މީކާއިލްގެ ފަހު މެސެޖު ޕާޓީގެ އާންމު މެންބަރުންނަށް: ވަފާތެރިވާނަން، އިންސާފުވެރިވާނަން

މާދަމާ އޮންނަ އެމްޑީޕީގެ ޗެއާޕާސަން އިންތިހާބުގައި ޕާޓީގެ ހުރިހާ މެންބަރުންގެ ވޯޓް ދެއްވުން އެދިވަޑައިގެން މީކާއީލް އަހްމަދު ނަސީމް, ވޯޓްގެ ކުރީން އާންމު މެންބަރުންނަށް ޚާއްސަ މެސެޖެއް ދެއްވައިފި އެވެ.

މީކާއީލް އާންމު ކުރެއްވި ވީޑިއޯއެއްގައި ވިދާޅުވީ އެމްޑީޕީގެ ޗެއާޕާސަން ކަމަށް ކުރިމަތިލައްވާކަން މިދިޔަ ނޮވެންބަރު މަހު އިއުލާނުކުރެއްވީ ވަރަށް ފޮނި އުންމީދަތާއެކު ކަމަށެވެ.

އަދި އިންތިހާބަށް ނިކުންނެވީ ޕާޓީގެ މެންބަރުންގެ ވިސްނުން ހިމަނައިގެން ބޮޑު ތަސައްވުރަކާއެކު ކަމަށެވެ.

"އަޅުގަނޑު ކުރާ އެންމެ ބޮޑު އުންމީދަކީ 2028 ވަނަ އަހަރާހަމައަށް ގެންދެވޭނެ ކަމުގެ އުންމީދު. މި އުންމީދަށް ލިބުނު އެންމެ ބޮޑު ބާރަކީ އަޅުގަނޑު އިއުލާނުކުރި ކުުރުމާއެކު މި ޕާޓީގެ އާންމު މެންބަރުންނާއި މި ޕާޓީގެ ލީޑާޝިޕް, ތަފާތު ކުރުމެއްނެތި އަޅުގަނޑަށް ކުރެއްވި ތާއީދު,"

މީކާއީލް ވިދާޅުވީ އުމުރުން އެންމެ 18 އަހަރުގައި ރާޅުގަނޑުގައި ހުރި އެމްޑީޕީގެ ޕޯޑިއަމެއްގެ ކުރިމައްޗަށް ހުއްޓުނު ގޮތަށް އޭނާ ހުންނެވީ ޕާޓީއަސް ވަފާތެރިކަމާއި އިތުބާރާއެކު މެދުކެނޑުމެއްނެތި ޚިދުމަތް ކޮށްދިނުމުގައި ކަމަށެވެ. އަދި އެކަން މެންބަރުން މިއަދު ހެޔޮހިތުން ބަލައިގެންފައިވާ ކަމަށް ވިދާޅުވި އެވެ.

"މިއަދުވެސް އަޅުގަނޑުވާން ބޭނުން އެންމެ ބޮޑު ވައުދަކީ އެމްޑީޕީގެ ޗެއާޕާސަނެއްގެ ހައިސިއްޔަތުން ވެސް އަޅުގަނޑު މި ޕާޓީއަށް ވަފާތެރިވާނެ ކަމުގެ ވައުދު. މި ޕާޓީގެ އެންމެންނާމެދުވެސް އިންސާފުވެރިވާނެ ކަމުގެ ވައުދު. ހުރިހާ އެންމެންނަށް ހަމަހަމަވާނެ ކަމުގެ ވައުދު. މި ޕާޓީގެ ތިލަފަތް, ވަކިއަތަކަށް ބުރަނުކުރާނެ ކަމުގެ ވައުދު," އިންތިހާބުގެ ފަހު މެސެޖު ހިއްސާކުރައްވާ މީކާއީލް ވިދާޅުވި އެވެ.

މީކާއީލް ވަނީ މާދަމާގެ އިންތިހާބު ކާމިޔާބު ކުރައްވާނެ ކަމުގެ ޔަގީންކަން އެބަ އޮތް ކަމުގައި ވިދާޅުވެފަ އެވެ. އަދި ޕާޓީގެ ހުރިހާ މެންބަރުންގެ ކިބައިން ކެންޑިޑޭޓް ނަންބަރު ތިނަކަށް ވޯޓް ދެއްވުމަށް އެދިވަޑައިގަތެވެ.