ ބަންދަށް ޖަހައިފައެވެ.

ހުޅުމާލޭގައި މިފަދަ ނުރައްކާތެރި އެކްސިޑެންޓް ތައް ހިނގުމަކީ ޢާންމު ކަމެކެވެ. އެފަދަ އެކްސިޑެންޓު ތަކުގައި މީހުންނަށް ބޮޑެތި އަނިޔާވުން ފަދަ ކަންކަން ވަނީ ހިނގައިފައެވެ.