ޕީއެންއެފް ވެގެންދާނީ ރައީސް ޑރ. މުޢިއްޒުގެ ސަރުކާރުވެސް ދިފާޢު ކުރާ ޕާޓީ އަކަށް: ޑރ. ޖަމީލް

ކުރީގެ ރައީސް ޔާމީން އަބްދުލްގައްޔޫމްގެ އައު ޕާޓީ، ޕީޕަލްސް ނެޝަނަލް ފްރޮންޓް، ޕީއެންއެފް ވާނީ އަދުގެ ރައީސުލްޖުމްހޫރިއްޔާ ޑރ މުހައްމަދު މުޢިއްޒުގެ ސަރުކާރުވެސް ދިފާޢުކުރާނެ ޕާޓީ އަކަށް ކަމަށް އެ ޕާޓީ އުފެއްދުމުގައި އިސްވެ ހަރަކާތްތެރިވެވަޑައިގަންނަވާ ރައީސް ޔާމީންގެ އިސް ގާނޫނީ ވަކީލު ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ.

ޕީއެންއެފް އުފެއްދުމުގެ ހުއްދަ މިއަދު އިލެކްޝަންސް ކޮމިޝަނުން ދިނުމާއި ގުޅިގެން، މީޑިއާ ތަކަށް މަޢުލޫމާތު ދެއްވަމުން ޖަމީލް ވިދާޅުވީ، މިހާރު ރާއްޖޭގެ ޙާލަތު ގޮސްފައި އޮތް ހިސާބާއި، އަދި ރާއްޖޭގެ ކުރިމަތީގައި އޮތް ގޮންޖެހުންތަކާއި، ރާއްޖޭގެ އިގްތިސާދުގެ ނާޒުކުކަމާއި، އެނޫންވެއް ދިވެހިރާއްޖެގައި ހުރި މައްސަލަތަކުން އަރައިގަތުމަށްޓަކައި، ތެދުވެރިކަމާއި، އިޚްލާޞްތެރިކަމާއި، އަދި އަމާޒަކާއި އެކީގައި މަސައްކަތް ކުރާނެ ސިޔާސީ ފިކުރެއް އޮންނަންޖެހޭކަމަށެވެ.

"އެ ފިކުރަކީ، އެއީ އަބަދުވެސް ރައީސް ޔާމީން ި މާނިސްބަތްވެވަޑައިގަންނަވާ ކޮންސަވޭޓިވް ފިކުރު. އެހެންވީމާ އެމަނިކުފާނު އެދިވަޑައިގަންނަވަނީ، މިހާ ހިސާބަށް އެމަނިކުފާނަށް ތާއީދު ކުރެއްވި އެކި ކަންކޮޅުތަކުގައި ތިއްބެވި ހުރިހާ ބޭފުޅުން، ޕީޕީއެމްވެސް ހިމެނޭ ގޮތަށް، ވީހާވެސް އަވަހަށް ހުރިހާ ފަރާތްތަކުން މި ޕާޓީއާ ގުޅިވަޑައިގެންނެވުން."

ޑރ. މުހައްމަދު ޖަމީލް އަހުމަދު

ޖަމީލް އިތުރަށް ވިދާޅުވީ، ރައީސް ޔާމީންގެ ފިކުރު މަރެއް ނުވާނެ ކަމަށެވެ. އަދި، ޕީއެންއެފްއާއި އެކު އުފެދިގެންދަނީ ދިވެހި ރައްޔިތުންގެ އުއްމީދު ކަމަށާ އެއީ ރައީސް ޔާމީންގެ ފިކުރު ކަމަށެވެ. އަދި އެޕާޓީ ވެގެންދާނީ ރައީސް ޑރ. މުޢިއްޒުގެ ސަރުކާރުވެސް ދިފާޢު ކުރައްވާނެ ޕާޓީ އަކަށް ކަމަށް އޭނާ ވިދާޅުވި އެވެ.

"މިއީ ރައީސް ޔާމީންގެ ޕާޓީ. މި ޕާޓީ ވެގެންދާނީ މިސަރުކާރަށްވެސް އަންނަ ގޮންޖެހުން ތަކުގައި، މޭ އައްޑަނައަކަށް ދިއްކޮށްގެން މި ސަރުކާރުވެސް ދިފާއުކުރާނެ ޕާޓީ އަކަށް"

ޑރ. މުހައްމަދު ޖަމީލް އަހުމަދު

މީގެ އިތުރުން ވެސް، ޖަމީލް ވަނީ ޕީއެންއެފްއިން ކުރިއަށް އޮތް ރައްޔިތުންގެ މަޖިލީހުގެ އިންތިޚާބާއި މާލެސިޓީ ގެ މޭޔަރ ކަމުގެ އިންތިޚާބުގައި ވެސް ވާދަކުރާނެ ކަން ފާހަގަކުރައްވާފައެވެ.