ރަސްދޫ ހާދިސާ: ބައިވަރު ސުވާލުތަކެއް! އަލިފާން ރޯވީ ކިހިނެތް؟

އއ. ރަސްދޫގައި ރޭ ހިނގީ ނުރައްކާތެރި އަލިފާނުގެ ހާދިސާ އެކެވެ. އެ ހާދިސާ ގައި ދެ މީހަކު ވަނީ ވަރަށް ބޮޑަށް ފިހިފަ އެވެ. ހަށިގަނޑުގެ ބޮޑުބައެއް ފިހި އެ ދެ މީހުންގެ ހާލަތު ވަނީ ވަރަށް ކްރިޓިކަލް ސިޓުއޭޝަނެއްގަ އެވެ. އައިޖީއެމްއެޗް ގައި ދެ މީހުންނަށް ފަރުވާ ދެމުންދާއިރު ހަށިގަނޑުގެ ބައެއް ގުނަވަންތަކުގެ ހިނގުން ރަނގަޅެއް ނޫނެވެ.

އާއިލާ އިން ބުނި ގޮތުގައި ފިިހިފައިވާލެއް ބޮޑު ކަމުންނާއި އެތެރެހައްޓަށް ލިބިފައިވާ ބޮޑެތި ގެއްލުންތަކުގެ ސަަބަބުން އެ ދެ މީހުން ގަދަވާނެ ކަމަށް ކުރެވޭ އުންމީދު ކުޑަ ކަމަށް ޑޮކްޓަރުން އާއިލާއަށް އަންގާފައިވެ އެވެ.

ރޭގެ އަލިފާނުގެ ހާދިސާއާ ގުޅޭ ސުވާލުތައް ގިނަ އެވެ. އަލިފާން ރޯވީ ކިހިނަކުން ހެއްޔެވެ. ދެ މީހުން އެވަރަށް ފިހިފައިވަނީ ކިހިނެތް ވެގެން ހެއްޔެވެ.

އަލިފާނުގެ މި ހާދިސާ ހިނގުމުގެ ކުޑައިރުކޮޅެއްގެ ކުރީން ހާދިސާގައި ފިހުނު ފިރިހެން މީހާ އިނީ ގެއާ ކައިރި ކޮފީ ޝޮޕެއްގައި ކޮފީ އެއް ބޯށެވެ. އެތަނުގައި އިނދެފައި ގެއަށް ދިއުމަށް ނައްޓާލީ ކުއްލިއަކަށެވެ. ވީގޮތެއް ނޭންގެ އެވެ. އޭގެ ކުރީން ފޯނެއް އައި ކަމަށް ވެ އެވެ.

އޭގެ އިރުކޮޅެއްގެ ފަހުން ފިރިހެން މީހާ ގޭތެރެއިން ނިކުތީ ރޯވެއްޖޭ ގޮވަމުންނެވެ. އޭރު އޭނާގެ ގައިގައި އަލިފާން ރޯވެފައި ހުއްޓެވެ.

ފަރުވާއަށް މަރުކަޒަށް ދިޔައީ މީހެއްގެ ސައިކަލު ފަހަތުގަ އެވެ. އޭރުވެސް ވެގެން އުޅޭ ގޮތެއް ސާފެއް ނުވެ އެވެ. ކޮޓަރީގައި ރޯވެއްޖެ ކަމަށް ބުނެ އޭނާ ހަޅޭލަވަމުން ގެންދިޔަ އެވެ.

އާންމުން އެއްވެ ކޮޓަރިއަށް ވަތްއިރު އެވަރުގެ ބޮޑު އަލިފާނުގެ ހާދިސާއެއް ހިނގާފައެއް ނުވެ އެވެ. ނަމަވެސް ކޮޓަރީގައި އޮތް އަންހެން މީހާގެ ގައިގައި ވަނީ ވަރަށް ބޮޑަށް ރޯވެފަ އެވެ. އޭރު އޭނާގެ ހެއި ހުއްޓެވެ. އެތަނުގައި ތިބި މީހުންނާއި އޭނާ ވާހަކަ ވެސް ދެއްކި އެވެ.

ހަށިގަނޑުގެ ވަރަށް ބޮޑު ބައެއް ފިހިފައިވޭތޯ އޭނާ ސުވާލުކުރި އެވެ. މޫނުމަތި އަނދާފައިވޭތޯ ވެސް އެހި އެވެ. ނަމަވެސް އަލިފާން ރޯވާން ދިމާވި ސަބަބެއް އޭނާގެ ފަރާތުން ވެސް ސާފުވާ ގޮތެއް ނުވި އެވެ. އަލިފާން ރޯވެފައި ވަނީ ގޮދަނޑީގެ ކަނެއްގަ އެވެ. ދެން ދޮރުފޮތިގަނޑުގަ އެވެ. އެ ނޫނީ ބޮޑު ގެއްލުމެއް ނެތެވެ.

އަލިފާން ރޯވި ގޮތާމެދު ސުވާލު އުފެދެނީ އެހެން ވެގެންނެވެ.

މަރުކަޒުގައި ފަރުވާ ދިނުމަށް ފަހު ރޭ ވަގުތުން އެ ދެ މީހުން ވަނީ ވަގުތުން މާލެ ގެނެސްފަ އެވެ.

އެ ގޭގައި އެ ދެ މީހުންގެ ދަރިފުޅު ވެސް ދިރިއުޅެމުން ގެންދިޔަ އެވެ. ނަމަވެސް މި ހާދިސާ ހިނގިއިރު އެ ކުއްޖާވީ އާއިލީ އެހެން މީހެއްގެ ގެއަށް ފޮނުވާފަ އެވެ. މި ދެ މީހުންނަކީ ކުއްޖާގެ މައިންބަފައިން ނަމަވެސް އެދެ މީހުންގެ މެދުގައި އޮތް ގުޅުމާ މެދުވެސް ރަށުތެރޭގައި އެކި ގޮތްގޮތަށް ވާހަކަ ދެކެވެ އެވެ.

ދެ މީހުންގެ މެދުގައި ޚިޔާލުތަފާތުވުން ފަދަ ކަންކަން ވަރަށް ގިނައިން ހިނގާފައިވާ ކަމަށް ރަށުގެ މީހުން ބުނެ އެވެ.

ފުލުހުން މިހާރު ވަނީ މި މައްސަލައިގެ ތަހުގީގެއް ފަށާފަ އެވެ. ނަމަވެސް ފުލުހާއި ސިފައިން އަދި މި މައްސަލާ ގައި އިތުރު ތަފްސީލެއް ހާމައެއް ނުކުރެ އެވެ.

ދުޢާއަކީ އަލިފާނުގައި އަނިޔާވި ދެ މީހުންނަށް އަވަސް ޝިފާއެއް މިންވަރު ކުރެއްވުމެވެ.