ސަރުކާރު ސްކީމުތަކުގައި ކިޔަވާ ދަރިވަރުންނަށް ފައިސާ ނުދޭކަމަށް ބުނެ ހުށަހެޅި ކުއްލި މައްސަލަ ބޭރުކޮށްލައިފި

ސްޓޫޑެންޓް ލޯން ސްކީމްގައި ރާއްޖެއިން ބޭރުން ކިޔަވަމުންދާ ދަރިވަރުންނަށް ސަރުކާރުން ޖަމާކޮށްދޭންޖެހޭ ފައިސާ ޖަމާނުކޮށްނުދޭކަމަށް ބުނެ އިދިކޮޅު އެމްޑީޕީން ހުށަހެޅި ކުއްލި މައްސަލަ މަޖިލީހުން މިއަދު ބޭރުކޮށްލައިފިއެވެ.

މިއަދުގެ މަޖިލީހުގެ ޖަލްސާއަށް ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ހުށްހެޅުއްވި މި ކުއްލި މައްސަލައަށް ބަހުސްކުރުމަށް ނެގި ވޯޓުގައި 59 މެންބަރުން ވޯޓު ދެއްވީ އެ މައްސަލަ ބަލައިނުގަތުމަށެވެ. އެ މައްސަލަ ބަލައިގަތުމަށް ފެންނަ ކަމަށް ވޯޓު ދެއްވީ އެންމެ 12 މެންބަރުންނެވެ.

ނާޒިލްގެ އެ މައްސަލާގައި ބުނެފައި ވަނީ، ނިމިދިޔަ އެމްޑީޕީ ސަރުކާރުގައި، ދަރިވަރުންނަށް ހިލޭ ޑިގްރީއަށް ކިޔެވުމުގެ ފުރުސަތު ފަހިކޮށްދީ، 10،000 އަށްވުރެ ގިނަ ދަރިވަރުންނަށް މަތީ ތަޢުލީމް ހާސިލް ކުރުމުގެ ފުރުސަތު ފަހިކޮށްދެއްވާފައިވާ ކަމަށެވެ.

އެހެން ނަމަވެސް، ސްޓޫޑެންޓް ލޯނުގެ ދަށުން ރާއްޖެއިން ބޭރުގައި ކިޔަވަމުންދާ ދަރިވަރުންނަށް ބޭނުންވާ ފައިސާ، ރައީސް ޑރ. މުހައްމަދު މުއިއްޒުގެ މި ސަރުކާރުން ޖަމާކޮށް ނުދޭ ކަމަށާ، އެކަމުގެ ސަބަބުން ކޯސް ފީ ނުދެއްކިފައި ދަރިވަރުން ތިބިއިރު އެކަމާ ގުޅިގެން އެ ދަރިވަރުންނަށް ކޮލެޖް/ ޔުނިވަސިޓީތަކުން އިންޒާރުދީ 'ބްލެކްލިސްޓް' ކުރާ ހިސާބަށް މައްސަލަ ގޯސްވެފައިވާކަމަށް ނާޒިލް ވިދާޅުވިއެވެ.

ސަރުކާރުން ރާއްޖޭން ބޭރުގައި ކިޔަވާ ކުދިންނަށް ދޭން ޖެހޭ ފައިސާ ޖަމާ ނުކޮށްދޭތީ ދަރިވަރުންނަށް ބޮޑެތި އުނދަގޫތައް ކުރިމަތިވެ، ޔުނިވާސިޓީ ނުވަތަ ކޮލެޖަށް ދައްކަން ޖެހޭ ކޯސް ފީ ނުދެއްކި، އެކުދިންނަށް ޔުނިވާސިޓީ ނުވަތަ ކޮލެޖުން އިންޒާރުދީ އެކުދިން ބްލެކްލިސްޓް ކުރާ ހިސާބަށް މައްސަލަ ވަނީ ގޯސްވެފައި.

ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް

މީގެ އިތުރުން ދަރިވަރުން ދިރިއުޅޭ ތަންތަނުގެ ކުލި ނުދެއްކިގެން އެތަންތަން ހުސްކުރަން ޖެހި އެ ދަރިވަރުން މަގުމަތިވުމުގެ ބިރުވެސް އެބަ އޮތްކަމަށް ނާޒިލް ވިދާޅުވި އެވެ.

އެ ކުދިން ދިރިއުޅޭ ތަން ހުސްކުރަން އަންގައި، އެ ކުދިން މަގުމަތިވުމުގެ ބިރު އޮތްއިރު، އަދި އާއިލާއާ ދުރުގައި ރާއްޖެއިން ބޭރުގައި ދިރިއުޅެމުންދާއިރު، އެކުދިން ދުވަހުން ދުވަހަށް ކުރަންޖެހޭ ޚަރަދުތައް ވެސް ނުކުރެވި އެކި ފަރާތްތަކަށް އެހީއަށް އެދި ސަލާމްޖަހަން ޖެހޭ ހާލަތަށް ބައެއް ކުދިންނާއި އެ ކުދިންގެ އާއިލާއިން ގޮސްފައިވޭ

ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް

ނާޒިލް ތުހުމަތުކުރެއްވި ގޮތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ދައުލަތުގެ ތިޖޫރި ހުސްކުރަނީ ސަރުކާރުގެ ވެރިންގެ ގެކޮޅުތަކާއި އޮފީސްތައް ޒީނަތްތެރި ކުރުމަށެވެ.