ގާޒީ ވިދާޅުވި "ސަބަބުވެރި އިންސާނާ" ހޯދާ ހޯދާވެސް ނުފެނުނު: ސަލީމް
ވ އާރަށުގެ މުއާމަލާތާއި ގުޅުވާ ކުރީގެ ރައީސް ޔާމީން އަބްދުލްގައްޔޫމުގެ މައްޗަށް އުފުލާފައިވާ ދެ ދައުވާ ސާބިތުވާކަމަށް ކަނޑައަޅުއްވުމަށް އެ މައްސަލަ ބެއްލެވި ގާޒީ އަހުމަދު ޝަކީލް ސަބަބުވެރި އިންސާނެއްގެ ވިސްނުމުން ގިނަ ކަންތަނެއް މިނެކިރުއްވާފައިވާއިރު، އެ ވިދާޅުވާ ސަބަބުވެރި އިންސާނާ ހޯދާ ހޯދާވެސް ފެނިފައި ނުވާކަމަށް މަޖިލީހުގެ މައިނޯރިޓީ ލީޑަރު އަދި ޕީޕީއެމްގެ ނައިބުރައީސް އަހުމަދު ސަލީމު ވިދާޅުވެއްޖެއެވެ.
ރައީސް ޔާމީން މިނިވަންކޮށް އަނބުރާ ވެރިކަމަށް ގެނައުމަށް ގޮވާލާ އިދިކޮޅު ކޯލިޝަންގެ ޖޮއިންޓު ސެނެޓުން ރޭ ގަރާރެއް ފާސްކޮށްފައިވާއިރު، އެ ގަރާރާއި ގުޅޭގޮތުން ވާހަކަދައްކަވަމުން ސަލީމު ވިދާޅުވީ ރައީސް ޔާމީންގެ މައްޗަށް ގާޒީ އިއްވާފައިވަނީ ހަރާން ހުކުމެއްކަމަށެވެ.
ސަލީމް ވިދާޅުވީ ދައުލަތުން ކޯޓަށް ހުށައެޅި ހެކިބަސްތަކަކީ ހަދައިގެން ހުށައެޅި ހެކިބަސްތަކެއްކަމަށެވެ. ސަބަބުވެރި އިންސާނެއްގެ ވިސްނުމުން ވިސްނާއިރު، ފައިސާގެ މުއާމަލާތްތަކުގައި ޑޮލަރު ގެންދިޔަ މީހާއާއި ފައިސާ ގެންދިޔަ ފަރާތުންވެސް ހަމައެކަނި ވިސްނާނީ ފައިސާއާއި ދޭތެރޭގައިކަން ވިސްނޭނެކަމަށެވެ.
"ރައީސް ޔާމީންގެ ޑޮލަރުގެ ފައިސާ، އެއާއި ދޭތެރޭގައި އެ ގެންދިޔަ މީހާވެސް އެ ހަވާލުކުރި މީހާވެސް ވިސްނާނީ ހަމައެކަނި ފައިސާއާއި ދޭތެރޭގައި، އެ ފައިސާގޮސް އިޚްލާސްތެރިކަމާއެކީ ތެދުވެރިކަމާއެކީ އެ ދޭންވާ ފަރާތަކަށް ރައްދުކުރަން. އެއީ މީގެ މައިގަނޑު މަސްދަރަކީ. އެމީހަކު ނުވިސްނާނެ ކާރުގެ ދޮރުފަތް އިނީ ކިހެނެއްތޯ އެތަން އިނީ ކޮން ކުލައެއްގަތޯއެއް. މި ސުވާލުތައް ހަގީގަތުގައި ޝަރިއަތުގެ މަޖިލީހުގައި ނުވެސް ދެއްކޭނެ"
މައިނޯރިޓީ ލީޑަރު ސަލީމް
ސަލީމް ވިދާޅުވީ ޚުދު އެމަނިކުފާނަށްވެސް 10 އަހަރު ދުވަސް ވަންދެން އަމިއްލަފުޅަށް ދުއްވި ކާރުކޮޅުގެ ނަންބަރު ހިތުން ހަނދާން ނުހުންނަކަމަށެވެ. އަދި އުމުރު ދުވަހު ގެންގުޅުނު އައިޑީ ކާޑު ކަންބަރު ހަނދާން ހުންނަނީ ކިތައް މީހުންނަށްތޯ ސަލީމް ސުވާލުކުރެއްވިއެވެ.
އެއާއެކު އޭނާ ވަނީ އެފަދަ ކުދި ކުދި ކަންތައްތައް ހަނދާން ނުހުންނަ ކޮންމެ މީހަކީ އެއީ ސަބަބުވެރި އިންސާނެއް ނޫންކަމަށް ނިންމަންވީތޯވެސް އައްސަވާފައެވެ.
ސަލީމް އިތުރަށް ވިދާޅުވީ ގާޒީ ހުކުމް ކުރާއިރު ސަބަބުވެރި އިންސާނެއްގެ ވިސްނުމުން ކަންކަން ނިންމަވަން ނުޖެހޭނެކަމަށެވެ. ހުކުމް ކުރަންވާނީ ހެއްކާއި ގަރީނާގެ މައްޗަށް ބިނާކޮށްކަމަށާއި، މި މައްސަލައިގައި އެއިން އެއްވެސް ކަމެއް ނުފެންނަކަމަށް ސަލީމް ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
