"ތިމާވެށީގެ ކަންކަން ރަނގަޅު ކުރުމުގެ ނަމުގައި ރައްޔިތުންގެ "ޖީބު ފެލުން" ހުއްޓާލަން އެބަޖެހޭ"

ތިމާވެށީގެ ކަންކަން ރަނގަޅު ކުރުމުގެ ނަމުގައި، ރައްޔިތުންގެ "ޖީބު ފެލުން" ހުއްޓާލަންޖެހޭ ކަމަށް މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ) ވިދާޅުވެއްޖެ އެވެ.

ބޮންޑެ މިފަދައިން ވިދާޅުވެފައި ވަނީ ކުނި މެނޭޖް ކުރުމުގެ ގާނޫނަށް އިސްލާހު ގެނައުމުގެ ބިލަށް މިއަދު މުޅި މަޖިލީހުގެ ކޮމިޓީ ގައި ބަހުސް ކުރައްވަމުންނެވެ.

ނިމިދިޔަ ރައީސް އިބްރާހިމް މުހައްމަދު ޞާލިހުގެ ސަރުކާރުން ކުނި މެނޭޖް ކުރުމުގެ ގާނޫނަށް އިސްލާހު ގެނެސް، ޕްލާސްޓިކް ކޮތަޅުން ފީ ނަގަން ފެށުމާއެކު، ޑަބަލް ޓެކްސް ނެގުމުގެ މައްސަލަ ކުރިމަތިވެ ރައްޔިތުންގެ ނުރުހުން ސަރުކާރަށް އަމާޒުވުމުން، އެ ބިލަށް ކުރީ ސަރުކާރުގެ ފަރާތުން ވަނީ އަލުން އިސްލާހު ހުށަހަޅާފަ އެވެ.

އެ އިސްލާހަށް ބަހުސް ކުރައްވަމުން ބޮންޑެ ވިދާޅުވީ، އެ ބިލަކީ ތިމާވެށީގެ އިތުރުން، އިގްތިސާދީ އަދި އިޖްތިމާއީ މައްސަލަ ތަކާއި ގުޅުން ހުރި ބިލެއް ކަމަށެވެ.

އެގޮތުން ބޮންޑެ ވިދާޅުވީ، ކުނި މެނޭޖު ކުރުމުގެ ކަންކަން ރޭވިފައިވާ ގޮތުން، ކުނި ބިލާއި ކަރަންޓް ބިލު އެއްކޮށްލާފައިވާއިރު، އޭގެ ސަބަބުން މީހުން ނޫޅޭ، ކުނި އު އުފައްދާ ތަންތަންވެސް ކުންޏަށް ފައިސާ ނަގަމުންދާ ކަމަށެވެ.

"އަހަރެއްގެ މައްޗަށް އެބަ ނަގައޭ 2000 އެއްހާ ރުފިޔާ. ގާތްގަނޑަކަށް 10,000 ނުވަތަ 7000 މުސާރައަށް ލިބޭ މީހަކަށް އެއީ ވަރަށް ބޮޑު އަދަދެއް. އެހެންވީމާ އިގްތިސާދީ މައްސަލަ އެބަ އޮތް. ރައްޔިތުން ނިކަމެތިވެ ފަގީރުވަމުންދާއިރު، މިއީ މާކެޓް އިކޮނޮމީ އެއްނޫން. މިއީ މާކެޓް ސޮސައިޓީ. ސޮސައިޓީ އަޅުވެތި ކުރުން. މިއީ ތިމާވެށީގެ ބިލެއް ކަމަށް ހަދައިގެން ސަރުކާރަށް ފައިސާ ހޯދަން ކުރާ ކަމެއް މިއީ."

މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ)

ބޮންޑެ އިތުރަށް ވިދާޅުވީ، ކޮތަޅުން ފީ ނަގައިގެން ނުވަތަ އެ ނޫން ގޮތް ގޮތުން ރައްޔިތުން ޖޫރިމަނާ ކޮށްގެން ނަމަވެސް ހޯދާ ފައިސާ އަކީ އާމްދަނީ ކަމުގައި ބަޖެޓްގައި ލިޔެފައިވާ ކަމަށާ އެހެން ނަމަވެސް، އެއީ ރަނގަޅު ވިސްނުމެއް ނޫން ކަމަށެވެ. އަދި ތިމާވެށީގެ ކަންކަން ރަނގަޅު ކުރުމުގެ ނަމުގައި ރައްޔިތުންގެ ޖީބުން "ފެލުން" ހުއްޓާލަންޖެހޭ ކަމަށް އޭނާ ވިދާޅުވި އެވެ.

"ތިމާވެށީގެ ކަންކަން ރަނގަޅު ކުރުމުގެ ނަމުގައި، ރައްޔިތުންގެ ޖީބު ފެލުން ހުއްޓާލަން އެބަޖެހޭ. ޖީބުން ފޭރުން ހުއްޓާލަން އެބަޖެހޭ."

މާފަންނު މެދު ދާއިރާގެ މެންބަރު އިބްރާހީމް ރަޝީދު (ބޮންޑެ)

ބޮންޑެ ވަނީ ކުނި މެނޭޖްކުރުމުގެ ބިލަށް ހަމައެކަނި ތިމާވެށީގެ ނަޒަރަކުން ބަލައި، ރައްޔިތުންގެ އަތުން ފައިސާ ނެގުމުގެ ބަދަލުގައި އިގްތިޞާދީ އަދި އިޖްތިމާއީ ގޮތުންވެސް އެ ބިލަށް ބަލައި، އެ ކޮމިޓީ ތަކުގެ މެންބަރުންގެ ޚިޔާލާ އެއްގޮތަށް ބިލް އިސްލާހު ކުރުމަށް އެދިލައްވާފައެވެ.