ޒާހިދުގެ ގޯތި އެހެން ފަރާތަކަށް ދިނުން ހުއްޓުވައި ސިވިލް ކޯޓުން ވަގުތީ އަމުރެއް ނެރެފި

އިލެކްޝަންސް ކޮމިޝަން (އީސީ)ގެ ކުރީގެ ރައީސް މުޙައްމަދު ޒާހިދަށް ބިންވެރިޔާ ސްކީމުގެ ދަށުން ހުޅުމާލެއިން ލިބުނު ގޯތީގެ ރަޖިސްޓްރީ ބާޠިލުކުރި މައްސަލައާ ގުޅިގެން އެ ބިން އެހެން ފަރާތަކަށް ބަދަލުކުރުން މަނާކޮށް ސިވިލް ކޯޓުން ވަގުތީ އަމުރެއް ނެރެފިއެވެ.

ޒާހިދު ހައުސިން ވުޒާރާއާ ދެކޮޅަށް ދަޢުވާ ހުށަހެޅީ ޝަރުޢީ ކޯޓެއް މެދުވެރިނުކޮށް ގޯތީގެ ރަޖިސްޓްރީ ބާޠިލުކުރީ އެއްބަސްވުމާ ޚިލާފަށް ކަމަށް ބުނެއެވެ. ހައުސިން ވުޒާރާއިން ރަޖިސްޓްރީ ބާޠިލުކުރީ ވަށާފާރު ރޭނުމުގެ ހުއްދައަށް ޒާހިދު އެދުމުން މިހާރުގެ އުސޫލާ އެއްގޮތަށް އަލުން ވެރިފިކޭޝަން ހެދިއިރު ގޯތި ލިބުމުގެ ޝަރުޠު ހަމަނުވާ ފަރާތެއްކަން ފާހަގަވުމުންނެވެ. އެ ގޯތި ބާޠިލުކޮށް ބިން ވިއްކުމަށް ވުޒާރާއިން ޢާންމުކޮށްފައިވާ ކަމަށް ވެސް ދަޢުވާގައި ބަޔާންކޮށްފައިވެއެވެ. ވިއްކުމުގެ މައްސަލަ ސިވިލް ރައިޓްސް އޮފީހަށް ހުށަހެޅުމާ ގުޅިގެން އެ އޮފީހުން ގޮތެއް ނިންމެންދެން ވުޒާރާއިން އެ ކަންތައް ފަސްކޮށްފައިވެއެވެ.

ދައުލަތުން ޝަރީޢަތުގައި ބުނެފައިވަނީ ޒާހިދު ދޮގު މަޢުލޫމާތު ހުށަހެޅި ކަމަށް ދައުލަތުން ނުބުނާ ކަމަށާއި ނަމަވެސް ރަށްވެހިކަމާ ގުޅޭ މައުޟޫޢީ ޙަޤީޤަތެއްގެ ސަބަބުން ގޯތި ލިބުމުގެ އަސާސީ ޝަރުޠު ހަމަނުވާ ކަމަށެވެ. ބިންވެރިޔާ ސްކީމުން ގޯތި ދޫކުރީ މާލެއަށް އުފަން ފަރާތްތަކަށް ކަމަށްވާއިރު ޒާހިދާއި އޭނާގެ މައިންބަފައިންނަކީ ވެސް އެ ޝަރުޠު ފުރިހަމަނުވާ ބައެއްކަން ސާފުކޮށް އެނގެން އޮތް ކަމަށް ދައުލަތުން ފާހަގަކޮށްފައިވެއެވެ. އެހެންކަމުން ހުޅުމާލޭގެ އެ ބިމުގެ މައްޗަށް ޒާހިދުގެ އެއްވެސް ޙައްޤެއް ނުވަތަ މިލްކުވެރިކަމެއް ނެތް ކަމަށް ދައުލަތުން ބުނެފައިވެއެވެ.

ސިވިލް ކޯޓުން ވަގުތީ އަމުރު ނެރުމުގައި ބުރަވީ ޒާހިދަށް ގޯއްޗެއް އައްޔަންވެ ލިބިފައި އޮތް އޮތުމާއި ފަހުން ބާޠިލުކުރުމާ ގުޅޭ ގޮތުން ނިންމަންޖެހޭ ކަންކަން ހުރުމުން ވަގުތީ ފިޔަވަޅެއް އެޅުން ލާޒިމުވާ ޙާލަތެއް އޮތް ކަމަށެވެ. ކޯޓުގެ އަމުރުގައި ވުޒާރާއަށް އެންގީ ޒާހިދުގެ ނަމުގައި ރަޖިސްޓްރީ ކޮށްފައި އޮތް ބިން ވިއްކުމާއި ދިނުމާއި ތިންވަނަ ފަރާތެއްގެ ޙައްޤެއް އެ ބިމުގެ މައްޗަށް އުފެދިދާނެ ފަދަ ކޮންމެ ކަމެއް ކޯޓުން ގޮތެއް ނިންމެންދެން ނުކުރުމަށެވެ.

ޒާހިދުގެ އަސްލު ރަށަކީ ހއ. ހަތިފުށި ކަމުގައިވާއިރު އެ ރަށުގެ ރައްޔިތުން ފަހުން ހދ. ހަނިމާދުއަށް ބަދަލުކުރެވުނެވެ. ނަމަވެސް، މިހާރު ޒާހިދުގެ ރަޖިސްޓްރީ އޮތީ މާލޭ ދަފްތަރުގައެވެ. މި މައްސަލައިގެ މައުޟޫޢީ ބައި ސިވިލް ކޯޓުގައި ކުރިއަށް ދާނެއެވެ.