އުޝާމް، ރައީސް ޔާމީންއަށް: ރިޒޯޓުތައް ކުއްޔަށްދޭ މުއްދަތު 99 އަހަރަށް ބަދަލުކުރީ މަނިކުފާނުގެ ވެރިކަމުގައި

ޓޫރިސްޓް ރިޒޯޓުތައް ކުއްޔަށް ދޫކުރާ މުއްދަތު 99 އަހަރަށް އިތުރުކުރީ ރައީސް ޔާމީންގެ ވެރިކަމުގައި ކަމަށް ވިދާޅުވެ، ރަސްމާލެ މަޝްރޫޢާ ގުޅޭ ގޮތުން ރައީސް ޔާމީން ދެއްކެވި ވާހަކަތަކަށް ބަންޑާރަނައިބު އަހުމަދު އުޝާމް ރައްދުދެއްވައިފިއެވެ.

ރޭ ބޭއްވި ޕީއެންއެފް ޖަލްސާގައި ވާހަކަދައްކަވަމުން، ރަސްމާލެ 99 އަހަރަށް ބޭރުގެ ބަޔަކަށް ދިނުމަކީ ދާއިމީކޮށް އެ ބިން ވިއްކާލުން ކަމަށާއި އެކަން ހުއްޓާނުލައިފި ނަމަ ސަރުކާރު ބަދަލުވުުމާއެކު އެކަމުގައި ބައިވެރިވި ސަރުކާރުގެ އިސްވެރިންނަށް އަދަބުދޭނެ ކަމުގެ އިންޒާރު ރައީސް ޔާމީން ވަނީ ދެއްވާފައެވެ.

އެއަށް ރައްދު ދެއްވައި އުޝާމް ވިދާޅުވީ ރާއްޖޭގައި ޓޫރިޒަމާ ބެހޭ ޤާނޫނެއް ފުރަތަމަ ފަހަރަށް އެކުލަވައިލީ 1999 ވަނަ އަހަރު ކަމަށާއި އެ ޤާނޫނުގެ ދަށުން ރިޒޯޓުތައް ކުއްޔަށް ދޫކުރެވެމުން ދިޔައީ ގިނަވެގެން 25 އަހަރުގެ މުއްދަތަށް ކަމަށެވެ. އެ މުއްދަތު 50 އަހަރަށް ދިގުދެންމީ 2010 ވަނަ އަހަރު ރައީސް ނަޝީދުގެ ދައުރުގައި ގެނައި އިސްލާޙަކުން ކަމަށާ އެއަށް ފަހު 2015 ވަނަ އަހަރު ރައީސް ޔާމީންގެ ވެރިކަމުގައި 99 އަހަރަށް މުއްދަތު އިތުރުކޮށްފައިވާކަން އުޝާމް ފާހަގަކުރެއްވިއެވެ.

ޓޫރިޒަމާ ބެހޭ ޤާނޫނުގެ އަށް ވަނަ މާއްދާގައި ބަޔާންކޮށްފައިވާ ގޮތުން 99 އަހަރުގެ ކުއްޔެއްގެ މުއްދަތު ހަމަވެއްޖެނަމަ އެ ރަށެއްގައި ކޮށްފައިވާ އިންވެސްޓްމަންޓުގެ އަގުން ކުލި ކެނޑުމަށް ފަހު ބާކީ ޖެހޭ އަދަދު އިންވެސްޓަރަށް ސަރުކާރުން އަދާކުރަން ޖެހެއެވެ.

ރަސްމާލެ މަޝްރޫޢުގެ ވާހަކައަށް އިޝާރާތްކުރައްވައި އުޝާމް ވިދާޅުވީ އެ މަޝްރޫޢު ހިނގާނީ މިހާރު އެކުލަވައިލަމުން އަންނަ ރިއަލް އެސްޓޭޓް ޤާނޫނުގެ ދަށުން ކަމަށެވެ. މިހާތަނަށް ސޮއިކޮށްފައިވަނީ ހަމައެކަނި ލެޓާ އޮފް އިންޓެންޓް އެބަހީ ކޮމާޝަލް ޓާމްސް އެގްރީމެންޓެއްގައި ކަމަށާއި މަޝްރޫޢު ފެށުމުގެ ކުރިން އެ ޓާމްސްތަކުގެ މައްޗަށް ބިނާކޮށް އިތުރު މަޝްވަރާކުރެވި ޑެފިނިޓިވް އެގްރީމެންޓްތަކެއްގައި ސޮއިކުރަން ޖެހޭނެ ކަމަށާއި އެކަމާ ގުޅުން ހުރި ޤާނޫނުތައް ރައްޔިތުންގެ މަޖިލީހުން ފާސްކުރަން ޖެހޭނެ ކަމަށް ވެސް ވިދާޅުވިއެވެ.

މި މަޝްރޫޢު ކުރިއަށް ގެންދިޔުމުގައި ޤާނޫނުއަސާސީއާއި ޤާނޫނުތަކާ ޚިލާފު އެއްވެސް ކަމެއް ސަރުކާރުން ނުކުރާނެ ކަމަށް ވެސް ބަންޑާރަނައިބު ވިދާޅުވިއެވެ.