ފާއިތުވެދިޔަ 6 މަސް ތެރޭގައި ރިހެބުން 400 އަށްވުރެ ގިނަ މީހުނަށް ފަރުވާ ދީފައިވޭ: އެންޑީއޭ

ފާއިތުވެ ދިޔަ 6 މަސްދުވަހުގެ ތެރޭގައި މަސްތުވާތަކެތިން ސަލާމަތްވުމަށް ޑުރަގް ރިހެބިލިޓޭޝަން ފަރުވާ 400 އަށްވުރެ ގިނަ މީހުންނަށް ފޯރުކޮށްދީފައިވާކަމަށް ނޭޝަނަލް ޑްރަގް އެޖެންސީ (އެންޑީއޭ) އިން ހާމަކޮށްފިއެވެ.

އެންޑިއޭއިން ބުނީ، ރިހެބިލިޓޭޝަން ފަރުވާ ދިނުމަށް ވެއިޓިންގެ ލިސްޓުގައި 700 ވުރެ ގިނަ މީހުން ތިބިކަމަށާއި، އެ ފަރާތްތައް ފަރުވާއަށް ވެއްދުމުގެ ގޮތުން "އޮޕަރޭޝަން ފަނާރު"ގެ ނަމުގައި ޚާއްސަ އޮޕަރޭޝަނެއް މިދިޔަ އަހަރު ޑިސެމްބަރުގައި ފަށާފައިވާކަމަށެވެ.

އެގޮތުން މި އޮޕަރޭޝަނުގެ ދަށުން ފާއިތުވެދިޔަ 6 މަސް ދުވަހުގެ ތެރޭގައި 446 ވުރެ ގިނަ މީހުން ރިހެބިލިޓޭޝަން ފުރިހަމަކޮށްފައިވާ ކަމަށާއި، އެކި ސަބަބުތަކާއި ހުރެ އަދި ފަރުވާ ނުފެެށޭ 254 މީހުން ތިބިކަމަށް އެންޑީއޭއިން ބުނެއެވެ.

އެންޑީއޭއިން އިތުރަށް ބުނީ، މި ފަރުވާ މުޅި ރާއްޖެއަށް ފުޅާކުރުމުގެ ވިސްނުމުގައި، ކޮމިއުނިޓީ ބޭސްޑް ރިހެބިލިޓޭޝަން އެންޑް ރިއިންޓަރގްރޭޝަން އެޕްރޯޗަކަށް ބަދަލުކޮށްފައިވާކަމަށާއި، ކޮމިޔުނިޓީ ފަރުވާއަށް އަމުރުކޮށްފައިވާ ފަރާތްތަކުގެ ތެރެއިން ކަރެކްޝަންގެ ބަންދުގައި ތިބި ފަރާތްތަށް ބަންދުގައި ބައިތިއްބައިގެން ފަރުވާ ކުރިއަށް ގެންދިއުމަށް މަޝްވަރާ ކުރަމުންދާކަމަށެވެ.

މަސްތުވާތަކެތީގެ މައްސަލައަކީ ރާއްޖޭގައި މިހާރު އެންމެ ކަންބޮޑުވާ އެއް މައްސަލައެވެ. މަސްތުވާތަކެތި ބޭނުންކުރާ މީހުންގެ އަދަދު އިތުރުވަމުންދާއިރު، ސަރުކާރުން ވަރަށް ފަހުން ވަނީ މަސްތުވާތަކެތި ބޭނުންކުރާ މީހުންށް ފަރުވާދިނުމަށް ބޭނުންވާ ސެންޓަރުތައް ހިންގުމަށް އަމިއްލަ ފަރާތްތަކަށް ހުޅުވާލާފައެވެ