ފްލެޓާއި ގޯތިތައް ހަވާލުކޮށް ނިންމުމަށް ސަރުކާރަށް މަސްދުވަހުގެ މުއްދަތެއް. ދެން ނިކުންނާނީ ސީދާ ހަރަކާތަށް: އެމްޑީޕީ

ނިމިގެންދިޔަ އެމްޑީޕީގެ ވެރިކަމުގައި ބޯހިޔާވަހިކަމަށް ދޫކުރަން ނިންމި ފްލެޓާ ގޯތިތައް މަސްދުވަހުގެ ތެރޭގައި އެތަންތަނުގެ ވެރިފަރާތްތަކާ ހަވާލުކޮށް ނިންމުމަށް އެމްޑީޕީން ސަރުކާރަށް ގޮވާލައިފިއެވެ.

ބިންވެރިޔާ ސްކީމުގެ އުސޫލާ ހިލާފަށް އެޗްޑީސީން ބިންތަކެއް ދޫކުރި މައްސަލައާ ގުޅޭގޮތުން އެމްޑީޕީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، މިދިޔަ ސަރުކާރުގެ ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން ވިދާޅުވީ ބިންވެރިޔާ ސްކީމުން ބިންތައް ދޫކުރުމަށް ސަރުކާރުގެ މުއައްސަސާތަކުން އުސޫލާ ހިލާފަށް ކަންތައްތަކެއް ކޮށްފައިވާކަން ފާހަގަކުރެވޭ ކަމަށެވެ. މިކަން އެޗްޑީސީން ކުރިއަށް ގެންގޮސްފައިވަނީ ހައުސިން މިނިސްޓްރީގެވެސް އެއްބާރުލުން ލިބިގެންކަން އަކްރަމް ފާހަގަކުރެއްވިއެވެ.

އަކްރަމް ވިދާޅުވީ މިދިޔަ ސަރުކާރުން ބޯހިޔާވަހިކަމަށް ރައްޔިތުންނަށް ދޫކުރުމުގެ މަސައްކަތް ފެށި ބިންތަކާއި ފްލެޓްތައް މި ސަރުކާރު އައިފަހުން ހުއްޓުމަކަށް އައިސްފައިވާކަމަށެވެ. އޭނާ ވިދާޅުވީ ކުރިއަށްއޮތް މަސްދުވަހުގެ ތެރޭގައި ފްލެޓާއި ބިންތަކުގެ ހައްގުވެރިންނަށް އެތަންތަން ދޫކޮށް ނިންމުމަށް ސަރުުކާރަށް ގޮވާލާ ކަމަށާއި، އެހެންނޫނީ އެމްޑީޕީން ސީދާ ހަރަކާތަށް ނިކުންނާނޭ ކަމަށެވެ.

އުސޫލާ ހިލާފަށް ބިން ދޫކުރި މައްސަލައާ ގުޅޭގޮތުން އަކްރަމް ވިދާޅުވީ މިއީ ހައުސިން މިނިސްޓަރު ހައިދަރު ސަސްޕެންޑްކުރަން ޖެހޭ ފަދަ ގޮތަކަށް ކަންކަން ހިނގާފައިވާ މައްސަލައެއް ކަމަށާއި، މިކަމުގައި ހައުސިން މިނިސްޓްރީގެ ވަރަށްބޮޑު އިހުމާލެއް އެބައޮތް ކަމަށެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޑީޕީ ސަރުކާރުގެ ފްލެޓް ކޮމިޓީގައި ހިމެނިު ވަޑައިގަންނަވާ މުހައްމަދު އާރިފް ވިދާޅުވީ، މިކަމުގައި މިނިވަންކަމާއެކު ސަރުކާރަށް ތަހުގީގެއް ކުރެވިދާނޭކަމަށް ގަބޫލުނުކުރެވޭ ކަމަށާއި، ވެރިކަން ބަދަލުވި މަރުހަލާގެ ތެރޭގައި އެއްވެސް ޝައްކެއް ނުއުފެދޭނެ މިންވަރަށް އޭރުއޮތް ސަރުކާރުން ވާނީ މި ސަރުކާރަށް ކަންކަން ހަވާލުކޮށްފައިކަމަށެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ގަލޮޅު ދެކުނު ދާއިރާއަށް ނިސްބަތްވެ ވަޑައިގަންނަވާ މެމްބަރު މީކާއީލް ނަސީމް ވިދާޅުވީ، އޫސޫލާ ހިލާފަށް ބިންތައް ދޫކުރިކަން ފަޅާއެރުމުން އެކަމުގައި ހިމެނޭ ބައެއްމީހުން ސަސްޕެންޑްކުރިނަމަވެސް، މި ސަރުކާރުން ސަސްޕެންޝަނަކީ ނަމެއްގައި ކުރާ ކަމެއްކަމަށެވެ. އޭގެ ބަދަލުގައި ދެން ފެނިގެންދާނީ، ސަސްޕެންޑްކުރި މީހާއަށް އެއަށްވުރެ މޮޅު ގޮތްތަކެއް ވަމުންދާތަންކަމަށާއި، މިއީ މިހާތަނަށްވެސް ރައްޔިތުންނަށް ފެނިގެންދިޔަ މަންޒަރުކަމަށް މީކާއީލް ވިދާޅުވިއެވެ.