ޚަރަދުތައް ކުޑަކޮށް، ފީވަކު ކައުންސިލުން އެޅީ ގެސްޓްހައުސްއެއް؛ ލިބޭ އާމްދަނީ ހޭދަކުރާނީ ރަށުގެ ތަރައްގީއަށް

ދައުލަތުން ދޭ ބަޖެޓުން ކުރާ ޚަރަދުތައް ކުޑަކޮށް، ފައިސާ ރައްކާކޮށްގެން ށ. ފީވަކު ކައުންސިލުން އެ ރަށުގައި ތަރައްޤީކުރި ފުރަތަމަ އެކޮމޮޑޭޝަން ބްލޮކް، ގެސްޓްހައުސް، ހިންގުމަށް އަމިއްލަ ފަރާތަކާ ހަވާލުކޮށް، ކައުންސިލަށް އާމްދަނީ ލިބޭނެ ދާއިމީ ދޮރެއް ހުޅުވާލައިފިއެވެ.

20 އަހަރު ދުވަހުގެ މުއްދަތަށް 5 ކޮޓަރީގެ މި ތަން ހިންގުމަށް ހަވާލުކޮށްފައިވަނީ "ބަލްމާ ސަންސެޓް ރެސްޓޯރެންޓް" އާއެވެ. މި އެއްބަސްވުމުގެ ދަށުން މަހަކު 22,500 ރުފިޔާގެ ކުއްޔެއް ކައުންސިލަށް ލިބިގެންދާނެއެވެ.

މިއީ އާމްދަނީ ހޯދުމަށް އެހެން ވަސީލަތެއް ނެތް ފީވަކު ކައުންސިލަށް ލިބިގެންދިޔަ މާލީ ބޮޑު ކުރިއެރުމެއް ކަން އެކައުންސިލުން ފާހަގަކުރެއެވެ.

ފީވަކު ކައުންސިލްގެ އިދާރާގައި ބޭއްވި ރަސްމިއްޔާތެއްގައި މި އެއްބަސްވުމުގައި ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް ޢަލީ ރަޝީދު ޙަސަނެވެ. އަދި ބަލްމާ ސަންސެޓް ރެސްޓޯރެންޓްގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރ އަޙްމަދު މުޖުތަބާއެވެ.

މި މަޝްރޫޢާ ގުޅޭގޮތުން ”ވޮއިސް“އަށް މައުލޫމާތު ދެއްވަމުން ކައުންސިލްގެ ރައީސް ޢަލީ ރަޝީދު ވިދާޅުވީ، ރަށުގައި ގެސްޓްހައުސްއެއް އެޅުމުގެ މައިގަނޑު ބޭނުމަކީ ފީވަކުގައި ލޯކަލް ޓޫރިޒަމް ފުޅާކުރުމާއި، އެކި ބޭނުންތަކުގައި ރަށަށް ޒިޔާރަތްކުރާ މީހުންނާއި ފަތުރުވެރިންނަށް ފަސޭހަކަމާއެކު ތިބެވޭނެ އިންތިޒާމު ހަމަޖައްސައިދިނުން ކަމަށެވެ.

އަދި މި މަސައްކަތަކީ ދައުލަތުގެ ގްރާންޓުން އިސްރާފު ކުޑަކޮށް، ސަލާމަތްކުރި ފައިސާއިން ކުރެވުނު މުހިންމު އިންވެސްޓްމަންޓެއް ކަމަށްވެސް އޭނާ ފާހަގަކުރެއްވިއެވެ.

އެގޮތުން ގެސްޓްހައުސް އެޅުމަށް ތިން އަހަރުތެރޭ އެއްކުރި 5.1 މިލިއަން ރުފިޔާ ޚަރަދުވި ކަމަށް އޭނާ ވިދާޅުވިއެވެ.

"މިތަން ކުއްޔަށް ދީގެން ކައުންސިލަށް ލިބޭ އާމްދަނީ ބޭނުންކުރާނީ ރަށުގެ ތަރައްޤީއަށާއި ރައްޔިތުންގެ ލާބައަށް ކުރެވޭ އެކި ކަންކަމަށް،" ޢަލީ ރަޝީދު ވިދާޅުވިއެވެ.

ލޯކަލް ޓޫރިޒަމަށް މަގުފަހިކުރުމުގެ ގޮތުން ފީވަކު ކައުންސިލުން މީގެ ކުރިން ވަނީ ބަނދަރު ހިޔާއަކާއި ފެންވަރު ރަނގަޅު ރެސްޓޯރެންޓެއްވެސް އެ ރަށުގައި ޤާއިމުކޮށްފައެވެ.